Пятница, февраля 03, 2023
Важное


Минек республикань велень хозяйствань предприятиятнень туртов те иесь ульнесь а берянь – сюрось чачсь вадря, удаласть кснавось ды ламбамо якстерькаесь, сонзэ ускоманзо прядытькак хозяйстватнесэ неень шкане. Кодамо те иень урожаесь ды кода молить тевтне, миненек ёвтнесть Покш Игнатбуень Ташто Чамза велень «8-ое Марта» ООО-со.

Неень шкантень тесэ весе вийтне максозь ламбамо якстерькаень урядамонтень. Кода мерсь предприятиянь прявтось Николай Иванович Куманев, иесь хозяйстванть туртов а берянель, домка важодема ветявсь весе ёнкстнэсэ.

– Те иестэ минек паксятнесэ видезельть 2600 гектарт шуж, 1400 гектарт товзюро, 1500 гектарт озимой товзюро, 2100 гектарт ламбамо якстерькай, эштё зярыя сюрокс кукуруза ды рапс, – корты Николай Куманев. – Сюрось чачсь а берянь, гектарсто пурназь 35-36 центнерт. Ней усктано-урядатано ламбамо якстерькаенть. Сонзэ урожайностесь зачётной сталмосо 405 центнерт гектарсто. Теде башка, покш робота теезь сы иень сюротнень алов, модатне весе соказь-анокстазь. Сёксня видинек 1680 гектарт озимой товзюро. Течинь чинтень прядынек удобрениясо сынст почодоманть. Карматано кемеме, теленть видьметне ютавтсызь парсте ды тунда лисемаст коряс кодаткак мелявкст а кармить.

Николай Иванович ёвтнесь, мезе теезь лияяк. Истя, те иестэ хозяйствась рамась важодемань туртов эрявикс од техника. Тракторонь-машинань паркось ламолгавтовсь неень шкань од тракторсо ды сокамонь-видемань туртов эрявикс агрегатсо. Кизэнь перть теезель сюронь ванстоманть туртов утом, покшолмазо малав 1300 кавонзазь метрат. Ветявить строямонь лия тевтькак.
Истя жо хозяйствась важоди социальной ёнкссонтькак. Лезды райононтень весе покш тевтнесэ. А ашти ве ёно, кода весе лиятнеяк, СВО-нь тевтнесэ лезксэнь явомасонть. Кода тешксты Николай Куманев: «Кие, бути аволь минь!»

ЛАМБАМО ЯКСТЕРЬКАЕНТЬ УРЯДАМОДО

Ламбамо якстерькаенть алов «8-ое Марта» ООО-нь паксятнесэ максозь 2100 гектарт мода. Ютазь недлясто урядазельть малав 1500 ламо гектартнэ.
– Якстерькаень таргамось ды ускомась минек ушодовсь ве шкасто, – тешксты хозяйствань прявт агрономось Валерий Евгеньевич Левщанов. – Весе якстерькаесь юты «Ромодановосахар» ООО-в. Эряви меремс, паксятнесэ техникаськак важоди те предприятиянть. Минь явинек паксят, видинек сынст, топавтынек весе обработканть, якстерькаень таргамонть ды ускоманть жо топавты сонсь заводось. Тешкстаса, видьмекстнэнь истя жо рамсетяно. Ансяк тесэ миненек лезды сахаронь заводось. Сынь максыть зярыя сортт, минь уш кочкатано эсенек мелень коряс.

Эряви меремс, ламбамо якстерькаень кастомань тевесь пек а шожда. Сеть, кить теньсэ важодить, парсте чарькодить, неень шкасто тень туртов эряви вадрядояк вадря техника, эрявить технологият ды ломанть, конат содасызь важодемань весе лувтнень.
– Штобу ламбамо якстерькаень урожаесь улевель вадря, сонзэ видеманть алов паксятнень ушодома анокстамо кавто иеде икеле, – ёвтни Валерий Левщанов. – Якстерькаенть паро видемс сеть паксятнес, косо икеле кассь озимой товзюро, эли жо паксятне кадозельть, лангсост мезеяк эзь касо. Истя пакся тикшеденть карми седе аламо. Нама, бути эряви, тевс нолдамат гербицидтнэнь ды каямат эрявикс удобрениятнень. Теде башка, моданть вадрясто сокама, теема культивация, штобу паксясь улевель виде, теке столь ланго. Те эряви сень туртов, штобу видемадо мейле якстерькаесь лисевель ве шкасто ды покшолмань коряс весе улевельть вейкеть. Бути жо паксясь карми аволь виде, якстерькаесь ве таркасо карми покш, лиясо седе вишкине ды таргамсто сон керсеви. А те вети урожайностень вишкалгадомантень.

