Пятница, февраля 03, 2023
Важное

Январень 20-це чистэ Республикань Культурань Кудосо ульнесь «VARMA» этно-арт-театрань невтемась. Те чокшнестэнть региононь прявт ошось теевкшнесь мазычинь лия ёнов а молиця куншкакурокс.  Невтемантень якась Мордовиянь Прявтось Артём Здунов.

 

Этно-арт-театрань теемань прявт аравтлувокс ашти этнокультурной сюпавчитнень вельмевтемась, ванстомась ды виевгавтомась. Важодемась ветяви этнической смусть марто неень шкань оршамотнень, мазылгавтомапельтнень арсемань-теемань ёнкссонть. «Вармань» арт-композициятне уш невтезельть раськеютконь ламот проекттнэсэ ды шкинемань программатнесэ. Коллективесь – модань фестивальтнень ды пелькстамотнень призёр ды лауреат, аволь весть навтизе республиканть весероссиянь ды раськеютконь покш мероприятиятнесэ. Этно-арт-театрась ульнесь РФ-нь Федеральной собраниянь Федерациянь Советсэ Мордовиянь читнень невтемасонть, ёвтазь сехте виевекс Казаньсэ Раськетнень ялгаксчинь фестивальсэнть, изнясь Нижний Новгород ошсо ютавтовиця «Матрёшка» модань раськеютконь недлясонть, ульнесь Московонь модань недлясонть.

МР-нь культурань заслуженной важодицянть Татьяна Сидоркинань театрась башка мель яви этномодань престижень кастомантень, од дизайнертнэнень-модельертнэнень, артыцятненень ды декоратортнэнень лездамонтень.

Те чокшнестэнть путозель лия ёнов а молиця пек мазый невтема, конась кармась модельертнэнь, хореографтнень ды вокалисттнэнь вейсэнь важодемакс. Коллаборациятнесэ ульнесть «Торама» ды «Мерема» Мордовиянь фольклорной содавикс коллективтне. Образтнэсэ вейсэндявсть арсематне ды эрзянь-мокшонь культурань кезэрень башка ёнкстнэ.

«Кенярдовты, тень теить минек од ломантне – теньсэ неяви тиринь масторонтень, раськень оршамопелентень, келентень, моронтень вечкемась. Сыньсэст минек вандынь чинек. Аволь эрьва ошсо ули модань алкуксонь театра. Ды аволь эрьва ошсо ули этнотеатра. Те минек изнявксонок, секскак карматано виевгавтомо те ёнксонть», – мерсь Артём Здунов.

«Те стака шкастонть миненек лезды Россиянь культурань кодонть лангс, минек ламо раськень масторонь эрицятнень культурань кодтнэнь лангс нежедемась. Сынь лездыть тенек молемс икелев, эрямс ды кенярдомс минек пек вадря моданть лангсо», – тешкстызе Нижний Новгород ошсто инжесь, дизайнерэсь Ольга Парле.

«Те ансяк ушодкс!» – мероприятиянть прядовомсто кемевтсь «Варма» проектэнь руководителесь Ирина Белякова.

Фототне

Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».