«Агропромсервис» ООО-сь пурназель-теезель 2005 иестэ «Мордовский» лишмень кирдема заводонть юрсо. Течинь чине хозяйствась важоди ламо ёнксонь коряс ды содавикс аволь ансяк эсенек республикасо, томбалеяк. Тесэ кастыть сюро, ламбамо якстерькай, трить ракшат, важодить ловсонь ды сывелень нолдамонь коряс.
Хозяйствасонть 7 тёжадо ламо гектартнэнь лангс видневить сюро ды ламбамо якстерькай. Техникась тесэ одкстомтозь, роботась ветяви од технологиятнень тевс нолдазь. Меельце зярыя иетнень перть «Агропромсервисэсь» сайни васенце таркат «Союз сахаропроизводителей России» пелькстамосонть якстерькаень кастыця предприятиятнень ютксо. Хозяйстванть прявтсо ашти опытной аграрникесь, эсь тевенть вадрясто содыця ломанесь Владимир Ильич НУЖНОВ.
Веленть марто сонзэ сюлмавозь весе эрямозо. Колхозсо весе пингест перть роботасть тетязо-авазо ды те тевенть полады сонськак. Секскак вадрясто содасы, мезе те истямось мода лангсо важодемась.
– Модась а вечки нузякст, мельде-валдо важодицят. Сонензэ эряви явомс мель, путомс ойме. Сестэ сонськак паросо панды, – тешксты Владимир Ильич.
Ней предприятиясонть, кода республикань велень лия хозяйстватнесэяк, «пси» шкат. Тесэ прялить тундонь видемань тевтнень. Кода ёвтнесь Владимир Нужнов, те иестэ сюротнень алов сынст явозь 7216 гектарт мода. Яровой сюротне весе видевсть, неть читнестэ прядызь ламбамо якстерькаенть видеманзо.
– Тедеде видинек 4907 гектарт яровой сюрот, – корты Владимир Ильич. – Тесэ 2000 гектарт – шуж, 382 гектарт – товзюро, истя жо видинек пинеме, кснав, сюрокс ды силосокс кукуруза, ликша. 1800 гектарт максозь ламбамо якстерькаенть алов. Сёксня видезельть озимой сюрот.
Истя жо «Агропромсервисэнь» прявтось тешкстызе, ней видемань тевтне молить седе куроксто, шкань апак таргсе, бути пертьпельксэсь максы. Теньсэ пек лездыть важодемасо нолдавиця од технологиятне ды неень шкань вадря техникась.
Од техникась – васенце таркасо
Михаил Сергеевич КОЗЛОВ «Агропромсервис» ООО-со важоди механизаторокс уш колоньгемень кото иеть. Меельце кавто иетнестэ весе тевтнень хозяйствасонть теи неень шкань од техникасонть. Ды тень коряс ашти покш мельспаросо.
– Нама, 36 иетнень перть важодинь эрьва кодамо тракторсо-машинасо ды велень хозяйстванть туртов агрегаттнэсэ, – корты Михаил Козлов. – Мерян, берянь техника хозяйствасонок арасель, меельце шкастонть жо сон одкстомтови эштёяк сеедьстэ. Тень кисэ покш сюкпря минек прявтонтень Владимир Ильичнень. Сон од полавтоматнень мельга ваны пштистэ.
Зярдо ульнинек хозяйствасонть, Михаил Козлов видсь ламбамо якстерькай. Сонзэ тракторось, Massey Ferguson, омбо масторонь ды пек вадря, эйзэнзэ понгавтозь Tempo R видемань агрегатоськак «превей», важоди информационной технологиятнень вельде. Видемань агрегатсонть кемгавксово секцият, мезесь лезды весть ардомсто сеске видемс ламбамо якстерькаень кемгавксово рядт. Агрегатсонть ули Глонасс ды сон пештязь электроникадо, мезесь лезды ладямс важодеманть видемань агрегатонть, тракторонть ды трактористэнть ютксо. Кода мерсь Михаил Козлов, эстеть рулентькак кирдемс а эряви, тракторось моли сонсь, бути ансяк паксянть прядовомсто велявтсак лия ёнов ды весе.
– Видемань агрегатось пек «превей». Бути тракторось мекскак туеви ве ёнов, аппаратось таркастонзояк а сырги, сон юты кемекстазь киванть. Тень коряс весе ряднэтне лисить видеть, чаво таркат косояк арасть ды, эряви меремс, видьметнеяк модас каявить вейкетьстэ. Тень коряс, видьмекстнэ лисить весе вешкасто ды вадрясто, – корты механизаторось.
Истя жо те агрегатось топавтозь удобрениятнень каямонь системасонть, мезесь пек эрявикс ёнкс. Лиякс меремс, агрегатось ламо ёнксонь ды эйсэнзэ видемс мереви аволь ансяк ламбамо якстерькаенть, истя жо эрьва кодамо лия культуратненьгак. Теке марто сонзэ эйсэ вейке сменас видевить 150-180 гектарт. Видемань лия агрегаттнэнь коряс, те колмоксть-ветексть седе ламо. Ды те, паряк, прявт ёнксось, эдь видемань шканть сон ламоксть седе кирти. Ды тевентькак седе шождалгавты.
Юлия Еремина
Фототне:
Эдуард РЕТУНСКИЙ