Учовсь таго вейке Од иесь. Сон совась эрьва кудос. Зяро кецнемат, зяро кеняркст ды паро ёжо сон кандсь весень туртов! Весемеде пек, нама, кецнесть эйкакштне. Сыненст, окойники, учовсть Якшаматянть ды Ловняськенть пельде казнетне.

Эйкакш ладсо кецнесть покштнеяк. Родня-ялга марто вастовомат, вейке-вейкень каванямот, киштемат, морамот. Васня кудосо, вейсэнь столь экшсэ. Мейле кеняркстнэ поладозельть ушосо, косо весень туртов ульнесь ков молемс. Васняяк, нама, вейсэнь кузонть ваксс. Кода свал, Саранск ошсо сындест стявтозельть зярыя. Ды вейкесь омбоцеде мазый. А стяко Од иенть ды Роштованть перька шканть ловить ёвксонь шкакс.

Эрьва кода мазылгавтнезельть куротнеяк. Ков иля варшта, эрьва кодамо тюссо цитниця рисьметь, тештинеть, эрьва кодат някат-налкшкеть. Чокшне ланга те мазычись седеяк каяты сельмс. Эрьва косо палыть мазыйстэ цивтёрдыця толнэть, менелев ливтить толверьгедевкст.

Седеяк парсте мазылгавтнезь сеть таркатне, косо ютавтневить Од иентень ды Роштовантень алтазь концерттнэ. Светотехстройсэ истямо таркакс кочказь Коваленко лемсэ курось. Неть читнестэ тосо свал ульнесть ломанть. Весемеде ламо пурнавкшность Од иенть каршо ды Роштовасто, январень 7-це чистэ, зярдо весень туртов невтезельть покш концертт. Сынст анокстызь «Луч» Культурань кудонь артисттнэ. Сеть чокшнетнестэ Коваленконь курось гайгезь гайгсь мазый моротнеде ды киштематнеде. Кецнесть покштне, седеяк пек элякалесть эйкакштне. Веенст киштсть, налксесть. Омбонст кирякстнесть конькасо, ардтнесть алашас кильдезь нурдынесэ, паровозкесэ.

Роштовань тешкстамо

«Ламзурь» ансамблянть туртов Роштовань вастовоматне ушодовсть январень 5-це чистэ, зярдо тердезельть А. С. Пушкин лемсэ раськень библиотекав, косо вана уш зярыя иень перть ютавтневи «Роштовань кудось». Тедедеяк те коесь апаколь кола. Библиотекань ловныцятнень туртов невтезель, кода тешкстасть Роштованть эрзянь велетнесэ седикеле.

Калядамо моротнеде башка ваныцятне киштсть, налксесть, варчнесть виест ды ёрокчист эрьва кодамо пелькстамосо, яжасть пря содамоёвкс лангсо. Весе неть тевтнень тееме сынст кармавтсь Роштова бабась (налксицясь Р. С. Зорькина), кона седикеле яксиль сеть таркатнева, ков пурнавкшность од ломанть. Роштова бабась ваныль, мезес тонадсть ютазь иенть перть од цёратне ды тейтертне. Кить эзть машто паро ладсо невтеме пряст, сетнень мурнилинзе, а вана сетненень, кить маштыльть викшнеме, кодамо, лия тевень топавтомо, – шнамонь валт ёвтыль ды казнеть казиль. Ютазь вастовомасонтькак ламот тусть аволь чавонькедть, Роштова бабась явшесь кинень книгат, кинень – моро марто дискт. Тень кувалма мельспаросо кадовсть покштнеяк, вишкинетнеяк.

«Тештетнень валдост ало»

Кенярдозь ды моразь, вастызь Роштованть Иоанн Кронштадтскоень храмов озномо якицятнеяк. Те храмось ашти Солнечной куросо. Эрьва иестэ тесэ седейшкава анокстыть те кенярксчинть вастомо. Панить-пидить прякат-сюкорот, лия тантей каванявкст. Якшамонть эйстэ а кельмемадо лакавтнить пси чай.
Январень 8-це чистэ тезэнь таго пурнавкшность ламо ломанть. Весень пек покшоль мелест таго кунсоломс морот, конатнень тенст, кода ютазь иетнестэяк, казизь «Луч» Культурань кудонь артисттнэ.
Концертэсь поладозель эйкакштнень марто налксемасо.
Вастовоманть эйстэ кадовсть паро ёжосо весе пурнавозтне.

Раиса ЩАНКИНА