Четверг, декабря 08, 2022
Важное

Ноябрянь 10-11-це читнестэ Саранскойсэ ютась РФ-нь Финнэнь-угрань раськетнень интеллектуальной творчествань регионъютконь фестивалесь.

Промксонь ютавтыцякс кармасть РФ-нь Раськетнень тевест коряс федеральной агентствась, РФ-нь Финнэнь-угрань раськетнень ассоциациясь. Кавто чинь перть эрьва кодамо ёнкссто сазь инжетне важодсть поэзиянь ды прозань творчествань коряс мастер-классо, ушодыця поэттнэ ды писательтне тонавтнесть теемс эсест произведениятненень рузонь кельс литературно-художественной ютавтома.

Фестивалентень сакшность финнэнь-угрань ды самодийской раськетне: эрзят ды мокшот, вепст, карелт, комить, коми-пермякт, мансить, мариецт, ненецт, саамт, сету, удмуртт, финнт, хантыть. Те – Марий Элстэ, Удмуртиясто, Комистэ, Чувашиясто, Омской областьстэ, Пермень крайстэ, Московонь ёнкссто, Мурманской, Нижегородской областтнестэ, Московсто, Санкт-Петербургсто, Ханты-Мансийской ды Ямало-Ненецкой автономной округтнестэ.
Те промксонть вельде арсеви кастомс-виевгавтомс раськетнень этнокультурной, духовной, интеллектуальной ёнксост, муемс ёроков авторт.

– Минек масторонь сюпавчись ды лия ёнов амолемась – те вейсэ ояксчисэ эриця ламо раськеть, малав 200 раськеть. Сень лангс апак вано, покш раськесь эли вишкине, эрьванть эсензэ историязо, культуразо, коензэ-кирданзо. Ды, нама, эрьванть ули раськень литературазо: сюпав, лия ёнов а молиця, эрявикс, смустень кандыця. Эрьва раськесь чачтсь-кастсь содавикс писательть, поэтт ды драматургт. Сынст ютксо улить классикть, улить неень шкань паро ды виев авторт. Ризнэвти, меельце шкасто келень содыцятне аламолгадыть, кить маштыть вадрясто сёрмадомо, истя жо аламо. Ансяк те а корты седе, што арасть валдосто палыця тештеть, ёроков ломанть. Сынь ульнесть, улить ды кармить улеме, – кортась РФ-нь Федеральной Собраниянь Федерациянь Советэнь сенаторось, РФ-нь АФУН-нь прявтось П. Н. Тултаев.

Лембе вал марто пурнавозтненень пшкадсь МР-нь Культурань, национальной политикань ды архивень тевень министрань васенце полавтыцясь А. И. Карьгин.
Мельстуиця кортамо анокстасть Московонь М. Горький лемсэ Литературной институтонь доцентэсь, критикесь, лия кельс ютавтыцясь В. Г. Пантелеева, Марий Элэнь поэтессась, ютавтыцясь А. П. Иванова, педагогической наукань докторось, профессорось, МР-нь Правительстванть юрсо гуманитарной нукань НИИ-нь научной сотрудникесь А. М. Каторова. Раськень литературатнесэ улить ламо стакачить, теде кортазельгак сцена лангсо. Тиринь келень ды литературань уроктне киртявсть, автортнэнень стака нолдамс эсь книгаст, кода анокстамс литературной кадрат, саемга, кельстэ кельс ютавтыцят, кода содавтомс лия ёнкссо эриця ловныцятнень раськень литературанть марто. Чарькодеви, од литератортнэнень, кить сёрмадыть тиринь кельсэ, эряви максомс государственной лезкс. Фестиваленть ютамодо мейле арсеви нолдамс те промксонь участниктнень произведениянь вейспурнавкс.

Вал максовсь инжетненень. Од ломантне мельспаросо ловность тиринь кельсэ произведенияст ды рузонь кельс ютавтовксост. Седе тов литературань фестивалев пурнавозтне явновсть группава ды сынст туртов ютасть семинарт ды эсь произведениянь ютавтомань коряс мастер-класст.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».