Пятница, февраля 03, 2023
Важное

«КОМБИНАТ ТЕПЛОИЗОЛЯЦИОННЫХ ИЗДЕЛИЙ» ООО-сь ЭСЬ ВАЖОДЕМАНТЬ УШОДЫЗЕ 1960 ИЕСТЭ. НЕЕНЬ ШКАСТО СОН СОВИ РЕСПУБЛИКАНЬ ПРЯВТ ПРЕДПРИЯТИЯТНЕНЬ ЮТКС. ПРОДУКЦИЯЗО ПАРСТЕ СОДАВИКС АВОЛЬ АНСЯК МОРДОВИЯСО, СОНЗЭ РАМИТЬ МАСТОРОНЬ ПРОМЫШЛЕННОЙ ДЫ СТРОИТЕЛЬНОЙ ЛАМОТ ПРЕДПРИЯТИЯТНЕ.



Аволь умок минь содавтынек «Комбинат теплоизоляционных изделий» ООО-нь 1-це № цехенть, косо нолдыть минеральной ватанть ды сонзэ эйстэ теевкстнэнь. Цехень прявтось Александр Сергеевич СТАРКИН ёвтнесь, кода тесэ ветяви важодемась, ды цехень важодицятнеде, конатнестэ седе покш пельксэсь – эсь тевень содыця вадря специалистт.

– Цехсэнек роботыцятнеде малав сизьгемень ломанть. Важодемась ветяви кемекстазь графикень коряс, – ёвтни Александр Старкин. – Минь эдь эрьва чистэ васняяк топавттано кармавтоматнень, лиякс меремс, тейтяно истянь зняро продукция, зяро кармавтозь. Эрьва чистэ нолдавт продукциянь ламочись ашти номенклатуранть эйстэяк. Истя, мезесь-бути тееви седе куроксто ды седе ламо, лия продукциянть лангс жо шкась ютавтови седе ламо ды, нама, сондензэ анокстави седе аламо. Мезеяк лангс апак вано, минек цехесь топавты весе кармавтоматнень.

Кода ёвтнесь Александр Старкин, минеральной ватасто теевиця маттнэ тевс нолдавить теплосеттнень, трубопроводтнэнь лембелгавтомасо. Теплоизоляциянь плитатне эрявить кудотнень ды лия зданиятнень строямсто. Ды бути икеле продукциянть седе пек рамильть кизна ды сёксня, ней, технологиятнень полавтозь ды продукциянть вадрялгавтозь, строямонь тевтнень ветить иень перть.
Цехень прявтонть валонзо коряс, коллективсэнть ламо од ломанть, эсь тевень содыця специалистт, конат куроксто весементень тонавтнить ды эрязасто теить эсь тевенть. Теке марто башка мель явови сетненень, кить тесэ важодить зярыя кементь иеть ды конат самай весементень тонавтытькак одтнэнь. Сынь – предприятиянть нежезэ.

Одтнэнь тонавтыця

Владимир Александрович САЛЮКОВ «Комбинат теплоизоляционных изделий» ООО-нь 1-це номер цехсэ ашти слесартнень лангсо бригадирэкс. Сонзэ вановт ало ниле ломанть – электрогазосварщик ды колмо слесарть.

Цёрась чачсь-кассь Оренбургонь ёнкссо. Тосо прядызе школанзо, тусь армияв. Службанть ютамодо мейле жо эрямонь китне-янтнэ ветизь Мордовияв, конась ней уш теевсь тиринь кудокс.

– Зярдо сынь Мордовияв, молинь роботамо «Резинотехника» заводов, – ёвтни Владимир Салюков. – Школадо мейле монень кода-бути эзь саво тонавтнемс кодамояк профессияс, сеске карминь роботамо. «Резинотехникасо» важодемстэ прась уцяска тонавтнемс училищасо, косо монень максовсь КИП-нь слесарень специальностесь. Роботась тень тосо вечкевсь, ансяк вана зарплатась се шкане ульнесь аволь покш, а мон самай урьвакстынь, эрявсь эрямо таркань коряс арсемс. «ЖБК-2» заводсо жо важодицятненень сестэ явшильть малосемейкат, ды мон туинь тов. Роботынь тосо зярс-бути ды мейле сынь тиринь КТИ-в. Те ульнесь 1989 иестэ. А уш тесэ роботамсто квартираяк седе покш раминек, эдь семиясонть кассть вете эйкакшт – кавто цёрат ды колмо тейтерть. Весень тонавтынь, кадовсь ансяк вейке тейтерькам, кона зярс школав яки.

Ды вана уш колоньгеменде ламо иетнень перть Владимир Салюков важоди те заводсонть. Кода тешксты, неть иетнень перть ульнесь эрьва мезе. Роботась аволь шождатнестэ, улить стакачитькак, тентеме ковгак. Ялатеке важодемась тензэ вечкеви.

