Четверг, декабря 08, 2022
Важное

Неть валтнэнь минек республикань велень хозяйствань предприятиятнесэ важодицятнень лемс ёвтынзе «Щелково Агрохим» компаниянь генеральной директорось Салис Добаевич Каракотов торжественной промкссонть, конась аволь умок ютавтовсь И. М. Яушев лемсэ Оперань ды балетэнь театрасо.



Велень хозяйствань ды перерабатывающей промышленностень кенярксчись ушодовкшнось Мордовиянь сехте мазый ды паро залонь фойесэнть республикань велень хозяйствань предприятиятнесэ теезенть невтемасто.

Седе тов кенярксчинтень сыцятненень невтезель документальной фильма, косо ёвтневсь аграрийтнень изнявкстост ды эрьва чинь важодемадост. Алкукскак, ули мезень коряс аштемс каштанчисэ минек сокицятненень-видицятненень, сюронь кастыцятненень, ракшань трицятненень.

Торжественной промксос сыцятненень мельспаросо пачтязель «Сырнень сёксь-2022» Весероссиянь агропромышленной выставкань цётамотнеде. Сынь кенярдовтыть. Минек аграрийтне сайсть 31 казне, ютксост – 25 сырнень, 3 – сиянь ды 3 – бронзань медальть.
Неть изнявкстнэнь кис поздоровт ды сюкпрянь валт велень тружениктненень ёвтась МР-нь Прявтось Артём Здунов.
– Минь нетяно, республикасонть ули весе эрявиксэсь 1,7 миллионт тоннатнень пурнамонть туртов, сы шкастонть 2 млн тоннатнес лисемантень, – мерсь Артём Алексеевич. – Те иестэ пурнынек пиже кснавонь сюпав урожай – 6400 тоннат. Омбо масторсто усковиця эмежтне допрок полавтовсть эсенектнень лангс. Невтевксэнек парт лия культуратнень коряскак, истят, кода соясь, рапсось, чиньжарамось ды лият, – мерсь МР-нь Прявтось. Сонзэ валонзо коряс, Мордовиясь теи покш путовкс масторонь ярсамопелень безопасностенть топавтомга, тиринь масторонь сэтьмечинть ванстомга.
Сон васень тевекс ёвтызе велень ломантнень эрямост паролгавтоманть. Мордовиясо поладовить велетнень вадрялгавтомань тевтне, юткозост сови велетнень комплексной кастомань-кепетемань программанть коряс важодемась.

Республикань Прявтось башка валт ёвтась велетнень туртов кадратнень анокстамодонть, хозяйстватнень руководительтненень мерсь полавтнемс технологиятнесэ ды кадратнесэ Донецкой ды Луганской народной республикатнень, Херсонской ды Запорожской областтнень велень хозяйствань предприятиятнень марто, истя жо тевс нолдамс лия таркасто сыця ломантнень туртов, конатне сыть масторонь регионтнэс, эрямо таркань сертификаттнэнь программанть.
Седе тов промксос сыцятненень поздоровт ды паронь арсемат ёвтасть МР-нь Госсобраниянь Председателесь В. В. Чибиркин ды Мордовия Республикань Правительствань Председателесь В.Н. Сидоров.
Кода эрси кенярксчитнестэ, велень хозяйствасо сехте парсте важодицятненень максозельть покш казнеть.

Мордовия Республикань I-це степенень Славань орденсэ казевсь Кочкуровань муниципальной райононь «Норов» компаниятнень группатнень правлениянь председателесь, МР-нь Госсобраниянь депутатось Александр Поздняков. Александр Ильич ниленьгемень иеде ламо шкань перть важоди агропромышленной комплексэнть виевгавтоманзо коряс. Ней сон кармась Мордовия Республикань Славань орденэнь полной кавалерэкс. Нать, а стяко те чистэнть Александр Ильич Поздняковонь лемс гайгсь Мордовия Республикань Гимнась.

МР-нь Прявтось Артём Здунов «Норовсо» тевтнень ветямосо таштазь содамочитнень мерсь саемс лия предприятиятнень прявттнэненьгак, косо явить покш мель аволь ансяк важодемань условиятнень вадрячинтень, истя жо арсить ломантнень юткошкаст парсте ладямодонть.

Сон мельспаросо ледстизе те иень кизна «Карнай» оймсема таркасонть футболонь коряс пелькстамонть, ков те предприятиясонть важодицятнестэ ламот сакшность семиянек.
Торжественной промкссонть агропромышленной комплексэнть виевгавтоманзо ды ламо иень перть парсте важодеманть кисэ Ромодановань муниципальной райононь «Ромодановосахар» ООО-нь прявтось Александр Иванович Атласов казезь «За заслуги перед Отечеством» орденэнь медальсэ. Тешкстазель, сонзэ прявтсо предприятиясь Равчирень федеральной округсо сахаронь нолдамонь коряс сехте покш ды сови Россиянь сехте покш кемень заводтнэнь юткс. Тосо нолдавиця продукциясь свал паро, мезенть кемевтить республикань ды федеральной уровенень дипломтне ды Почётонь грамотатне.

