Аволь умок Мордовиянь Раськень драмань театрасо невтезельть зярыя фильмат, конатне теевсть-снимавсть «Союз Эрьзя Фильм» художественной анимациянь ды мультимедиань профессиональной студиясонть.
Студиясь пурназь-панжозь «АРТ-Центр» культурань ды искусствань виевгавтомань аволь коммерческой организациянь истямо жо лемсэ стартап-проектэнть юрсо Культурань инициативатнень Президентэнь фондонть лезксэнзэ вельде. Сон вейсэнди региононь шкинемав ломантнень, профессионалтнэнь ды те ёнксонть вечкицятнень, конатне теить лия ёнов а молиця анокставкс – а покшке художественной фильма Мордовиянь артыцятнень картинаст коряс.
Мероприятиянть юрсо невтевсть кавто фильмасто саевкст. Вейкесь эйстэст – «Отражение» фильмась, сон снимавсь художникенть Владимир Шанинэнь графической произведениятнень коряс. Омбоцесь – «Окно в детство», Валентин Попковонь живописень артовксонзо коряс.
Эряви ёвтамс, фильматнень ваномо сакшность аволь ансяк покштне, тесэ ульнесть ламо эйкакшткак, конатнень ютксо Саранск ошонь 39 № школань нилеце классонь тонавтницятне. Сынь учостькак невтеманть, теке марто мелявтстькак. Эдь самай сынст кенярксов вайгельтнесэ кортыть «Окно в детство» картинань геройтне.
Фильматнень невтемадонть икеле ульнесь кортамо «Союз Эрьзя Фильм» студиянь творческой командантень совицятнень марто, конатне ёвтнесть сынст снимамонь-теемань лувдонть.
Кода тешкстызе «Союз Эрьзя Фильм» стартап-проектэнь авторось Екатерина Кондрашкина, фильматнень снимамонь лувось арсевсь кувать ды домкасто:
– Мордовиянь художниктнень марто вейсэ минь ламо арсинек, кода седе вадрясто невтемс сынст шкинемаст од форматсонть, ды кемекстынек, што эрявить совавтомс артыцятненьгак, дизайнертнэньгак ды, паряк, музыканттнэньгак роботаст. Весе тень топавтомасо пек лездась Культурань инициативатнень Президентэнь грантось.
Грантонь ярмактнень лангс рамазель весе эрявикс оборудованиясь: компьютерт, графической планшетт ды эрявикс программат, художественной материалт. Ды кода мерсть творческой командань члентнэ, проектэсь лезды панжовомс шкинемань од ломантненень.
– Студиясь – те площадка кода профессионалтнэнь, истя аволь профессионалтнэнь туртов, – тешкстызе короткометражной анимационной художественной картинатнень художественной руководителесь Татьяна Ведякова. – Мекс минь лемдевтяно «Союз Эрьзя Фильм»? Те секс, Союзонтень совить профессиональной творческой ломанть – композиторт ды художникть, художникть-аниматорт ды графической дизайнерт, истя жо простой ваныцят – минек проектэнь участникть, конатне примасть участия фильматнень снимамосо-теемасо.
Кода ёвтнесть проектэнть тевс нолдыцятне, сехте стака ды домка важодема савсь теемс графической дизайнертнэнень ды аниматортнэнень, конатнень вийсэ Мордовиянь художниктнень живописень ды графикань произведениятне, мерят, вельместь. Сень туртов, штобу геройтне якавольть, леесь чудевель, пельтне уевельть менельганть, савсь теемс сядот, лиясто тёжат кадрат эрьва тевенть, эрьва эскельксэнть артозь. Те а шожда ды домка тевенть «Отражениясонть» топавтызь од художниктне Валерия Ершкова ды Алексей Курчавый; «Окно в детство» фильмасонть – С. Д. Эрьзя лемсэ музеень реставраторось Анжелика Романова ды Константин Попков (Валентин Попковонь цёразо).
Покш сюкпря эряви ёвтамс шкинемань ломантненень, профессионалтнэнень, ды те ёнксонть вечкицятненень, конатне явсть мель тердемантень теемс эсь путовкс фильматнень снимамосо. Невтемга, республикань Някань театрань артисткась ды композиторось Ирина Рахманова фильматненень сёрмадызе музыканть. Зярыя мелодиятнень седи Л. П. Кирюков лемсэ Саранскоень музыкальной училищань симфонической ансамблясь. Фильматнень лангсо важодемась ветявсь ие. Варгансо зярыя партият налксесь Алексей Курчавый художникесь. Истя жо улить флейтасо седямот, конатнень топавтызь эйкакшт.
Кода жо тешкстызе грантонь проектэнь кураторось, С. Д. Эрьзя лемсэ изобразительной искусствань республиканской музеень прявтось Людмила Нарбекова, «Союз Эрьзя Фильм» студиясь а лотки кавто фильматнень лангс. Улить од мельть-арсемат анимационной художественной лия произведениятнень коряс.
Юлия Еремина