Аволь умок Покш Игнатовань районсо улемстэ теевинь содавиксэкс эрзянь аванть Надежда Егоровна Жидкова марто. Сон важоди Покш Игнатовань муниципальной райононь «Центральная районная библиотека» эйкакшонь туртов книгань максомань отделсэ. Эряви меремс, те иестэнть сон тешксты кавто кенярксов датат. Мартонь 27-це чистэ сонензэ ды сазоронзо туртов (сынь кавтаськеть) топодсть кодгемень иеть. Омбоцесь – Надежда Егоровна ниленьгементнень важоди библиотекасо. Сазорозо истя жо эрямонзо алтызе библиотекань тевентень.
Течи минек евтнеманок Надежда Егоровна ланга.
Эйкакш пинге
Надежда Жидкова чачсь-кассь Покш Игнатовань райононь Вармазейка кезэрень эрзянь велесэ. Эйкакш пингезэ ютась те енксонь мазый таркасо. Вишкинестэ вечксь аволь васоло эйстэст пандонть пряс кузнеме, кизна кепе чийнеме, тельня сокссо кирякстнеме, Вармазейка лейсэ экшелямо.
Умонь шкасто саезь (веленть чачома иекс ловови 1852 иесь), те таркантень састь эрямо Андрейвелестэ, Покш Игнатовасто, Качаево станциястонть ды Ташто Чамзасто. Веленть лемдизь малаваст чудиця леенть коряс. Надежда Егоровна те пачтямонть аволь весть марсизе малавиксэнзэ пельде, теде сон ловнось библиотекасо важодемстэяк, тиринь веленть историянзо содамо бажамсто.
Надежда Жидковань (тейтерьксэнь фамилиязо Кабаева) эйкакш пингезэ ютась ламо эйкакшонь триця семиясо. Тетязо, Егор Иванович, пингень перть важодсь «Дружба» велень хозяйствань предприятиясонть. Ламо иень перть якась лишме мельга, колхозонь ламо эрьва кодат тевть топавтсь.
Авазо, Мария Алексеевна, эрямонзо алтызе тонавтыцянь тевентень. Течи стака ледстямскак, Вармазейка велень зяро эйкакшт тонавтсь ловномо, ловомо, сермадомо… Сон начальной классонь тонавтыцяль, весень вечксь прок эсензэ тиринь эйкакштнень. Шкань ютазьгак, кода сынст велень тейтерькатне ды церынетне школаст прядомадо мейле туильть ве енов эрямо, ялатеке эзть стувтне васенце тонавтыцяст. Советской шкатнестэ кенярксчитненень свал кучнесть мазый артовкс марто открыткат, минек эрямос телефононть самонзо марто кармасть гайневтеме тензэ. Текенень поладсынек, Надежда Жидковань эйкакш пингестэ саезь те шкас кадовсь мазый тюсонь открыткатнень ванстомань коесь.
Кода вере ледстинек, семияст ламо эйкакшонь трицяль: кавто тейтерькат-кавтаськеть ды колмо церынеть. Тетязо-авазо свал важодема таркасольть. Тейтерькатненень савсь кудопотмонть ванськавтомс, садпиресэ пандятнень кочкамс ды эште цератненьгак андомс ды мельгаст ламо лия тевтнень топавтомс. Ансяк сынь зярдояк эзть пеняця, эрясть кавто сазортнэ покш ояксчисэ ды вейке-вейкенень лездазь. Эште вишкинестэ пек вечксть книгань ловномо. Нать, а стяко школанть прядомадо мейле кавонест тусть тонавтнеме Ардатовань культпросветучилищав библиотекань тевенть тонавтнеме.
Уцяскав роботасо, уцяскав семиясо
Надежда Егоровна тонавтнемадо мейле велявтсь тиринь районов, лиссь мирденень эсест велень од церанть Сергей Жидковонь экшс. Сергей Борисович эсь шкастонзо тонавтнесь водителень тевентень. Сон важоди медицинань куроксто лезксэнь максомань станциясо. Апак учонь тевтнень пингстэ куш кодамо шкасто сонензэ гайневтить важодема таркасто. Сон свал анок лездамс кажос понгозентень. Те пек паро, зярдо ломанесь парсте содасы тевензэ ды, бути эряви, сон а арси эсь юткошканзо ванстомадо. Эдь а содат, мезе тонь учи ванды.
Жидковтне трясть-кастсть паро тейтерь. Мария школанзо прядомадо мейле тонавтнесь Московонь филиалонь Саранскоень кооперативной институтсо (ней – университет). Мирдень кедьсэ. Неень шкане сон касты вишка эйкакшост, Тимофей нуцькинест.
Жидковтне пек вечкить лия оштнева, енкстнэва ардтнеме, Россиянь мазый таркатнень ванкшномо. Аволь умок якасть Абхазияв, ламоксть содавтызь Кавказонть, эсест туртов паро ендо панжизь Крыменть. Маласо шкастонть, бути Пазось максы шумбрачи ды вийть, арсить молемс Карелияв. Кевкстеманок лангс, ульнесть-арасельть омбо масторсо, Надежда Егоровна мерсь, сынь тосо вестькак арасельть ды тунь а сявады сельмест тов якицятнень лангс. «Россиянь таркатне кодат мазыйть ды парт!» – мерсь сон.
Эште Надежда Егоровна пек вечки художественной литературань ловномо. Нать, а стяко эрямонь тевекс кочкизе библиотекарень тевенть. Келя, неень шкане ловны рузонь кельсэ нолдазь Никон Патриархонть ланга Филипповонь книганзо, теде мейле сайсы кедезэнзэ Александр Доронинэнь теке ломанденть сермадовксонть, ансяк эрзянь кельсэ ды эсенек авторонть. Вана истя: ловнозь, эсь тевень вечкезь ды эрьва чинь мелявкссо юты эрямозо те эрзянь аванть.
Неть читнестэ Надежда Егоровнань лемс евтавсть седейшкавань ламо паро валт юбилеензэ кувалма. Минь, «Эрзянь правда» газетань теицятне, вейсэндявтано неть паро арсематнес ды евтатано тензэ седейстэ ютыця пси поздоровт.
Кадык эрямозо карми шожда, кода сонзэ обуцясь, велькссэнзэ менелесь маней, вечкевикс ломанезэ кази тензэ ансяк паро ежомарямо ды эште ламо кенярксов чить!
Валентина Юдина
Фотось Егор Горинэнь.
Уважаемая Надежда Егоровна!
От всего нашего дружного коллектива сердечно поздравляем Вас с юбилеем! 60 лет – это прекрасный возраст, когда за плечами богатый опыт, а впереди – новые свершения.
Вы для нас не только коллега, но и наставник, который всегда готов поделиться своими знаниями и мудростью. Ваш профессионализм, доброта и отзывчивость делают нашу работу особенной и вдохновляют на новые достижения.
Пусть Ваш жизненный путь будет усыпан только приятными событиями, радостными моментами и успехами. Желаем крепкого здоровья, счастья и благополучия. Пусть Ваш дом всегда будет полон гостей, а сердце – теплом и любовью.
С наилучшими пожеланиями,
коллектив Большеигнатовской центральной районной библиотеки.