Колоньгемень вете иеде ламо шка алтась велень хозяйствантень Атяшевань муниципальной райононь «Сабанчеевское» ООО-нь скалонь потявтыцясь, эрзянь авась Марина Дмитриевна Тикшайкина. Сон педе-пев тонавтнизе од лувсо важодеманть, тевензэ топавты парсте ды невтевксэнзэ сехте покшт. Марина Дмитриевнанень максозь «Заслуженный работник сельского хозяйства Российской Федерации» почётонь лемесь.

Теке ёнксонь «Мясоперерабатывающий комплекс «Атяшевский» ООО-нь генеральной директорось Владислав Валентинович Бирюков казезь Российской Федерациянь Президентэнь Благодарностьсэ. Республикань пищевой ды перерабатывающей предприятиятнень ютксо «Мясоперерабатывающий комплекс «Атяшевский» ООО-сь лиссь изницякс. Весемезэ обществасонть продукциясь нолдавсь 34 млрд целковоень питнес, лемтне (наименованиятне) келейгавтовсть кавтосядос.

Те покш чистэнть агропромышленной комплексэнть виевгавтоманзо ды невтевкстнэнь покшолгавтомаст кис Мордовия Республикань Славань II степенень орденсэ казезь: Лямбирень муниципальной райононь «Нива» ООО-нь прявтось Фёдор Прохорович Желтов, Сыре Шайговань муниципальной райононь «Новотроицкий» Агрохолдингень прявтось Владимир Викторович Руженков.

МР-нь Славань III степенень орденэсь максозь: Дубёнкань муниципальной райононь «Хорошее дело» ООО-нь скалонь потявтыцянтень Вера Фёдоровна Давыдованень, Ардатовань муниципальной райононь «Ардатов» Мордовской агропромышленной объединениянь прявтонтень Юрий Александрович Евдокимовнень, Ковылкинань муниципальной райононь «Мордовский бекон» ЗАО-нь трактористэнтень-машинистэнтень Иван Васильевич Золотаевнень, Рузаевкань муниципальной райононь «Рузово» ЗАО-нь генеральной директоронтень Алексей Александрович Лапшиннэнь.
Торжественной промкссонть теезельть цётамотне республикань районтнэнь, предприятиятнень ды агропромышленной комплексэнь важодицятнень ютксо.

Велень хозяйствань производстванть лезэвстэ ветямонзо кисэ казнеть (изницянь дипломт) максозь Чаунзань ды Лямбирень районтнэнень. Растениеводствасо паро невтевкстнэнь коряс изницякс лиссть: Атяшевань, Покш Березникень, Инсаронь районтнэ, якстерькаень видицятнень ютксо васенце тарканть саизе Покш Игнатовань районось.
Ракшань трямонь отраслясонть изницятне: Ковылкинань, Ичалкань, Кочкуровань районтнэ.
Сехте ламо ловсонь максыцятнень ютксо: Дубенкань, Рузаевкань, Саранск ошонь округонь Октябрьской районтнэ.

Пищевой ды перерабатывающей предприятиятнень ютксо парт невтевксэст Кочкуровань «Норовское молоко», «Сыродельный комбинат «Ичалковский», «МордовАлкоПром», «Ромодановосахар», «Агро-Мир» ООО-тнень, «Рузово» ЗАО-нть, «Птицефабрика «Чамзинская», «Консервный завод «Саранский» АО-тнень, «Хорошее дело» Агропредприятиятнень группатнень ды лиятнень.
Теевезь коень коряс Велень хозяйствань ды перерабатывающей промышленностень важодицятнень кенярксчистэ башка мель явови велень хозяйствасо важодиця сеть од специалисттнэнень, кинень эштё эзть топоде 30 иеть. Парсте важодемань кисэ сценанть лангс тердевкшнесь Краснослободской районсто Коморовтнень семиясь. Кудазорось Пётр Алексеевич «Куликово» кооперативсэ важоди механизаторокс, Наталья Викторовна низэ теке жо хозяйствасонть ветеринарной фельдшер. 2020 иестэ Коморовтне «Комплексное развитие сельских территорий» государственной программанть коряс стявтсть эстест кудо. Мирдть-нить трить-кастыть колмо эйкакшт. Семиянтень максозь дипломт, ярмаконь премият, эйкакштненень – казнеть.

Торжественной промкссонть башка мель явсть студентэнь велень хозяйствань отрядтнэнень. Сынст ютксто изницякс лиссь Кемлянь аграрной колледжень «Импульс» велень хозяйствань отрядось (прявтось Александр Симонов).

Кенярксчинтень пурнавозтненень профессиональной покш чинть кувалма поздоровт ёвтасть ды макссть казнеть Россиянь Минсельхозонь ды велень хозяйствань компаниянь-партнёртнэнь прявттнэ.

Валентина Юдина
Фототне
Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».