Отяжелень районсо Кандрашкинтнэнь семиянть содасызь весе. Мода лангсо важодезь, сынь аволь ансяк трить эсь семиятнень, истя жо максыть важодема таркат тиринь Ботужелень эрицятнень туртов.
Республикань фермертнэнь ютксо лелятнень-ялакстнэнь Кандрашкинтнэнь ловить велесэ вишка хозяйстватнень важодемаст ладямонь реформаторокс. Эсь КФХ-нть теезь, сынь ютызь ламот стакачитнень. Ды кода бу неть стакачитне ды полавтоматне аволизь лыкавто, лелят-ялакст Кандрашкинтнэ кирдевсть. Течи сынь сокить-видить модат, трить ракшат, виевгавтыть производстванть. Важодемань иетнень перть рамасть эрявикс техника, инвентарь, тейсть сюронь ды модамарень ванстомга утомт, ракшатнень кирдемга фермат.
«Од Азор» КФХ-нть прявтсо ашти Александр Иванович. Ботужелень школанть прядомадо мейле цёрась тонавтнесь Ковылкинань строительной техникумсо. Профессиянть получазь, зярсыя роботась Отяжелень «Сельхозтехника» предприятиясонть. Зярдо жо велень хозяйствань ламот предприятиятне пекставсть, Кандрашкинтнэ велявтсть тиринь велев ды кармасть важодеме мода лангсо. Ушодсть весе раськенек – кото лелятне-ялакстнэ ды кавто сазорост. Ней важодить ниле лелятне-ялакстнэ ды сынст эйкакштне.
– Весемесь ушодовсь 30 иеде икеле. Ламот колхозтнэ каладсть, кадовинек важодема таркавтомо, эрявсь кодаяк эрямс. Истя ушодынекак эсенек тевенть, – ёвтни Отяжелень райононь Ботужелестэ «Од Азор» крестьянонь-фермерэнь хозяйствань прявтось Александр Иванович Кандрашкин. – Саинек 30 гектарт мода, карминек сонзэ соксеме-виднеме. Васень шкастонть кастынек ансяк сюро. Седе мейле, зярдо республикасонок ушодызе важодеманзо «Фонд развития села» государственной унитарной предприятиясь, кундынек эрицятнень кедьстэ пурнамо эмежть, карминек кастомо модамарь. Важодинек бюджетэнь кармавтоматнень коряс, модамаренть кастынек республикань больницятнень ды лия социальной учреждениятнень туртов. Сеть шкатнестэ виднинек 150 гектарт ды седе ламо. Ней истят покшолмат умок уш арасть. Тедеде весемезэ видинек 25 гектарт. Ды текеськак саты.
30 гектарт модатне ламолгавтозельть малав 2 тёжас (ней кадовсть малав 1500 гектарт). А покш пельксэсь хозяйстванть эсензэ, лиятнень саить арендас эсест велень эрицятнень кедьстэ. Тень кисэ пандыть ярмаксояк, кинень эряви – явшить сюро, тикше. Моданть лангсо важодеманть туртов КФХ-нть ули весе эрявикс техникась – неень шкань вадря тракторт, машинат, комбайнат, эрявикс агрегатт. Эсь модатнень апак сока-виде а кирдить.
Неень шкасто хозяйствасонть свалшкане роботыть 11-12 ломанть. Нурька шкас сиведевкшныть эштё зярыя. Свалшкань важодицятнестэ вейкесь – Валерий Николаевич Чингаев механизаторось. Зярдо минь ульнинек хозяйствасонть, Ботужеленть эйстэ аволь васоло паксясонть сон роботась модамарень таргамонь комбайнасонть. Сонсь цёрась шабра Дубёнкань райононь Поводелень. КФХ-сонть роботы уш кото иеть. Иензэ перть ойси эрьва кодамо техникань руль экшс. Сюротнень видемань шкастонть роботы тракторсо, нуемстэ – комбайнасо, ней вана модамарень таргамонь комбайнасонть ардтни, мерят, чачсь сонзэ руль экшсэ. Весементь теи содазь, вадрясто. Александр Иванович цёранть шны, прянзо а кайси, роботамо машты. Истятнэ хозяйствантень эрявить.
