Четверг, декабря 02, 2021
Важное

Велень хозяйствань предприятиятнень туртов те иесь ульнесь а шождакс. Тундонь меельце ковось ды кизэнь васенце зярыя тарготне ульнесть псить ды коськеть, пиземеть арасельть. Нама, тень коряс сюротне чачсть аволь пек вадрят, урожайностесь аволь покш. Целанек республиканть келес сон лиссь 24-26 центнерт гектарсто. Теке марто, кода тешкстыть аграрийтне – те а берянь.

Неень шкане жо республикань паксятнестэ велень хозяйствань предприятиятне пурныть 2021 иень меельце урожаенть – нуить-ледить кукурузанть ды таргить ламбамо якстерькаенть. Кодамо урожаесь ды кода моли важодемась, миненек ёвтнесь Отяжбуень «Сабанчеевское» ООО-нь растениеводствань коряс прявтонь полавтыцясь Вера Сергеевна Кочурина. Кода мерсь Вера Сергеевна, кукурузанть туртов те иесь ульнесь пек вадрякс, урожаесь алкукс удалась. Ламбамо якстерькаесь истя жо чачсь а берянь.

Ракшатнень туртов тантей андомапелесь анокстазь кавто иес

– Минек хозяйствасонть те иестэ кукурузанть алов явозельть 900 гектарт мода, – ёвтни «Сабанчеевское» ООО-нь растениеводствань коряс прявтонь полавтыцясь В. С. Кочурина. – сынст эйстэ 700 видезель силосокс кукуруза, эштё 200 гектартнэс – сюрокс. Эряви меремс, те культурась чачсь а берянь. Сюрокс кукурузанть урожайностезэ лиссь 70 центнерт гектарсто, таркань-таркань жо весе 100. Кукурузанть туртов иесь пек вадря.

Сюрокс кукурузанть хозяйствасонть човорить консервантт марто ды пештить полиэтиленстэ теезь ванстома таркатнес. Истя, сон 1,5 ковонь перть консервировави ды мейле сонзэ кармить андомо скотинанень. Теде башка, тесэ анокстазь 12 тёжат тоннат силос, конась вадрясто ванстови тень туртов теезь латкотнесэ ды пандотнесэ. Кода мерсь Вера Кочурина, силосось хозяйствантень саты кавто иес.

– Кукурузань видьмекстнэнь минь весе раматано. Сюрокс видьмекстнэнь раматано омбо масторсто, силосокс сайтяно эсенек – Краснодаронь. Бути эстенек кадомс видьмекст, сынь урожай а максыть. Эдь весе гибридт, а сынст эйстэ видьмекст пурнамс а мереви, – ёвтни Вера Кочурина. – Минь сюронь видьмекстнэньгак сеедьстэ полавтнетяно, рамсетяно лия сортт. Те максы седе вадря урожай. Невтемга, товзюронть ансяк кавто репродукциянзо, седе ламоксть сонзэ виднемс а мереви. Эдь минь сюротнень седе покш пельксэнть митяно, секскак кирдема парочинзэ. А бути, мертяно, теке товзюронть видемс колмоксть эли нилексть, сон маштови ансяк скотинанень андомс фуражокс. Шужонть мереви видемс 3-4 репродукцият.

Эсь тевенть содасызь

Зярдо ульнинек Сабанцелень велень хозяйствань предприятиясонть, кукурузань урядамонть тесэ уш малав прядыльть. Зярс читне аштесть манейть, комбайнатне капшасть нуемс-ледемс, машинатне ускомс пурназенть. Весемезэ те тевсэнть важодсть кавто комбайнат ды ниле КамАЗ-т. Михаил Михайлович Палькин хозяйствасонть важоди весе эрямонзо перть, 1978 иестэ саезь. Цёрась чачсь-кассь теске, Сабанцелесэ. Ды превскак тензэ зярдояк эзь сакшно туемс ошов.

