Вторник, мая 21, 2024
Важное

Орданьбуень краеведениянь музеесь панжозель 1975 иестэ. Иень ютазь, маень 9-це чистэ, ломантненень невтезель васенце экспозициясь. Те – кезэрень шкань ули-парот, конат муезельть райононть келес. Музеень пурныцякс ульнесь милициясо важодицясь, сержантось В.П. Дубинкин. Важодемадонзо башка, сон покш мель явсь краеведениянтень. Пурнась ташто экспонатт, вешнесь эрьва кодат материалт. Ней Орданьбуень музеесь – И. Д. Воронин лемсэ республикань краеведениянь музеень филиал. Тесэ невтеви райононть покш ды сюпав историязо. Теевтяно мартонзо содавиксэкс миньгак.

– Музеень зданиясь стявтозель 1781 иестэ седе мейле, кода Орданьбуентень макссть уездной ошонь статус. Сон кавто этажсо ды кевень. Тесэ мезе ансяк арасель неть пингетнень перть: уездной суд, казначейства, милиция, ваксозонзо педявтозель колмо камерань тюрьма, сонзэ нупальтне ванстовсть те шкас ды минь невтнетяно инжетненень. Музеесь тей ютась 1986 иестэ, – ёвтни музеень прявтось Зинаида Киушкина.

Орданьбуень музейсэнть 11 зал, эрьвасонть кезэрень ули-парот ды покш история. Весемезэ 22 тёжадо ламо экспонатт, ули фондохранилищаст. Васенце витринатнесэ невтевить археологической материалтнэ, конат муезельть районсонть: кевень узереть, сёвонень пенчть-вакант, аватнень мазылгавтомапельть – кедькст, сюлгамот, пря бокас понгавтовиця мазылгавтомкат.

Седе тов инжетне понгить этнографической залонтень. Тесэ теезь велень кудонь чувтонь макет. Столенть перька аштить кувака эземть, понгавтозь лавсь, вакссонзо ашти эрзянь авань викшнезь-стазь оршамопелесь, конанень сядодо ламо иеть, ули кодамонь стан, тешкс марто одирьвань парь. Невтеви весе се, мезе ульнесь минек покштянок-бабанок эрямосо. Эйкакштне тесэ улемстэ понгить прок ёвксос, эрьва экспонатось маряви тенст дивань тевекс. Секскак неть предметтнэде сыненст ёвтнить ламо ды домкасто. Промыслань нупальсэнть невтеви се, косо ды кода важодсть велень эрицятне. Сынь тейнесть крандазт, чарыть, кевердсть кемть, кодасть карть, тейнесть боцькат, мебель, стасть карсемапельть. 

Башка валт эряви ёвтамс чувтосто керсицядонть А. Н. Кузанкиндэ (1850–1943). Сон чачсь Ташто Орданьбие велесэ. Мезе ансяк эзь тейне те сырнень кедь цёрась! Музейсэнть ванстовить буфет, шахматонь столь, ярсамонь столь. Сон тейсь эрьва кодамо мебель ды мазылгавтсь сынст. Ванстовсть казнензэяк: грамотат, свидетельстват. 1923 иестэ сон ульнесь Московонь велень хозяйствань ды кустарно-промышленной васенце выставкасо, казезь памятной тешкссэ.

Орданьбуесь – купецень-мещанонь ош. Тесэ эрясть купецть, микшницят, сюпав ломанть. Музейсэнть улить кезэрень шкань часонь, зеркалань, утюгонь, самоваронь коллекцият. Ламо мезе мукшнось В.П. Дубинкин шукшпрятнестэ. Ташто кудонь рамамсто ломантне сынсь кандыльть музеев экспонатт. Тургенева посёлкасто муезель граммофон. Купецень кудосто – пианина. Истя жо тесэ ули фисгармония (сон седи пильгесэ педалень лепштнезь). Самовартнэнь вакссо сеедьстэ ютавтовить эйкакштнень марто вастовомат. Тесэ сынь симить чайде ды кунсолыть ошонь историянть. Пек вечкевить тенст истят экскурсиятне.

Эряви меремс, чугункань кись ютась Орданьбуе ошонть вакска (Орданьбуе станциястонть кись велявты Алатырь ёнов). Те, нама, полавтызе ошонь эрямонть, тесэ арасель покш промышленность, паро кивтеме васов а пачкодят.