– Ней важодемасо тевс нолдавить неень шкань технологиятне ды ламо важодицят пек а эрявить. Невтемга, модамаренть таргатано комбайнасо, цехсэнть ашти сортовамонь столь, козонь эрявить ансяк кавто ават. Весемесь автоматизированной – видемась, валномась, пурнамось, сортовамось ды кескавга пештямоськак, – ёвтни Александр Иванович. – Модамаренть ванстоманзо туртов ули утом, косо свал кирдеви эрявикс микроклимат. Тосо весементь мельга ваны компьютерэсь. Модамаренть ванстомга эряви ансяк 5 градуст лембе, компьютерэсь тень мельга ваны чинек-венек. Бути эряви, автоматикась сонсь панжсынзе эли пекстасынзе вальматненьгак. Эсь шкасто модамарень ванстома утомонть теинек 3 тёжат тоннас. Ней истянь зняро а касттано, эдь сон а эряви. А вана важодемс сави мартонзо ламо.
Нама, омбоце кшинть кастомазо ков седе стака товзюронть коряс. Сезононть перть сонзэ марто тевтнеяк седе ламо, вийтнедеяк лангозонзо ютавтовить аволь аламо – тень эйстэ ковгак а туят. А бути видьметнень а полавтнемс, вадря урожай овсе а пурнат. Секскак хозяйствасонть тень мельга ваныть пштистэ. Малав эрьва ие рамить модамарень од сортт, кода эсенек, истя омбо масторонь селекцияньгак. Кочкить минек ёнксонтень ладицятнень ды сетнень, конатне ванстовить седе кувать ды парсте. Фермерэнть валонзо коряс, сортонть одкстомтомась эряви урожайностенть ванстомгаяк. Нама, ламось ашти пертьпельксэнть эйстэяк. Те иестэ вана урожаесь аволь пек сюпав.
– Модамаренть сюлмамонь шкась ульнесь пси, секскак нетькстнэнь ало эмежденть аволь ламо. Покшолмань коряс жо чачсь аволь берянь, – тешксты Александр Кандрашкин.
Сюротнень-модамаренть кастомадо башка, КФХ-сь важоди ракшань трямонь-кастомань ёнкссонтькак. Кандрашкинтнэ кастыть герефорд породань скалт ды букат. Неть ракшатнень сывелест самай лововияк «мраморноекс».
– Ракшатнень трямо-кастомо карминек косо-бути 2008-2009 иетнестэ, зярдо ансяк нолдавкшнось «Семейная ферма» государственной программась. Сонзэ коряс миненек явовкшнось субсидия, конань лангс эсенек райононь эрицятнень кедьстэ раминек племенной скалт, семенной эрявикс материал ды аламонь-аламонь ливтинек эрявикс породанть, – ёвтни Александр Иванович. – Неть ракшатне а пелить якшамодо ды сынст туртов а эряви теемс лембе кардот. Малав телень перть эрить калдасо, бути ансяк ярсамо кардос совсить. Теке марто самай мраморной сывеленть кастомга вазнэтне свалшкане кирдевить аваст марто ды касомазост потить ловсодо. Истямо сывеленть вечкицятнестэ неень шкасто аволь аламо, улить натой свалшкань рамицянокак.
Кандрашкинтнэ – алкуксонь труженикть. Сынь аволь ансяк сынсь путыть весе виест ды оймест мода лангсо важодемантень, весемесэ снартнить лездамс велентень ды тосонь эрицятненень. Лелятнень-ялакстнэнь лезксэст вельде Ботужелесэ теезь социальной зярыя объектт, ломантнень туртов явить важодема таркат, лездыть техникасо-мейсэ. Ды ламо мезесь лиясь тееви сынст вийсэ. Арази аламо велесэ мелявкстнэде?!
Юлия Еремина
Фототне
Алёна Артемьевань