Григорий Макарович Прекин чачсь 1923 иень апрелень 1-це чистэ Мельцанонь (ней Сыре Шайговань) райононь Трегубовка велесэ. Вейксэ иеть тонавтнесь Новоалександровской средней школасо, а войнадонть мейле прядсь педагогической техникум.
Журналистикав сась эштё войнадо икеле, 1938 иень кизэстэ. Мельцаны велесэ нолдавсь «Трибуна колхозника» газетась, конань редактировась Васенце Конной армиянь эскадрононь икелень комиссарось И. Д. Вандышев. Сон саекшнизеяк Григорий Прекинэнь важодеме инструкторокс. 1939 иестэ од журналистэнть кучокшнызь ответственной секретарень колмо ковонь курсатнес, конатне мольсть «Красная Мордовия» газетань редакциянть юрсо. Стажёрось прянзо невтизе ёроков журналистэкс, секс тензэ мерсть кадовомс теске. Ансяк Прекин велявтсь тиринь редакцияв ды кармась ответственной секретарекс. 1942 иень мартсто Григорий Макаровичень саизь служамо Якстере Армияв.
1942 иестэ, Астраханень Военно-пехотной училищанть прядомадо мейле, кучозель Северо-Кавказской фронтов 320-це стрелковой дивизиянь Химзащитань 51-це башка ротань отделениянь командирэкс. 1943 иень апрельстэ дивизиянь политотделэнть кармавтоманзо коряс аравтозель «За Отечество» дивизионной газетань редакциянь типографиянь прявтокс. Григорий Прекин сёрмалесь ламо статьят ды очеркть дивизиянь геройтнеде, конатне боецтнэсэ ды офицертнэсэ седеяк кастсть апелемачинть яттнэнь каршо тюремасонть. Сон сеедьстэ содавтнесь икеле аштиця подразделениятнень, кортнесь тосонь солдаттнэнь марто. Зярдояк а стувтовиця тюрематне, леднематнень ало передовойс газетатнень пачтямотне ды материалтнэс кулятнень пурнамотне, боецтнэнь марто вейсэ каявоматнень каршо тюрематне – весемесь те кадовкшнось пряудементень куломазонзо, ды мейле сёрмадокшнынзе литературной произведениязонзо.
Сон парсте неизе военной медиктнень важодемаст, конатне стакачисэ, керосинкань валдосо, паксясо тейнесть стакадояк стака операцият, идесть эрямот. Григорий Прекин военной хирургтнеде газетасонть сёрмадсь, келя, яттнэнь каршо тюремасонть сынст прявт орудияст – скальпелесь. Сон свал ансяк паро валсо сёрмадсь медиктнеде. Паряк, секс войнадо мейле ульнесь «Медицинской газетань» аволь штатной корреспондентэкс, а вана 1963–1984 иетнестэ важодсь Медпрепаратонь заводсо «Биохимик» газетань прявт редакторокс ды покш тейтерензэ Алланьгак кучизе тонавтнеме врачокс.
Григорий Макарович Прекин солдатонь кемсэ ютызе весе Европанть: тюрсь Кавказонть кис, олякстомтсь Донбассонть, Украинанть, Молдавиянть, Украинской 3-це армиянтень совазь, олякстомтсь Балканонть. Типографиянь прявтонь ды, теке шкастонть, корреспондентэнь тевтнень сон топавтсь войнанть прядовомс. Ине Изнямонь чинть вастызе Австриянь Грац ошсо. Войнанть прядовомадо мейле, 1945 иестэ, кучизь роботамо «На страже Родины» газетань редакцияв. 1947 иень мартсто тусь запасос.
Демобилизациядо мейле кармась важодеме Саранской райононь Посопонь «Вперед» газетасо. Те райононть калавтомадо мейле кучозель МАССР-нь Народной хозяйствань советс (икеле – Совмин), косо нолдасть ведомственной журнал. Теде мейле ульнесь «Биохимик» газетань редакторокс, конась республикасонть лововсь вадрятнестэ вейкекс. Текень пингстэ аволь штатной корреспондентэкс важодсь «Красная Звезда», «Медицинская газета», «Сельская жизнь», «Лесная газета» центральной газетатнесэ, Равчирень Военной округонь газетасо, примась участия ветерантнэнь ледстнематнень марто Мордовиянь книгань издательствасо книгань нолдамотнесэ, истя жо печатавсь «Советский воин» журналсо.
Фронтовой ояксчись кадови свалшкас. Григорий Макарович эзь менстякшно Ударной 5-це Армиянь фронтовиктнень Московсо вейкеяк вастовома. Сонзэ архивсэ ванстовсть неть вастовоматнень кой-зяро фотографият телевидениясо ЦТ-нь дикторонть Виктор Балашов марто.
Войнань тюрематнесэ невтезь апелемачинть кис Г. М. Прекин казевсь Якстере Тештень орденсэ, «За боевые заслуги» медальсэ, истя жо ламо лия медальтнесэ, ламо иень перть печатьсэ парсте важодеманть кис М.А. Шолохов лемсэ медальсэ, ульнесь трудонь ветеранокс. Од ломантнесэ тиринь масторонтень вечкеманть кастомасо путовксонть кис казезь ламодояк ламо Благодарностьсэ ды Россиянь Ветеранонь советэнь Комитетэнь грамотатнесэ. Григорий Макарович покш мель явсь вешнемань (поисковой) роботантень. Ламо сёрмадсь Мордовиянь содавикс ломантнеде: А. И. Полежаев поэттэнть, А. Дорогойченко писательденть, ялакстнэде Веденяпинтнэде, ине С. Д. Эрьзянь тонавтницятнеде ды ламо лиятнеде.
Григорий Макарович Прекин эрямостонть тусь 2013 иень маень 10-це чистэ, тензэ ульнесть 90 иеть. Ледстнематнес сон кадовсь ломанень вечкицякс, киньгак а покордыцякс, ламонь содыцякс. Вечксь ловномо, пенсияв туезь, ламо шка ютавтсь ошонь библиотекатнесэ, ламо важодсь од ломантнень марто, ламоксть мартост вастневкшнесь. Трясь-кастсь колмо тейтерть.
Галина Евстигнеева