Республикань эйкакшонь библиотекасо ютась «Ёвксонь кедьсэ инжекс улемстэ» Од иень кенярксчи. Тов тердевкшнесть Донбассонь эйкакштне, нужачисэ эриця семиянь эйдетне, Ялгань эйкакшонь школань-интернатонь, Саранскоень лавшосто мариця эйкакшонь школань-интернатонь тонавтницятне.
Сынст туртов Покш Березникбуень культурно-досуговой центрань «Лукоморье» някань театрась невтсь «Чаула верьгиз» путовкс. Сонзэ авторось – МР-нь заслуженной поэтэсь Г. С. Гребенцов. Геннадий Сергеевич Эйкакшонь библиотеканть туртов теевсь паро ялгакс. Сон мельспаросо сакшны вастовомо вишка ловныцятнень марто, казни книганзо, содавты од сёрмадовксонзо марто, писателесь сёрмады эрзянь ды рузонь кельтнесэ.
Вастовомасонть инжетненень лембе вал марто пшкадсть Эйкакшонь библиотекань научной тевень коряс прявтонь полавтыцясь С. А. Грибова, МР-нь Писателень союзонь правлениянь прявтось, поэтессась Т. П. Швецова ды лият.
Саранскоень 80 № эйдень кужонь тонавтницятне ловность Гребенцовонь стихть. Эйкакшонь музыкальной школань-интернатонь тонавтницясь Софья Кажаева кецявтынзе весень «Снежные звёздочки» моросо (валтнэ Г. Гребенцовонь, музыкась – Н. Кошелевань), тензэ седясь А. Н. Гурьянов тонавтыцясь. Теледе ды Роштовадо зярыя морот казсь МР-нь народной артисткась, РФ-нь заслуженной артисткась Нина Спиркина.
Седе тов эйкакштнень туртов невтезель «Чаула верьгиз» ёвксось-пьесась, косо ульнесть вирень ракшатне ды нармунтне. Прявт героесь – вачо ды пиштяка верьгизэсь. Спектаклясь тонавты эйкакштнень, кода ветямс прянть, кодамокс улемс ломантнень ютксо.
Меельцекс Г. С. Гребенцов казсь библиотекантень покш някат (ростовой куклат), конатнень марто мереви ютавтомс эрьва кодат мельстуиця кенярксчить.
Те вастовоманть ютавтыцятне: МР-нь Культурань, национальной политикань ды архивень тевень министерствась, Эйкакшонь библиотекась, МР-нь Писателень союзось, МР-нь Журналистэнь союзось, А. И. Полежаев лемсэ музеесь.
Татьяна Маторкина
Фототне
Эдуард Ретунскиень