Сюпав материал пурназь больницянь историядонть. Сон панжовсь 1865 иестэ. Эсь шкасто те ульнесь земской паро больниця. Тесэ важодсть содавикс хирургтне В.Ф. Войно-Ясенецкий (Лука архиепископось), В. С. Левит, Н.В. Иванцев ды лиятне. 2013 иестэ саезь Орданьбуесэ ютавтневить Лукинской православной ловномат. З. И. Киушкина ламо ёвтнесь святительденть Лукадо. Сон ульнесь пек содавикс ломанекс, врачокс ды священникекс. Сень кисэ, мекс кармась священникекс, нилексть кучнизь эрьва кодамо таркава ссылкав, аштесь тюрьмасояк. Ансяк косо аволь уле, свал лездась ломантненень, лецясь ды стявтсь пильге лангс. Орданьбуесэ сон ульнесь Рузонь-япониянь войнадо мейле, 1905 иестэ сась нинзэ марто, эрясть тесэ февральстэ саезь ноябряс. 1995 иестэ лемезэ совавтозель иневанькстнэнь юткс (причислен к лику святых), мощанзо ванстовить Симферополень Троицкой кафедральной соборсо.

Врачось В. С. Левит васенцеде те ёнкссонть тейсь паро операционной, усксь рентгенэнь аппарат. Ламо мезе тейсь Н. В. Иванцев. Ине Отечественной войнань шкане тесэ аволь кувать ульнесь госпиталь. Пекстызь сень кувалма, мекс чугункань кинь станциясь ашти ве пеле, ранявозтнень а мейсэ ульнесь ускомс.

Башка валсо эряви ледстямс Ариан Павлович Калининэнь лемензэ. Те – содавикс хирург-эндокринолог. Сон чачсь 1927 иестэ Орданьбуесэ. Пазось казизе паро превсэ-содамочисэ. Сисем иесэ мольсь сеске нилеце классос. Школанзо прядызе шкадо икеле ды сырнень медаль марто. Седе тов тонавтнесь Казанень мединститутсо. 23 иесэ идизе кандидатской диссертациянть. Теде мейле Московсо – докторской диссертациянть. 40 иеть важодсь М.Ф. Владимирский лемсэ Московонь научно-исследовательской институтсо, ульнесь хирургической эндокринологиянь отделениянь прявтокс. Сон сёрмадсь научной малав 800 статьят, монографият, врачтнень туртов пособият, конатне нолдазельть башка книгасо. СССР-сэ васенцекс тейсь операция надпочечниктнень лангс. Сон кавксть ульнесь Орданьбуень музейсэ. Сэтьмель, аволь покшкавтницяль, эзь кандо прянзо верьга, кадык ульнеськак покш ломанекс. 2016 иестэ сон тусь эрямосто. Музеев материалт макссь Светлана тейтерезэ.

Орданьбуесэ чачсь Ия Арепина актрисась (1930–2003). Сон налксесь «Капитанская дочка», «Большая семья», «Илья Муромец» ды ламо лия фильматнесэ. Сеедьстэ сакшныль тиринь ёнксов, совсиль музеев. Ней тесэ ванстовить сонзэ коряс малав 300 экспонатт: фотографият, афишат, журналт, актрисанть ули-паронзо. Орданьбуе ошсо вейке ульцясь кандтни лемензэ.

Истя жо те ошсонть чачсь Людмила Татьяничева поэтессась (1915–1980). Сон вишкинестэ кадовсь урозокс, тусь эрямо Уралов, косо тризь-кастызь васоло роднянзо. Музеенть марто кирди ялгаксчи Юрий цёразо, тей ды И. Д. Воронин лемсэ краеведениянь музеев сон макссь авадонзо пек ламо материалт: рукописть, книгат, телефононь аппарат, стихензэ марто пластинкат ды лия мезе. Музейсэнть ютавтовить сонзэ ледстнемга творческой чокшнеть.

1875 иестэ Орданьбуесэ панжозель авань гимназия, ульнесь цёраньгак. Педагогической училищась важодсь 1937–1956 иетнестэ. Неень шкане важодить средней общеобразовательной школась ды лавшосто неиця эйкакштнень школась-интернатось.