ЭРЬВАСЬ ЭСЬ ТЕВСЭ

Зярдо ульнинек «8-ое Марта» ООО-со, ламбамо якстерькаень ускомань-урядамонь тевтне лаказь лакасть. Кода тешкстызе Валерий Левщанов, якстерькаенть усксемасо важодить комсь машинат – КамАЗ-т, вейке погрузчик ды зярыя покш тракторт, конатне машинатнень паксясто пачтить вадря кинть видьс.

Вейке КамАЗ-нь руленть экшсэ важодсь Александр Михайлович Сонаев. Сон хозяйствасонть роботы сезонной робочеекс уш ветеце ие. Нуема шкасто ускси сюро, сёксня важоди ламбамо якстерькаенть урядамосо. Кода тешкстызе предприятиянь агрономось, цёрась важоди вадрясто ды эрязасто, шканть стяко таргсеме а вечки. Секскак якстерькайденть уш кенерсь ускомс 150 ламо машинат (ноябрянь 23-це чинтень). Сонзэ невтевкстнэ сехте вадрят.

Погрузчиксэнть ёроковсто важодсь Геннадий Витальевич Чернейкин. Сонзэ тей кучизь «Ромодановосахар» ООО-сто, эдь техникась тесэ важоди те предприятиянть. Эряви меремс, ламбамо якстерькаенть урядамозо ветяви чинек-венек, ды ломантнеяк важодить вейке сутка веенст, омбоцестэнть – лият.

– Течи погрузчиксэнть важодян мон, ванды ялгам полавтсамам, – корты Геннадий Чернейкин. – Техникась неень шкань, вадря. Важодемс эйсэнзэ шожда. «Ромодановосахар» предприятиясонть мон уш кото иеть роботан. Ламбамо якстерькаень урядамо шкасто важодян погрузчиксэ, лия шкасто жо водителекс КамАЗ-со. Минек предприятиясь ков кучсамизь, тосо роботатано. Те хозяйствасонть якстерькаенть урядан колмоце ие, теде икеле колмо иеть Орданьбуесэ ульнинь.

Эряви меремс, Геннадий Витальевичень водителень стажозо 38 иеть. Те шканть перть роботакшнось комбайнасояк, тракторсояк, эрьва кодамо машинасо, а ней вана погрузчиксэ. Кода тешксты сонсь, весементень тонады куроксто ды кодаткак стакачить а мари.

– Истя жо, якстерькаенть таргамо шкасто паксятнесэ минек пельде важоди учётчик, кона ваны якстерькаень ускоманть мельга. Те тевенть тесэ топавты Пётр Николаевич Кузнецов. Сон уш зярыя иеть пенсиясо, ансяк тевтеме кудосо а аштеви, секскак сеедьстэ лезды хозяйствантень. Нуема шкасто тинге лангсо учётчикекс роботы, ней ламбамо якстерькаень ускоманть мельга ваны, – ёвтни Валерий Левщанов. – Учётчикесь тешксты эрьва машинанть ды лови, зяро эйстэдест чинзэ перть. Эрьва водителенть ули карточказо, секскак, зярдо сон сы сахаронь заводов, тосо уш содыть, косто машинась. Теде башка, эрьва КамАЗ-сонть аравтозь Глонасс, конась ваны транспортонть весе кинзэ. Ды бути мезеяк лиси, невтемга, машинась яжави, те неяви компьютерсэ, ды кучови лезкс. Лиякс меремс, важодемась весе автоматизированной, секскак кодаткак тамашат а лиснить. Важодемась моли.

Юлия Еремина
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».