Мода лангсо важодемась весе шкатнестэ аволь шождатнестэль. Ды те тевенть марто эсь эрямост сюлмить аламот. Мода лангсо важодеме кадовить велень хозяйствань алкуксонь патриоттнэ. Истятнэнь юткс сови Дубёнкань райононь Кочкур велень фермерэсь (индивидуальной предпринимателесь), од цёрась Сергей Николаевич Наумкин.
Сергей Наумкин чачсь-кассь Дубёнкань райононь Кочкур велесэ. Средней школанть прядомадо мейле сыргакшнось тонавтнеме Саранскоев, конёвонзо максокшнынзе электромеханической колледжев. Тонавтнемась тензэ ульнесь кода-бути аволь мелень коряс, ошонь шалтоськак эзь вечкеве.
– Се шкане тетям, Николай Иванович, ды авам, Раиса Петровна, уш кирдильть ламо ракшат. Те тевесь моненьгак пек вечкевсь. Кадыя ошсо тонавтнеманть ды велявтынь велев. Арсия монськак варчамс ракшатнень марто важодеманть, поголовиянть седе ламолгавтомс, – ёвтни Сергей Наумкин.
Кудов велявтозь, авазо эзь кадно Сергеень ды кармавтсь куш кодамояк тевс тонавтнеме. Районсо профтехучилищанть юрсо ульнесть курсат, косо цёрась тонавтнесь «слесарь-ремонтник машинно-тракторного парка» специальностентень. Тосо тензэ максозельть водителень ды трактористэнь праваткак.
Ды сестэ весе семиянек седе кеместэ кундасть тевс. Рамасть велень хозяйствань ветямонть туртов эрявикс техника, саизь эсест модатнень-пайтнень. Кармасть раштамо-виевгавтомо эсь хозяйстванть. Те ульнесь 2018 иестэ.
Райононь прявттнэ неизь семиянть ды од цёранть важодемаст. Кармавтсть варчамс эсь вийтнень проектной тевсэ – «Агростартап» государственной программасонть. Васенце иестэнть тевесь эзь лисе. Ансяк Сергей эзинзе нолда кедензэ ды омбоце иестэ одс пурнась эрявикс документт ды таго кучинзе пелькстамонтень. Сонзэ проектэсь изнясь 4 миллионт 800 тёжат целковойть.
Цёрась ёвтни, грантонь изнямосо течинь чистэ пек покш стакачить арасть. Улезэ ансяк бажамо.
– Грантонть изнямосо монень пек лездасть Дубёнкань райононь администрациясь ды Мордовия Республикань Велень хозяйствань ды продовольствиянь министерствась. Лездыть сынь нейгак. Свал гайгстыть, кевкстить, кода молить тевтне. Бути улить эсень кодаткак кевкстеман, монгак апак кавтолдо молян, пшкадян, – ёвтни Сергей Николаевич.
Грантонть саемадо мейле од цёрась аволь ансяк важодемань ёнкстнэнь ладинзе одс, башка мель явсь эсь содамочитнень кастомантеньгак. Сон седе вадрясто тонавтнесь ракшатнень трямонь-кастомань ёнкстнэнь, андомань тевтнень, ветеринариянть.
– Аламонь-аламонь эряви содамс весементь. Эдь бути скалось карми вазыямо, ветеринар тонеть лездамо а сы, эстеть эряви содамс, кода весементь теема, – корты Сергей.
Грантонь ярмактнень лангс од фермерэсь рамась вадря трактор ды мартонзо эрявикс прицепной инвентарь – крандаз, ледемка. Те техникась эрявикс сюротнень-тикшетнень кастоманть туртов. Истя жо неть ярмактнень лангс эсенек республикань хозяйствасто рамазельть герефорд породань 15 скалт. Ней уш сынь вазыясть ды поголовиясь аламодо седе ламолгадсь. Ней истят ракшатнеде 28 прят. Мельгаст якамо сиведезь важодиця.
