Пятница, марта 29, 2024
Важное

Аволь умок минек республикасо тешкставсь Велень хозяйствань ды перерабатывающей промышленностень важодицятнень чись. Торжественной промкссонть Мордовия Республикань Прявтось Артём Здунов тешкстызе, те иесь велень хозяйстванть туртов ульнесь а берянь, республикасонть пурназь пек паро урожай – 1,7 миллионт тоннат сюро. 

Истя жо пурназь пиже кснавонь рекордной урожай. Свалшкань касома невти ракшань кастомань отраслясь. «Мордовиясь масторонь келес саи васенце таркатнень алонь производстванть коряс. Вадрят невтевкстнэ ловсонь производстванть коряс. Редяви касома органической продукциянть нолдамонзо коряс. Эряви ёвтамс, те кевкстемась ашти РФ-нь Правительстванть вановтонзо ало, – мерсь республикань Прявтось. – АПК-нь ёнкссонть эрямос совавтовить зярыя од проектт. Те ламосо ливти отраслянть икелев. Ды теньсэ весемесэ покштояк покш путовксонк тынк – велень хозяйствань ды перерабатывающей промышленностень важодицятнень».

Вадря невтевкс марто те иенть пряды «Птицефабрика «Атемарская» ОАО-нь коллективеськак. Неть читнестэ предприятиясонть ютавтсть эсест кенярксчи, конась алтавсь Велень хозяйствань важодицятнень чинтень. Фабрикань важодицятненень ды ветерантнэнень поздоровт ёвтась «Птицефабрика «Атемарская» ОАО-нь прявтось Александр Валентинович Щемеров.

– Покш сюкпря ёвтан предприятиянь ветерантнэнень. Нармунень фабрикась теевсь аламонь-аламонь, пурнавсь кирьпецень кирьпець. Ламо иетнень перть сон теевсь кеме ды виев предприятиякс. Ды теньсэ покш путовксост весе прявттнэнь ды отраслянь ветерантнэнь, конатне тесэ важодсть. Покш сюкпря тенст, – мерсь Александр Щемеров. – Покш сюкпря ёвтан минек масторонь Правительствантень. Сонзэ программатнень вельде те иестэ раминек ламо эрявикс ды вадря техника, конась пек лезды минек предприятиянть касомасо-виевгадомасо. Сюкпря Мордовия Республикань руководствантень. Те иесь ламот ёнкстнэнь коряс а шождаль, ансяк марявикс лезкс ульнесь республиканть пельде. Покш сюкпря Прявтонтень Артём Алексеевич Здуновнень, Правительствань Председателентень Владимир Николаевич Сидоровнень ды тиринь Минсельхозонтень, конавтомо ковгак.

Сюкпрянь валт Александр Щемеров ёвтась Лямбирень райононь прявтонть Юрий Иванович Головонь лемскак. Районось предприятиянтень лезды ламот тевтнесэ. Истя, те иестэ сонзэ лезксэнзэ вельде од ки теевсь Белогорское веленть ёнов, косо аштить нармунень фабрикань цехтне. Сы иестэ од ки арсеви теемс Павловканть пелев.

– Целанек жо те иесь минек туртов ламосо седе вадря ютазь иень невтематнень коряс. Сюродонть пурназь 23 075 тоннат (2021 иенть коряс урожайностесь кассь 10 центнердэ ды гектарсто саезь 37,5 центнерт), ламбамо якстерькайденть пурназь 17 605 тоннат (гектарсто саезь 350 центнерт). Кассть невтевкстнэ алонь нолдамонть коряскак. Неень шкане предприятиясонть чизэнзэ саевить 1 миллион 314 тёжат алт, – тешкстызе Александр Щемеров. – Ды теньсэ весемесэ покштояк покш путовксонк тынк – минек предприятиянь важодицятнень. Сюконян тенк. Те иесь прядовома лангсо, кемтяно, сонзэ марто прядовить стакачитнеяк ды масторлангсонть кемекстави сэтьмечи. Минь жо седе товгак карматано тееме эсь тевенть – нолдамо ломантнень туртов вадря ды лезэв продукция. Арсян весенень шумбрачи, уцяска ды весементь вадрянть минек предприятиянтень!
Лембе поздоровт «Атемарская» нармунень фабрикань важодицятненень истя жо ёвтась Лямбирень райононь прявтось Юрий Голов. Юрий Иванович тешкстызе предприятиянть вадря важодеманзо, передовиктненень жо явшесь покш казнеть.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».