Четверг, декабря 08, 2022
Важное

Сундерьковонь 17-це чистэ Республикань Культурань кудосо ютавтовсь лия енов а молиця концерт – Мариуполень эстрадно-симфонической оркестрань музыканттнэ невтизь Мордовиянь ваныцятненень «Попурри из Донбасса!» программанть. Республикань эрицятнень марто вейсэ паронь теемань концертсэнть ульнесь Мордовиянь Прявтось Артём Здунов.


Мариуполень эстрадно-симфонической оркестрась - Донецкой государственной академической филармониянь сехте од коллектив. Теезь ДНР-нь Культурань министерстванть ушодксонзо коряс, оркестрантень совасть Мариуполень шкинемав музыканттнэ, ошонть украинань националисттнэнь эйстэ олякстомадонть мейле.

Россиянь од регионсто инжетненень пшкадемстэ Артём Здунов мерсь: «Минь пек куватьс тынк учинек! Аволь умок те сценанть лангсо ульнесь «Донбасс» морамонь ды киштемань государственной академической ансамблясь. Течи покш мель марто кунсолосынек тынк композициятнень».

Мордовиянь Прявтось ледстизе, ней минь эрятано истямо шкасто, зярдо вельмевтевить емавтозь сюлмотне, одс ушодтано вейкень вейкень марто содавтомо. Мариуполень музыканттнэнень пшкадемстэ сон мерсь: «Ней минек «Отечество» ансамблясь тынк енкстнэсэ, кепеди минек боецтнэнь ежост – арсетяно тенст уцяска! Минек культурань сюлмотне а сезевить, сынь пингеде пингес. Сюкпря тынк смелчинть кисэ, те уцяскань полавтыця шкастонть миненек самонть кисэ!» Артём Здунов эште весть евтась сюкпря артисттнэнень республикань весе эрицятнень пельде ды макссь Мариуполень эстрадно-симфонической оркестрантень Благодарственной серма.

Васенцекс сценанть лангс лиссь Мордовиянь коллективесь – Сураевень-Королевонь лемсэ «Келу» государственной фольклорной ансамблянь артисттнэ. Донбассто инжетнень вастызь «Благопожелание. Шумбраста» моросонть, вейке морыцясь кандсь эрзянь-мокшонь шумбракши Мариуполень коллективень дирижеронтень Василий Шакуленень.

Концертэнть панжомсто ветицясь мерсь: «Течи ламось тееви васенцеде. Минь васенцеде сынек Саранскоев, Мордовия Республикань прявтошов, минек оркестрась васенцеде вети гастрольть Россиясо, васенцеде минь лемдтяно Тынк, минек вечкевикст, соотечественникекс!»

Донецкой государственной академической филармониянь Эстрадно-симфонической оркестрань гастролень туронть анокстызь Росконцертэсь ды Россиянь Федерациянь Культурань министерствась «Мы – Россия» федеральной программанть лувсо.

Гайгсть кеменде ламо музыкань композицият. Алкуксонь классика - – Бетховен ды Хачатурян, «Земля Санникова», «Свой среди чужих, чужой среди своих», «Сибирский цирюльник», натой «Бриллиантовая рука» ламотненень вечкевикс фильматнестэ мелодиятне ды лият.

Меельцекс Донбассто артисттнэ евтасть сюкпрянь валт: «Сюкпря лембе вастоманть кисэ, те сценанть кисэ, гайгеманть ды валдонть кисэ, Тынк мизолдоматнень ды цяпамотнень кисэ! Минь – Россия!»
«Минь пек куватьс тынк учинек!»
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».