Монь койсэ, весе вечкить мазый кедьёнкст, лия ёнов а молиця теевкст, конатне кепедить меленть ды паролгавтыть ёжонть. Кие-бути истямо мазычинть вечки ванкшномс, лиятне жо сынст арсить-теить. Меельце шкастонть эрьва кодамо выставкасо-фестивальсэ эсь ёрокчинть кедьчелькев ломантне невтить пек келейстэ. Вана аволь умок ютавтовсь «Тев» раськень промыслань ды ремеслань регионъютконь фестивалесь.
Кодамо ансяк мазычи тесэ арасель: раськень викшневкст-кодавкст, коцтонь някат, понань лембе кемть, чувтосто теезь мазыйдеяк мазый кедьёнкст, сёвонень ды керамикань чакшт-вакант ды, нама, гигерень паргинеть-кептернеть. Самай гигеренть марто важодиця кедьчелькев ломанденть минек ули меленек тыненк ёвтнемскак. Уледе содавиксэкс ёроков мастерэнть Сергей Николаевич ГВОЗДИКОВ марто.
Сергей Гвоздиков чачсь-кассь Отяжелень райононь Сабанцеле велесэ, тосо жо прядызе школанзо. Эштё эйкакшпорасто сонзэ ульнесь бажамозо керсемс чувтосто. Те мелесь эйзэнзэ чачсь, зярдо цёрынесь якась экскурсияв Саранскоев С. Д. Эрьзя лемсэ музеев. Ине скульпторонть произведениятне кеместэ совасть Сергеень мельс-превс, ды цёрынькась кармась лаксеме-керсеме чувтосто эрьва кодат фигуркат. Тевесь мольсь а шождасто, эдь тень коряс кодаткак содамочинзэ Сергеень арасельть, ансяк пек покш бажамозо ульнесь – тонадомс васняяк куш чувтонь пенчень, вишка сазорканзо туртов налкшкень керсеме.
Школасо Сергей Гвоздиковонь ёрокчинзэ куроксто редизь, ды тонавтыцятне кортызь молемс седе тов тонавтнеме Н. П. Огарёв лемсэ МГУ-нь национальной культурань факультетэв. Цёрась истя тейськак. Тонавтнеме кармась декоративно-прикладной ёнкссонть. Сергеень сехте вечкевикс предметэкс тосо теевсь «чувтосто керсемась», ды сон нейгак ёвты покш сюкпря тонавтыцятненень, конатне чувтосто керсемань сяткиненть кирвазтизь покш толокс.
Университетэнть прядомадо мейле Сергей велявтсь эсензэ районов, аламошкас важодсь трудонь тонавтыцякс Козловка велень школасо, мейле кармась ветямо чувтосто керсемань кружок Отяжелень Эйкакшонь творчествань кудосо.
– Университетсэ тонавтнинь покш мельсэ, – корты Сергей Николаевич. – Васенце ниле иетнень перть эсь ёрокчинть варчнинь эрьва ёнкссонть: важодинь сёвоненть, чувтонть марто, явинь мель викшнемантеньгак, артомантеньгак. Ды ансяк ветеце курссо эрявсь уш кочкамс специализациянть. Кочкия керамиканть. Дипломомгак ульнесь тень коряс. Идия сонзэ «ветес».
Ансяк, кода седе сеедьстэ эрси од ломантнень марто, керамикантень мельявомась куроксто лепамсь. Ды, Отяжелень райононь Козловкань школасо трудонь тонавтыцякс эсь важодема кинть ушодозь, од специалистэсь варчизе чувто ланга керсеманть.
– Кезэрень пингестэ саезь ломанесь аноксты эрьва кодат кедьёнкст, ды бажи сынст теемс аволь ансяк тевсэ маштовицякс, истя жо мазыекс, – тешксты кедьчелькевесь. – Теевкстнэнь туртов материалокс лади весемесь, мезенть максы модась ды пертьпельксэсь: кевесь, сёвонесь, чувтось ды седе тов.
Сергей Гвоздиков кода ушодсь чувтонть марто важодеме, материалонтькак кармась эсензэ туртов анокстамо сонсь. Вирь чирева-кува чувтонть пилямодо мейле кадовить мукорть, конатне эрявитькак мастерэнтень. Сон сынст лангсто пурны гигеренть, вачки сонзэ летькень а токиця таркас ды иеде седе кувать кости эйсэнзэ. Сергей Николаевич седе сеедьстэ керси эсь произведениянзо килейстэ, пекшестэ, пичестэ ды сынст кертнестэ. Лиясто тевс нолды эсенек ёнкссо касыця чувтот ды куракшт: слива, тумо, варчни материалонть кемечинзэ.