– Роботанок а берянь, ломантне весе вадрят. Минек бригаданть тевезэ – ваномс технической оборудованиянть мельга. Бути косо мезе калады, минь тосо васенцеть – эрязасто весементь витнетяно, – корты Владимир Александрович. – Мон, кода бригадир, эрьвантень максан тев, толкован кармавтоматнень ды, нама, тонавтан важодеме ансяк сыцятнень. Бути жо видестэ меремс, ламос тонавтомс а эрявитькак, весе сыть чарькодицят, важодема лувонть содыцят. Эряви тенст ансяк невтемс весементь, тевенть жо тейсызь.

Сынст лангсо оборудованиянть важодемазо

Куш кодамо производствасо важодема лувсонть эрьва роботникенть башка тарказо. Ды эрьванть эйстэ ашти продукциянь нолдамонь ламочись, курокчись ды вадрячись. Саранскоень Теплоизоляционной изделиятнень комбинатсонть истя жо. Тесэ эрьва роботникесь – эрявикс ломань.

Василий Евгеньевич КРЫМОВ предприятиянь 1-це № цехсэнть роботы электрогазосварщикекс. Те тевсэнть сон ськамонзо, секскак, бути мезе лиси, весе чиить сонензэ.
КТИ-в сась малав кемень иеде икеле, зярдо семиянек састь эрямо Саранскоев Нижний Новгород ошсто.
– Лия регионсто сазь, васня парсте эзинь содаяк, кодат тесэ важодить заводт ды предприятият. Секскак, паряк, иешка кирнявтнинь ве таркасто лияс, вешнинь тев мелень коряс. А мейле кода-бути маринь те заводонть ланга, арсия варчамс. Саимизь сеске, сварщикень специальностесь истят таркатнесэ эрявикс. Роботан те шкас ды ковгак лияв туемс мелем овсе арась, – корты Василий Крымов.
Слесартнень группась, козонь сови Крымовгак, 1-це цехсэнть ваны кавто линиятнень вадрясто важодеманть мельга. Сынь шкастонзо витнесызь кодаткак асатыкстнэнь, полавтсызь таштомозь пелькстнэнь. Те весемесь пек лезды производстванть свалшкань важодемасо.

– Зярдо сынь тей роботамо, васенце ды прявт тонавтыцям ульнесь минек бригадирэсь Владимир Александрович Салюков. Покш сюкпря тензэ, тонавтымим ламос. Ды нейгак лиясто невтьсы-ёвтасы, кода седе паро теемс, – корты электрогазосварщикесь. – Теке марто минек пек вадря коллективенек. Мезе илязо лисе, свал лездыть. Паряк, тень коряскак роботась вечкеви, туемадо мельтне превскак а сакшныть.
Теке жо группасонть важоди слесаресь-ремонтникесь Сергей Геннадьевич ЗАБАТУРИН. Цёрась сась аволь умок, кавтошка иеде икеле, ансяк эсь прянть уш васенце чистэ саезь невтизе вадря специалистэкс.

– Васняяк тень марявсь стака. Кадык тевентькак содылия, теде икеле зярыя иень перть важодинь «Ламзурь» предприятиясонть. Тосо ульнинь оборудованиянь наладчикекс, токарекс. Слесарень тевентень сынь пек малавикст, – ёвтни Сергей Забатурин. – Тей жо сазь, аламодо эрявсь тонадомс производствантень. Ней весемесь моли шождасто. Линиясонть содасак эрьва гайканть, эрьва болтонть. Мезентькак а тапасак.

Ды истят важодицятне предприятиясонть – эрьвась. Сынь вечксызь эсь тевенть, содыть, мезень кисэ роботыть. Эдь вадря важодеманть туртов тесэ теезь весемесь: улить условият, пандови вадря зарплата ды топавтовить важодицятнень вешемаст.

«Комбинат теплоизоляционных изделий» ООО-нть кувака ды сюпав важодемань кизэ. Кодгемень ламо иетнень перть тесэ лиссть ламо полавтомат, предприятиясь кассь-виевгадсь. Васняяк тесэ нолдавсть ансяк минеральной плитат. Ней жо специалисттнэ важодема лувонтень кармасть совавтомо инновационной технологиятнень ды нолдавиця материалтнэнь ламоксчись келейгавтовсь. Предприятиясь нолды теплоизоляционной ды минераловатной плитат ды совелитовой теевкст. «КТИ» ООО-нь продукциясь тееви технической ды экологической вешематнень коряс ды явови вадрячисэ, эдь производствасонть тевс нолдавить неень шкань технологиятне ды вадря сырьясь.

Юлия Еремина
Фототне
Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».