МР-нь Государственной филармониясо ушодовсь «Музыкальный ковчег» программась. Те – культурасо ды искусствасо творческой проектэнь РФ-нь Президентэнь грантонь изниця проект. «Музыкальный ковчег» концертсэнть моры МР-нь Государственной камерной хорось. Ваныцятнень туртов сон анокстась сюпав ды мельстуиця программа, косо гайгить рузонь композитортнэнь эрьва кодамо стилень ды жанрань произведеният.
– Те проектэнть минь анокстынек 2021 иестэ. Тедеде явозель 1 млн целковоень покшолмасо грант. Сюкпря, улить истят фондт, конатне лездыть совавтомс эрямос вадря тевть. Кавто ковонь перть минек Камерной хорось карми невтеме концертт. Сынь ютыть республикань весе районтнэва. Кармить гайгеме весенень содавикс ды ламонень вечкевикс моротне. Программась алтави кода покштнень, истя жо вишкинетнень туртов. Минь эсь юткованок ламо кортынек-пелькстынек, кодат произведеният кочкамс. Весе эсь масторонь ды малавикстнэнь вечкемадо. Кемтяно, ваныцятне кадовить мельспаросо, – ёвтнесь Мордовиянь государственной филармониянь прявтось С. Н. Кузьмин.
Саранскойсэ «Музыкальный ковчег» концертэсь вастозель пек лембестэ. Тесэ гайгсть содавикс композитортнэнь С. Рахманиновонь, А. Скрябинэнь, М. Глинкань, М. Шостаковичень ды лиятнень произведенияст, истя жо Мордовиянь автортнэнь – Н. Кошелевань, С. Терхановонь, Л. Кирюковонь. Башка пелькс алтазель военной моротненень, гайгсь православной духовной музыка, кинофильматнестэ морот. «С чего начинается Родина» ды «Подмосковные вечера» моротнень морасть хорось ды залось вейсэ! Ламо цяпамот алтасть хоронь солистэнтень Олег Чепарёвнень. Сон ловнызе «Зорю бьют» (Г. Свиридов, А. Пушкин) произведениянть, морызе «Бременские музыканты» мультфильмасто «Трубадуронь серенаданть» (Г. Гладков, Ю. Энтин). Од цёрась – раськеютконь конкурсонь лауреат.
Чарькодеви, Камерной хоронь коллективесь покш (художественной руководителесь ды дирижёрось, МР-нь искусствань заслуженной деятелесь Павел Карташов), сон аволь сеедьстэ ардтни районтнэва. Ней жо ломантне содавтовить минек сюпавдояк сюпав музыкальной искусстванть марто. Концерттнэс билетт а микшневить, мереви самс ваномо эрьванень. Те проектэсь алкуксонь казне ваныцятнень туртов. Кить уш неизь программанть, кадовсть паро ёжосо ды мельспаросо.
Татьяна Маторкина