Пятница, февраля 23, 2024
Важное

Минь уш а весть сёрмалинек Челяба ошонь эрицядонть, эрзянь тейтерденть Ольга Лысенкодо, кона сайсь покш мель вейсэндямс Южной Уралонь весе эрзятнень ды мокшотнень.
Ютазь иень декабрясто сон сакшнось Мордовияв, вастовкшнось Мокшонь ды эрзянь раськетнень регионъютконь вейсэндявксонь прявтонть Юрий Мишанин марто, кортнесь седе, кода ушодомс эсь тевенть. Аволь умок тейтересь Челяба ёнкссо панжсь «Иненармунь» мазый лем марто мокшонь ды эрзянь раськень культурань центра. Ды шкань апак таргсе ушодсь анокстамо од мероприятият.

Неть оймсема читнестэ тосо ютавтозельть эрзянь ды мокшонь культурань чить, козонь сакшность Мордовиясто весенень содавикс эрзянь морыцясь Артём Мамаев ды баянсо седицясь, морыцясь, мокшонь цёрась Сергей Фудин. Ольга Лысенко ёвты тень кувалма покш сюкпря морыцятненень ды Юрий Александрович Мишаниннэнь. Неть вастовоматне ютавтозельть сонзэ лезксэнзэ вельде. Субутасто Копейск ошонь Потанино велень Культурань кудосо ютась «Оймень туртов морот» концерт, козонь пурнавкшность ламо эрицят, конатнень ундоксост эрзянь эли мокшонь, ды «Иненармунь» НКЦ-нь ялгатне-оятне. Цёратне Артём Мамаев ды Сергей Фудин морсесть колмо кельтнесэ: рузокс, эрзякс ды мокшокс. Артёмонь ламот уш содасызь, сон омбоцеде Челябасо инжекс. А Сергей весень дивавтынзе седямосонзо. Цёратне эзть пелезеве васоло килангодонть, сынь эрьва пшкадемантень явить мель: морсить покш сценасояк, вишка велесэяк. Алкуксонь патриотт! Ламот ваныцятнестэ эзть кирдеве ды лиснесть киштемеяк. Культурань кудонь прявтоськак Анна Бояркина мокшавась мельспаросо вастызе Ольга Лысенконь мелензэ пурнамс истямо концерт сынст велесэ. Те шкас тейтерентень сыть сюкпрянь валт истямо паро вастовоманть кисэ.

Омбоце чистэнть Артём Мамаев ды Сергей Фудин од ломантнень туртов Челябань областной библиотекасо ютавтсть морамонь коряс мастер-класст. Сынь морсесть вейсэ «Доброе кино» актёронь студиянь эйкакштнень марто, вейсэ тонавтнизь «Кавто цёрат тикше ледить» моростонть припевенть, ванызь эрзянь оршамопелень невтеманть ды Мордовиядо презентациянть, конанть ютавтызе Людмила Круглова эрзявась. Те студиянть марто, конанть прявтсо Ольга Борисовна Малахова, Раськень культурань центрась уш снимсесь «Эрзянь свадьба эйкакшонь сельмсэ» фильма.

«А ёвтавить весень лемест, конатне лездасть тенек раськень культурань читнень ютавтомасо. Ютксост – татарт, рузт, башкирт, эрзят, мокшот. Концертэнь сценариенть ды ветямонть кисэ сюконян Екатерина Гатиятуллинанень. Кенярксчинть вейсэ мартон явизь Челябань татаронь конгрессэнь прявтось Луиза Алмаева, «Центр народного единства» МКУ-сто Сергей Бредихин, Наталья Лисевская, Регина Мухаметова, Карталы ошсто эрзявась Екатерина Зенченко. Весень туртов те ульнесь покш чи. Эдь минек куншкакуронть васенце мелезэ – эрямс ялгаксчисэ, вейсэндямс ды невтемс минек покш масторонь раськетнень культурань сюпавчист ды коест-кирдаст», – тешкстызе меельцекс «Иненармунь» НКЦ-нь прявтось Ольга Лысенко.

Марина Девятова
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».