Суббота, сентября 18, 2021
Важное


Сундерьковонь 25-26-це читнестэ Саранскойсэ ютавтовсь «Мордовия многонациональная: межкультурный диалог» медиафорумось. Сонзэ прявт тевезэ – республикасонть эриця раськетнень этнокультурной сюпавчинть информационной ресурстнэнь вельде невтемась ды раськетнень ютксо ояксчинь сюлмотнень ванстомасо аволь коммерческой организациятнень эрявиксчинть панжомась.


Медиафорумось ютавтовсь «Ассамблея народов России» Мордовиянь региононь отделениянь весероссиянь общественной вейсэндявксонть мелензэ коряс вейсэ Н.П. Огарёв лемсэ МГУ-нть ды Равчирень финнэнь-угрань раськетнень культурань куронть марто, МР-нь Культурань, раськень политикань ды архивень тевень министерстванть лезксэнзэ вельде.

Медиафорумонь участникекс кармасть высшей ды средней тонавтнемань заведениянь студенттнэ, раськень культурань вейсэндявкстнэс совицятне, од ломанень, студентэнь медиатнень ды профессиональной СМИ-нь важодицятне, тонавтнемань ды культурань учреждениятнень специалисттнэ, республикань ды Россиянь лия регионтнэнь (косо эрить эрзянь ды мокшонь раськетне) культурань куншкакуротнесэ важодицятне.

Мероприятиянть панжомасо ульнесть: МР-нь Культурань, раськень политикань ды архивень тевень министрань васенце полавтыцясь Александр Карьгин, Россиянь Раськетнень ассамблеянь Советэнь председателень васенце полавтыцясь, «Ресурсный центр в сфере национальных отношений» АНО-нь прявтось Евгения Михалёва, Н.П. Огарёв лемсэ МГУ-нь тонавтнемань тевтнень коряс проректорось Алина Маслова, Равчирень финнэнь-угрань раськетнень культурань куронь прявтось Елена Ломшина, Н.П. Огарёв лемсэ МГУ-нь студенткась Анастасия Милославская.

Кода тешкстызе Елена Николаевна Ломшина, течинь чине минек республикасо ояксчисэ эрить 119 раськеть ды Мордовиянь университетсэ истя жо тонавтнить эрьва кодамо раськень студентт. Теке марто тешкстызе, проектэсь тевс нолдави Россиянь Президентэнь грантонть лезксэнзэ вельде. Мордовиясь кармась пилотной кемготовоце площадкакс.

– Минек республикась WOW-мероприятиянь ютавтоманть коряс совась кемготово регионтнэнь юткс ды ашти «ЭтНик:ПроДвижение» Весероссиянь проектэнь пилотной площадкакс, кона ловови «ЭтНик» Весероссиянь программань ушодксокс. Сонзэ анокстыцясь ды тевс нолдыцясь – Россиянь Раськетнень ассамблеясь вейсэ «Ресурсный центр в сфере национальных отношений» АНО-нть марто.

Проектэнть прявт тевезэ – невтемс минек республикасо эриця раськетнень культурань мазычинть ды сюпавчинть, невтемс, кодамо путовксост раськетнень ютксо сюлмотнень кемекстамосо аволь коммерческой организациятнень, – тешкстась Елена Николаевна.
Медиафорумонь участниктненень пшкадемстэ МР-нь Культурань, раськень политикань ды архивень тевень министрань васенце полавтыцясь Александр Карьгин мерсь: «Неень шкане васень тевесь ды прявт сюпавчись – раськетнень ютксо ояксчинть ванстомась». Александр Иванович арсесь весенень вадря ды лезэв важодема ды ёвтась сюкпрянь валт министранть С.Н. Баулинань пельде.

Евгения Абрамовна Михалёва республиканть содавтызе уш аволь васенцеде, ульнесь эрзя-мокшонь раськенть Россиянь лия раськетнень марто вейсэндявомань тёжа иетненень алтазь мероприятиятнесэ, сакшнось лия кенярксчитнескак. Сон тешкстызе, кода паро, медиафорумонь участникекс кармасть ламо од ломанть, студентт.

– Пек вадря, Мордовиясь кармась «ЭтНик:ПроДвижение» проектэнь кемготовоце площадкакс. Арсеви, весе вейсэ минь тейтяно вадря ёнов полавтомат. Кеман, медиафорумонть лувсо чачить од мельть-арсемат ды теевить ояксчинь кеме сюлмот, – мерсь Евгения Абрамовна.
Медиафорумонь программась аштесь конкурсонь пельксстэнть, косо невтевсть 50 ламо роликть: видеосюжетт, репортажт, этноблогт, промороликть, интервьют. Роботась «Этнофокус» фотовыставкась. Фестивальной пелькссэнть НКО-нь важодемадо эсь медиапроектэст невтизь профессионалтнэ. Теке марто кавто чинь перть медиасферань ёнкссонть эксперттнэ ютавтсть ворк-шопт. Пелькстамонь весе роботатнень ваннось ёроков жюрись, козо совасть медиасферань содавикс ды чарькодиця ломантне.

