Ноябрянь 14-це чистэ А.С. Пушкин лемсэ Раськень библиотекань актовой залось пешксель ломанде. Тесэ ютавтозель «35 иеть эрзянь келенть марто» лем ало шкинемань чокшнесь, конась алтазель Римма Дмитриевна Жегалинанень.
Римма Дмитриевна Жегалина – алкуксонь эрзянь ава. Ламот сонзэ содасызь, кода тиринь келень ванстыця, раськенть кисэ мелявтыця ды вечкиця ломань. Алкукскак, эрзянь авась ламо мезе теи минек келенть ды раськенть туртов. Ламо шкань перть важодсь эйкакштнень марто, тонавтсь эйсэст вечкемс келенть, а виздемс кортамс эйсэнзэ.
Эряви меремс, аванть важодемазо эзь ема стяко, неень шкане Римма Дмитриевна – РФ-нь общей образованиянь почетной важодиця, МР-нь заслуженной учитель, МР-нь Национальной политикань министерстванть пельде казезь «Гордость нации» почетонь тешкссэ. Сон нейгак а соды оймамо, яла важоди келенть ванстомга: вети социальной сеттнесэ эрзянь келень курот. Тосо сон содавты весе лиятнень минек раськенть марто. Кодат улить мазый валонок, косо кодамо кенярксчи ютась эли карми, кить минек содавикс ломантне, косо гайгсь од моро – весемеденть сон пачти. Россиясо ды лия масторсо эриця эрзятне апак лотксе евтыть тензэ сюкпрянь валт. Ламотне кель эзть тонавтне, кинь жо покштяст-бабаст эрзят, сынсь мезеяк а содыть. Весенень паро валсо, превс путомасо лезды Римма Дмитриевна.
Шкинемань чокшнесь ютась вейке лекстямосо. Тов пурнавкшность Римма Жегалинань малавикс ломанензэ, ялганзо ды лездыцянзо. Библиотекань важодицятне анокстакшность вадря выставка, косо невтневсть Р. Жегалинань книганзо, журналсо ды газетасо сондензэ сермадовкстнэ.
Кенярскчинть панжизе сонсь Римма Дмитриевна. Сон евтась сюкпрянь валт инжетненень ды казнекс невтсь зярыя видеофильмат, конатнень вельде пачтясь пурнавозтненень эсь эрямонь ды важодемань кидензэ, тиринь келенть ды раськенть вечкемадонзо.
Инжетненень паро казнекс ульнесь Саранскоень 59 № эйдень кужонь школав анокстамонь группань эйкакштнень Римма Жегалинанань стихензэ етнемась ды эрзякс ютавтозь моронзо морамось. Виев цяпамосо ваныцятне вастызь «Пизелнэ» Покш Игнатбуень ансамблянть, седе тов морась «Ламзурь» фольклорной морокурось. Лембе валт пурнавозтненень евтась А. Полежаев лемсэ музеень научной сотрудникесь Галина Евстигнеева.
– Римма Дмитриевна – сырнень ломань. Мон сюконян Пазонтень, мекс эрямонь кинть лангсо вастовинь те эрзянь аванть марто. Минь мартонзо оят уш ламо иеть. Сон свал лаки тевсэ, анок лездамс куш мейсэ, те ломаненть покш путовксозо республикань культурантень, – кортась Галина Евстигнеева.
Истя жо поздоровонь валт евтась Римма Жегалинань умонь ялгазо, эрзянь сермадыцясь Геннадий Гребенцов. Сон ледстнесь, кода сынь теевсть содавиксэкс Римма Дмитриевна марто, зяро покш ды эрявикс тевть тейсть эрзянь келенть ды культуранть ванстомга.
Седе тов кортась Эрзянь-мокшонь раськень регионъютконь общественной вейсэндявксонь Исполкомонь прявтось Татьяна Ларина. Сон тешкстась, истят ломанть, кода Римма Дмитриевна масторлангсонть кадовсть пек аламо. Сон алкуксонь патриот. Эрямонзо перть топавты покш ды виде тевть.
Мероприятиясь ульнесь истямо лембекс ды мельстуицякс, эрьвась марясь прянзо, прок, тиринь кудосо.
Алена Артемьева
Фотось авторонть.