Покш тарка музейсэнть саи воинской славань залось. Башка экспозиция алтави ветерантнэнень-земляктненень – Васенце мировой войнань, Ине Отечественной войнань, Афганистанонь ды Чечнянь военной действиянь участниктненень. Орданьбуесэ чачсь Мордовиясто Советской Союзонь васенце Героесь Иван Алексеевич Пожарский (1905–1938). Георгиевской полной кавалерэсь С. Л. Потешкин ды цёразо И. С. Потешкин – Славань орденэнь полной кавалерэсь. Ине Отечественной войнав тюреме районстонть туекшнесть 9685 ломанть, малав кото тёжат эзть велявто мекев. Тесэ чачсть Советской Союзонь Геройтне Е.А. Дикопольцев, М. Я. Романов.

Башка нупаль алтазь сенень, кода ломантне эрясть войнадо мейлень иетнестэ (Бытэнь зал). Газета вельде музеесь пшкалесь эрицятненень, ломантне кандсть ули-парот. Вейке ташто кудонть микшнесть, тосо эрясь сырькайне, весемесь кудопотсонзо аштесь апак полавто. Малавиксэнзэ тердизь музеень важодицятнень ды мерсть саемс сень, мезе тенст эряви. Горобиясто мусть вишка эйкакшонь оршамопельть, конат невтевить экспозициясонть. Те залонть пек вечксызь инжетне, сынь понгить ютазь шкас, эсест эйкакш пингезэст, зярдо ульнесть истят жо шаршавт, дивант, ковёрт-паласт, радиот, част, телевизорт ды седе тов.

Музейсэнть ули выставкань зал, косо секе-тев панжовкшныть од выставкат. Ней вана тесэ понгавтозь художникенть ды поэтэнть Дмитрий Куликовонь пек мазый картинанзо. Кудораськень иентень невтевить революциядо икелень Орданьбуень семиятнень фотографияст. Тесэ ютыть школань тонавтницятнень ды студенттнэнь марто мельстуиця вастовомат. Мелят «Культура» нацпроектэнть вельде музеесь изнясь виртуальной концертэнь залонь панжомга грант. Курок сон ушоды важодеме.

Башка валт ёвтама тесэнь важодицятнеде. Экскурсиятнень ветить О.И. Куландина ды З.И. Киушкина, улить музеень сюпавчинзэ кавто ванстыцят. 1991 иестэ саезь музейсэнть роботы научной сотрудникесь Ольга Ивановна Куландина. Сон прядызе Н. П. Огарёв лемсэ МГУ-нь биологической факультетэнть. Валонзо коряс, шканть марто вейсэ полавтовить вешематнеяк, экскурсиянь тематикаськак. Фондтнэнь вельде свал муят эстеть мезе-бути од, пачтят теде инжетненень.

Зинаида Ивановна Киушкина малав 30 иеть важодсь тесэ прявтокс. Сон – МР-нь культурань заслуженной роботник. Неть читнестэ тусь пенсияв. (Зярдо вастневинек, эштё топавтсь прявтонь тевтнень). Чачсь Инсарбуень Паевка велесэ. Тонавтнесь Орданьбуень лавшосто неиця школасонть-интернатсонть. Прядызе М. Е. Евсевьев лемсэ МГПИ-нь (ней – МГПУ) филологиянь факультетэнть. Мирдезэ тонавтнесь Московонь культурань институтсо ды сонзэ кучизь роботамо Московонь областень народной театрань режиссёрокс. Истя Зинаида Ивановна понгсь Серебряные Пруды посёлкав. Тосо кемень иеть важодсь Советской Союзонь кавксть Героенть, Маршалонть В.И. Чуйковонь лемсэ музеень прявтокс. Те шкас ледстни, кода неизе, мезе те алкуксонь музеесь, кодат улить исторической экспонатт – весе те пек токшизе седеензэ. Сон мельспаросо топавтсь тевензэ. Седе тов семиянек велявтсть Орданьбуев. 1995 иестэ сонзэ сеске ладизь Орданьбуень краеведениянь музеень прявтокс. А тесэ латось кольгсь, кияксканть аравтнезельть тазат, зданиясь эзь уштово, арасель свалшкань экспозиция. Ушодсть витнемасто-петнемасто. Савсь чийнемс, вешнемс ярмакт. Коллективесь весементь тейсь эсь кедьвийсэ, весе седейстэ ды вечкезь. Важодицятне мукшность темат, конат туевельть мельс ломантненень. Теке тевенть сынь поладыть нейгак – ванстыть-пурныть материалт, ютавтыть экскурсият ды вастовомат, ветить РФ-нь музеень фондонь вейкине госкаталогонть. Музеесь – эри ды теньсэ покш путовксост сонзэ важодицятнень.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».