Спикертнэнь марто содавтоманть панжизе Евгения Михалёва, сонзэ ворк-шопонь темась: «Секрет создания успешного проекта». Эсь важодемасонть сон башка мель яви раськеютконь сюлмотнень кемекстамонь коряс проекттнэнень, ламо важоди экстремизмань ды ксенофобиянь тевтнень а нолдамга.

Сонзэ важодеманть вельде ансяк меельце шкастонть тевс нолдавсть истят проекттнэ, кода: «Россия многонациональная», «Лица России», «Клуб межнациональных инициатив», «Моя Россия – единство народов», «Рукопожатие» кинофорумось.

Евгения Михалёва важоди экспертэкс, тренерэкс ды консультантокс тонавтнемань мероприятиятнесэ эрьва кодамо этнокультурной организациятнень ды ресурсной центратнень мероприятиятнесэ.
Эштё вейке спикерэкс кармась «Россия» телеканалонь «Вести» программань специальной корреспондентэсь Алёна Рогозина. Сонзэ ворк-шопонь темась – «Журналистика во время пандемии. Принципы успешной карьеры и финансового роста».
Алёна Рогозина – «Тэфи» телевизионной пелькстамонь колмоксть номинант, «Репортёр» башка казнень саиця, «Будущее России» весероссиянь пелькстамонь изниця, «Народное телевидение Мордовии» информационной ресурсонь арсиця ды теиця.
Эштё вейке экспертэсь – Маргарита Лянге. Сон – Российской Федерациянь Президентэнть юрсо Раськеютконь сюлмотнень коряс советэнь член, Межэтнической журналистикань гильдиянь прявт, «Национальный акцент» порталонь прявт редактор. Сонзэ ворк-шопось ульнесь «Цифровая журналистика в межэтнических отношениях» теманть коряс.

Маргарита Лянге колоньгемень иеде ламо важоди СМИ-сэ этнической мелявкстнэнь коряс. Эсь роботатнесэ башка мель яви этнической экстремизманть ды ксенофобиянть марто бороцямонтень.
Медиафорумонь спикерэкс истя жо ульнесть «Ростелеком» ПАО-нь микшнематнень группань прявтось Надежда Казакова (Саранск ош), фотографось ды арт-проекттнэнь авторось Олег Романов, режиссёрось, видеографось, арт-проекттнэнь арсицясь Евгений Зинкин.
Сынст ворк-шоптне кармасть пек лезэвть медиафорумонь участниктнень туртов. Корязост ули мезес тонавтнемс.

«Мордовия многонациональная: межкультурный диалог» медиафорумонь итогтне ёвтавсть сундерьковонь 26-це чистэ. Кода тешкстызе Равчирень финнэнь-угрань раськетнень культурань куншкакуронь прявтось Елена Ломшина, форумонь программась пек сюпаволь, мельстуицяль ды лезэвекс ульнесть ворк-шоптне ды мастер-класстнэ.

– Тыненк максовсть эрявикс содамочить, ды, арсеви, сынь лездыть эсь проекттнэнь анокстамосо, – мерсь Елена Николаевна. – Пелькстамонтень кучозельть 50 ламо яволявтомат НКО-нь, СМИ-нь ды студенттнэнь пельде. Яволявтоматне састь аволь ансяк Мордовия Республикасто, кода минь васня арсинек, роботатнень кучсть Россиянь регионтнэстэяк. Весенень покш сюкпря ды эштё ламо од проектт!
Медиафорумось пекставсь изницятнень лемест ёвтамосо. Истя, «Видеоподкаст» номинациясонть изнясть Н.П. Огарёв лемсэ МГУ-нь филологиянь факультетэнь студенттнэ Анастасия Мезяева ды Артём Рузманов. «Репортаж» номинациясонть вадрякс ёвтазь Мордовиянь университетэнь филологиянь факультетэнь студентканть Анастасия Сурковань «Туристические сокровища Мордовии» важодевксэсь. «Интервью» номинациясонть изнясь Н.П. Огарёв лемсэ МГУ-нь Раськень культурань институтонь студентканть Ульяна Язовцевань «Многонациональная Мордовия» важодевксэсь. «Фотография» номинациясонть васенце тарканть саизе Санкт-Петербургонь Социальной психологиянь ды рекламань институтонь студенткась Анна Кронова. «Гуру репортажа» номинациясонть изницякс ёвтазь «Мордовия» ВГТРК-нь корреспондентэсь Александр Данильчев ды седе тов.

Юлия Еремина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».