– Неень шкасто лавкань лавсятнень лангсо пек ламо мазыйдеяк мазый эрьва кодат теевкст. Мезе ансяк а муят ды а неят! Ансяк сынь весе фабрикань теевкст ды а кандыть ломантненень сынст теицятнень оймень лембест. Кедьчелькевтнень теевкстнэ жо васня чачить теицянть превсэ-оймесэ, ды анокстамстонзо эйзэнзэ путови седейлембе, – тешксты Сергей Гвоздиков.
Эсензэ роботанзо мастерэсь невтни эрьва кодамо выставкасо ды мероприятиясо, конатне ютавтневить аволь ансяк Отяжелесэ, истя жо целанек Мордовиясо. Сергей Николаевич – «Шумбрат, Мордовия!» фестивалень декоративно-прикладной творчествань свалшкань участник, зярыяксть ульнесь те фестиваленть лауреатокс. Сонзэ казнетнень ютксо дипломт «Плетёные фантазии» республиканской декоративно-прикладной творчествань выставкасто, «Радуга талантов» райононь пелькстамосто.
Кода корты те кедьчелькев од ломанесь, эсензэ теевкстнэнь сон лиясто арсесынзе сонсь, лиясто неи кодамояк эскиз Интернетстэ ды совавты эйзэнзэ эсензэ арсемат.
Эрьва теевксэсь – кинь-бути эрямосто саевкс, кодамо-бути тевде ёвтнема. Кода мерсь Сергей Гвоздиков, эрьва роботасонть прявтось – невтемс обуцянть, ёрокчинть.
– Сюжеттнэ превсэть лисить киньгак ёвтнемасто, эли лиясто Интернетсэ мезеяк сельметь икелев понги, сеске прясот чачи од арсевкс. Эряви теемс аволь мезе понгсь, эйсэнзэ улезэ кодамояк смусть, – кемексты кедьчелькевесь.
Кодат ансяк теевкст-арсевкст а лиснить Гвоздиковонь кедь алдо: пенчть-вакант, кедьгеть, сувенирт, салдырькст, сурсеметь, сёрмадома ручкат, апокш скульптурат, пазавань уголнэть, зеркалань мазылгавтомапельть, ведьлазт, картинань туртов багетт, стулт, Инечинь алнэть, ленгестэ пряс путомат, пильгес тонгомат, гигерьстэ паргинеть-кептернеть, меельце шкасто башка мель яви някинетненень-ванстыцятненень ды тейтерь-аватнень туртов мазылгавтоматнень теемантень. Мордовиянь инжетнень туртов Футболонь коряс масторлангонь чемпионатонть шкасто тейнесь чувтонь магниткеть, козонь сёрмалесь эрзякс поздоровт: «шумбрачи», «сюпавчи», «вечкема» ды лият. Весе теевкстнэ а ёвтавитькак кодат, сынст, нама, эрявить неемс ды ванкшномс-токшемс. Выставкатнесэ Сергеень теевкстнэ свал муить эстест азорт. Мастерэсь лиясто арты-керси эсензэ произведениятнень лангс тиринь Сабанцелень эли Отяжелень лементь, кадык весе содыть, косто сонзэ ундоксонзо.
Эряви меремс, ламот выставкатнесэ, фестивальтнесэ ды пелькстамотнесэ мастерэсь невти аволь ансяк эсь шкинеманть, истя жо сонзэ тонавтницятненьгак, конатне эсь теевксэст марто сеедьстэ лиснить изницякс.
– Важодемс дополнительной тонавтнемань ёнкссонть ды школасо тонавтыцякс, те овсе аволь вейке, – корты Сергей Николаевич. – Урокось сон эрьва эйкакшонть туртов, тов эряви молемс. Кружокс эйкакштне якить эсь мелень коряс. Важодемантень жо, монь койсэ, эряви тонавтомс эрьва эйкакшонть. Эдь зярдо эйкакшось роботы кедьсэ, сон арси, виевгавты эсь логиканть, чарькодьксчинть.
Пертьпельксэнь сюпавчитнень тевс нолдазь, Сергей Николаевич ремесланть вельде лезды эйкакштненень сынст шкинеманть ды ёрокчинть панжомасо. Мастерэсь тонавты инструмент марто важодемантень, ёвтни эрьва чувтонть тевс нолдамонь ёнкстнэде ды сонзэ марто важодема лувдонть. Лиякс меремс, тонавты неемс ды чарькодемс мазычинть ломантнесэ, эрямосонть, пертьпелькссэнть, тонавты ванстомс те мазычинть.
– Покш мельспаро, монь ды тонавтницян важодевкстнэ ламолгадыть иестэ иес, ней сынь содавикст весе масторонть келес. Ломантне рамсить сынст казнекс малавиксэст ды ялгаст туртов, кенярдовтыть эйсэст эсь эйкакшост. Видьстэ мерян, мон вечкса эсень тевем! Ды пек паро, теевксэнь кандыть кеняркс ломантненень. Лисни, мон, кода творческой ломань, тонавтыця, кочкинь эстень паро тев ды молян виде киява, – кемексты Сергей Николаевич.
Юлия Еремина