Герефорд породань ракшатне лововить сывеленсекс. Сынст пельде а саеви ловсо, скалтнэ пельиес трить эсь вазтнэнь – весе ловсост юты сыненст.
– Неть ракшатне, ве ёндо, аволь аксунгалицят, ансяк важодемс мартост эряви маштозь. Пек андсыть, куялгадыть, вазыямстост стакачить лисить, – тешксты Сергей Наумкин. – Вадря хозяйства тееви ансяк сестэ, бути ули паро материал. Теке шкасто тонсь весементь парсте содасак ды чарькодьсак. Монь жо икелепелев ламо арсеман ды хозяйстванть виевгавтомга мелень.
Наумкинтнэнь ней 60 гектарт эсест модаст ды зярыя гектарт сайсть арендас велень эрицятнень кедьстэ. Неть модатнень виднить сюросо ды тикшесэ. Ракшатнень туртов андомапеленть фермертнэ целанек анокстыть сынсь. Модатнень лангсо важодемга ули весе эрявикс техникаст – кавто тракторт, комбайна, сталмонь усксиця машина, эрявикс агрегатт – сокамот, сеялкат, изамот, культиваторт ды лият.
Ферматнень-утомтнень Наумкинтнэ аламонь-аламонь малав весе теизь сынсь. Зярдо-бути тесэ аштесть икелень фермат, ансяк весемесь таштомсь-каладсь. Сынст витнемга седе шожда ульнесь стявтомс одт.
Герефорд породань скалтнэ кизэнек-теленек ушосот, якшамодо сынь а пелить. Бути уш покш варма ды пиземе, аламос совить кардос. Свалшкане жо аштить панжадо менель ало.
Истя жо фермертнэ трить вазт. Вишкинестэ рамить вазнэть ды кастыть эйсэст.
– Ниле ковс неть вазнэтнень кирдтяно эсенек кардазсо, мейле ютавтсынек тей. Эйстэдест ней малав 60 прят. Истя жо кудосо кирдевить потявтовиця скалтнэ. Эйстэст ниле. Целанек КРС-сь минек 95 прят, – ёвтни Сергей Наумкин. – Вишка вазнэтнень марто авам пек лезды, модатнень сокамосо-видемасо – тетям.
Кода тешксты Сергей Наумкин, кадык мода лангсо важодемась а шожда, ансяк ней тентеме а кода. Ули мелеть эрямс седе парсте, роботак. Лиякс а лиси.
Кода уш тешкстынек икеле, Наумкин фермерэсь три сывелень породань ракшат. Продукциянть миемань коряс кодаткак стакачить а эрсить. Вадря продукциянть рамицянзо ульнесть ды кармить свал. Ды те алкукс истя. Неень шкане, зярдо конкуренциясь пек покш, беряньстэ важодиця производствась эсь рамицятнень ёмавтсынзе пек курок. А бути саемс минек республиканть, косо велень хозяйствань продукциянь нолдыця-анокстыця производстватнеде зярыя эрьва районсонть, лиякс а кода. Ули мелеть ванстомс эсь хозяйстванть, кармат важодеме кода эряви, алкукс.
Кемтяно, фермерэнть Наумкинэнь весе арсеманзо топавтовить. Тень туртов од цёранть ули сехте эрявиксэсь – сон а пели стакачитнеде.
Сергей Наумкин – уцяскав мирде ды ламо эйдень триця тетя. Юлия нинзэ марто вейкест-вейкест содыть вишка шкасто саезь. Аволь ансяк кассть вейке велесэ, эрястькак вейке куросо, карадо-каршо аштиця кудотнесэ. Вечкемась ютксост вельмесь эштё школасо тонавтнемстэ. 2019 иестэ од ломантне пурнасть семия. 2020 иестэ чачсь васенце тейтерькаст – Стефания. Кавто иень ютазь, теке жо чистэнть, чачсь Есения, пельиеде икеле – Аксинья. Тетяст-аваст ды покштяст-бабаст туртов сынь сехте покш уцяска ды кеняркс.
Юлия Еремина
Фототне: Эдуард Ретунский.