Августонь 5-це чистэ Башкортостанонь Стерлитамак ошсо ютась «Шумбрат» эрзянь ды мокшонь раськень культурань республикань кенярксчи. Сон алтавсь «Башкортостан Республикань эрзянь ды мокшонь раськень-культурань центра» общественной вейсэндявксонь 25 иетненень.
Инжетне пурнавкшность ошонь «Сода» культурань кудосо. Тесэ важодсь «Мордва. 300 лет в соцветии Курая» этнографической выставка, косо невтевсть кедьчелькев ломантнень теевксэст, ютасть раськень творчествань коряс мастер-класст.
Истя жо те вастовомасонть ютась Башкортостанонь Эрзянь ды мокшонь раськень-культурань центрань отчётно-выборной промкс. Тей сакшность Стерлитамаконь администрациянь прявтось Рустем Газизов, Башкортостанонь прявтонь Управлениянь общественно-политической кевкстематнень коряс советникесь Светлана Ибатуллина, Башкортостанонь Культурань министрань васенце полавтыцясь Наталья Лапшина, Эрзянь ды мокшонь регионъютконь общественной вейсэндявксонь прявтось Юрий Мишанин, Башкортостанонь эрзянь ды мокшонь раськень-культурань центрань прявтось Юлия Герасимова ды лият.
Промкссонть кепедезельть эрьва кодат кевкстемат, кортазельть эрзянь ды мокшонь центранть седе тов важодемань мельтне-арсематне. Башкортостанонь Эрзянь ды мокшонь раськень-культурань центрань прявтокс одс кочказель Башкортостанонь Государственной Собраниянь – Курултаень депутатось, Стерлитамаконь хлебокомбинатонь прявтось Юлия Николаевна Герасимова.
Кенярксчись прядовсь мазый концертсэ, косо киштсть-морасть Башкортостанонь ды Мордовиянь артисттнэ ды творческой коллективтне, сынст ютксо ульнесть МР-нь Народной артисткась Нина Спиркина, «Арсема» эстрадань группась ды Артём Мамаев од морыцясь.
Анокстызе
Татьяна Маторкина