– Мон ломанесь велень, – тешксты Михаил Палькин, – свал ульнесь мелем техникантень, секскак школадо мейле молинь тонавтнеме Орданьбуев, тосо ульнесь ДОСААФ. Макссть тень прават ды се шкастонть саезь – свал руль экшсэ. Колхозсо важодемань шканть перть кодамо машинасо ансяк эзинь ардтне. Роботынь комбайнасояк, дизельсэяк, тракторсояк. Ней вана уш зярыя иеть КамАЗ-со важодян. Техникась а берянь. Кизэнь перть тикше, сюро усксинь, ней кукурузанть.
Важодемась тень пек вечкеви, свал ломань ютксо, коллективенек пек паро. Сюкпря минек прявттнэнень: Д. Н. Игушкиннэнь, Б.Н. Игушкиннэнь, В. С. Кочуринанень, сынь чарькодицят, куш кодамо тевсэ лездыть.

«Сабанчеевское» ООО-со уш зярыя иеть механизаторокс истя жо важоди Дмитрий Анатольевич Дудин. Сонсь цёрась шабра Отяжбуень Селищань.

– Мон школадо мейле прядыя Орданьбуень медицинской училищанть. Ансяк вана эрямонь тевекс медикень профессиясь монь туртов эзь карма, – корты цёрась. – Вишка порасто саезь тетянь марто чийнинь колхозов, касынь тракторонь кабинасо. Техниканть марто важодемась тень свал вечкевсь ды нейгак седеень коряс. Мезеяк лия а эряви ды косояк лиясо эсь прям а неян. Зярдо тей сынь, важодинь тракторсо, ней жо иензэ перть вана те ёроков техникасонть – погрузчиксэнть. Транспортось пек вадря, эрьва кодамо тевсэ васень лездыця.

Паксясто – видьстэ заводов

Ламбамо якстерькаенть алов «Сабанчеевское» ООО-нь паксятнесэ явозь 2100 гектарт. Ютазь недлясто урядазельть малав 700 гектарт, Ромодановань сахаронь заводов ускозельть 10 тёжадо ламо тоннат.

– Якстерькаень таргамось ды ускомась ушодовсть ве шкасто, – корты Вера Кочурина. – Весе якстерькаесь ускови «Ромодановосахар» ООО-в. Эряви меремс, паксятнесэ техникаськак важоди те предприятиянть. Минь явинек паксят, видинек сынст, теинек весе обработканть, якстерькаень таргамонть ды ускоманть жо топавты сонсь заводось. Тешкстаса, видьмекстнэнь истя жо раматано. Ансяк тесэ миненек лезды сахаронь заводось. Сынь максыть зярыя сортт, минь уш кочкатано эсенек мелень коряс. Теке марто якстерькаенть таргамо шкасто паксятнесэ минек пельде важодить дежурнойть, конат ваныть якстерькаень ускоманть мельга. Дежурнойтне тешкстыть эрьва машинанть ды ловить, зяро эйстэдест чинзэ перть. Истя, сутказонзо (важодить чить ды веть) якстерькайденть ускить 45 машинат, косо-бути 900 тоннат. Эрьва водителенть ули карточказо, секскак, зярдо сон сы сахаронь заводов, тосо уш содыть, косто машинась. Теде башка, эрьва КамАЗ-с аравтозь Глонасс, конась ваны транспортонть весе кинзэ. Ды бути мезеяк лиси, невтемга, машинась калады, неяви компьютерсэ, ды кучови лезкс. Лиякс меремс, важодемась весе автоматизированной, секскак кодаткак тамашат а лиснить.

Кода тешкстызе агрономось, ламбамо якстерькаенть урожайностесь лисни косо-бути 350 центнерт гектарсто, физической сталмось жо ули 400, ули 420 центнерт. Вера Кочурина тень тешксты сеть паксятнень коряс, косто якстерькаесь уш ускозь.

– Пертьпельксэсь зярс вадря, маней, минь снартнетяно роботамс седе эрязасто. Рудаз шкане эдь тевесь моли седе стакасто, – корты Вера Кочурина. – Секскак течинь чине малав весе паксятне анокт сы иень видемантень. Видинек озимть 2 тёжат гектарт, сокатано паксятнень якстерькаенть, кукурузанть алов. Анокстынек паксят тунда шужонть, товзюронть видемс. Тевесь моли эсь лувсо, важодтяно ней уш сы иень вадря урожаенть кастомга.

Юлия Еремина
Фототне Эдуард Ретунскиень
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».