А. С. Пушкин лемсэ библиотекасо ютась «Мордовиянь раськетне: историясь, культурась, койтне-кирдатне» кругловой столь. Тесэ яволявтозельть «Сохраняя традиции, создаём будущее» проектэнь цётамотне, конась изнясь культурань инициативань Президентэнь фондонь грант. Проектэнть анокстызе «Россиянь раськетнень ассамблея» общероссийской общественной организациянь минек ёнксонь отделениясь (прявтось Е. Н. ЛОМШИНА).
Проектэсь важодсь иень перть. Истя, ютавтозельть «Культура этносов Республики Мордовия» интернет-викторина; «Мордовия многонациональная» фотоконкурс; Мордовиясо эриця раськетнень коряс «Наследие» аудиовизуальной энциклопедиянь теема. Ёвтнетяно сондензэ седе домкасто.
Мордовиясо эрить 119 раськеть. Сехте ламо рузт, эрзят, мокшот, татарт, еврейть, армянт, азербайджанецт, украинецт. Самай сындест арсевсь снимамс фильмат. Теезельть научно-популярной сисем фильмат, косо прявт героекс кармасть коллективтне ды ськамост морыцятне, народной промыслань ды ремеслань мастертнэ, ломантне, кить ванстыть койтнень-кирдатнень. Фильмань теицятне ардтнесть зярыя кенярксчитнес: Покш Игнатбуев – Раськень Озксов, Зубова-Полянань районов – Акша Келув, Лямбирень районов – Сабантуев.
– Саранскойде башка, минь якинек Теньгушевской райононь Шокша, Сакаево, Стандрово велетнес, Сыре Шайговань Сыре Теризморга велев, Ковылкинань райононь Кочелаевав, Кочкурбуень Вирь Тавлав, Отяжбуень Отяжеле посёлкав, Орданьбуень Орозбиев, Лямбирень ды Ромодановань районтнэс. Эрьва косо кортынек ломантнень марто, конат ёвтнесть кеняркстост ды мелявкстост, – ёвтнесь фильматнень продюсерэсь Е. Н. Антипкина.
Истя жо весе съёмкатнес ардтнесь Т. Т. Чекушова менеджерэсь. Валонзо коряс, проектэнь сёрмадомсто эзь арсеяк, кодат мельстуицят лисить ломантнень марто вастовоматне ды зяро минек культурань сюпавчинек! Ваныцятне несызь минек весе промыслатнень: карень кодамонть, кемень кевердеманть, викшнеманть, човалясто кодамонть, чувтосто керсеманть, раськень ярсамопелень пидеманть-панеманть ды седе тов.
Армянонь раськесь невтезель Саргсянонь семиянть вельде (вете эйкакшост, сисем нуцькаст). Паро мельсэ ёвтнесть Мордовиясо эрямодост, седе, кода тесэ вастызь, кода тешкстыть кенярксчист. Шокша велень эрицятне пурнызь перькаст весе нуцькаст, конат эрить Россиянь келес, энялдсть невтемс сынст фильмасо.
Сехте покш фильмась лиссь, чарькодеви, эрзятнеде ды мокшотнеде, сон моли часто ламо (весемезэ снимазельть 13 част!). Ды савсь аштемс эрьва пелькскенть кисэ, мезеяк илязо ёма, весень совавтомс кадратнес. Те покш тевенть топавтсь вейке операторось Кирилл Киреев.
Кода неемс фильматнень миненек? Васня сынь невтевить НТМ телеканалсо. Нолдавить «Наследие» аудиовизуальной энциклопедиянь флеш-картат, сынь явшевить тонавтомань ды культурань учреждениятнева. Мезе парось, фильматне путовить Интернетс, сынь невтевить весенень Ютубсо.
Татьяна Маторкина