Ютазь иенть прядовомсто Мордовия Республикасо «Клуб активного долголетия» Сыре ломанень ассоциациянтень совицятне пурнавкшность иень перть теезденть толковамо. Седе, кодат пелькстамот, рунгонь шумбралгавтомань тевть ютавтозельть, теде пачтясь Ассоциациянь президентэсь Елена Лезина. Виде, физической культурань ды спортонь коряс анокстазь проекттнэнь тевс нолдамс лездасть республикань бюджетстэ явозь субсидиянь лувсо грантонь ярмактне, конатне састь тенст софинансированиянь лувсо.
«Клад» ассоциациясь иень перть ютавтсь кемгавтово пелькстамот ды ниле мастер-класст. Сыре ломантне свал яксесть физической культурань занятиятнес. Неть шумбрачинь ды мелень витемань тевтне ульнесть аволь ансяк Саранскойсэ, истя жо сынь якасть Кочкуровань муниципальной районов.
Те шканть перть спортонь кодат мероприятият ансяк эзть ютавтово: «Зимние веселые старты», «Лыжня России», «Соревнования по общефизической подготовке» (ОПФ), «Веселые старты», «День здоровья», посвященный Дню Победы, «Гребля на лодках», «Чемпионат городского округа Саранск по пляжному волейболу среди граждан пожилого возраста» ды ламо лият.
Теде башка, эрьва недлясто сыре ломантне пурнавкшныть столь лангонь тенниссэ, волейболсо налксеме, гимнастикань тееме, валскень зарядкас ды скандинавиянь лувсо якамотнес. Текенень поладсынек, «Клад» ассоциациянтень совицятне невтить ёрокчист райононь, ошонь, республикань, регионъютконь ды весероссиянь пелькстамотнесэ. Сынь свал якить Саранскойсэ ютавтовиця Шумбрачинь читнес, Кочкуровань ды Рузаевка ошонь ветеранонь командатнень марто пелькстамо, Шумбрачинь чи ютавтсть Карнай сёлтонть вакссо. Истя жо ульнесть регионъютконь «Активное долголетие» фестивальсэнть, конась ютавтовсь Пензасо, республикань пенсионертнэнь пельде якасть спартакиадас Тольяттив.
Ветерантнэ те шкас мельспаросо ледстнить Саранскоень куншкакуросо МР-нь Прявтонть Артём Здунов марто зарядканть, «Готов к труду и обороне» весероссиянь физкультурно-спортивной комплексэнь фестиваленть, Кочкуровань «Юность» стадионсо Физкультурникень чинть ютавтоманзо.
«Клад» ассоциациянтень совицятне ютазь иестэ варчизь виест весероссиянь конкурстнэсэ, эйстэст кавтотнесэ лиссть изницякс. Вейкесь – «Лучшие практики популяризации здорового образа жизни на территории Российской Федерации» (тенст макссть диплом). Омбоцесь – «Молоды душой – 2022». «Нас старость дома не застанет» проектэнть коряс Мордовия Республикань муниципальной районтнэсэ 2023 иестэ кармить ютавтовомо комськавтово мастер-класст, ков тердевить сыре ломанть физической культуранть ды спортонть вельде шумбра лувонть тевс нолдамо.
Кода пачтясь Ассоциациянь президентэсь Елена Лезина, те кевкстеманть коряс покш важодема сынь ветясть седе икелень иетнестэяк. РФ-нь Президентэнь фондонь башка пелькстамосонть «Клад» ассоциациясь лиснесь изницякс «Кладовая здоровья» проектсэнть.
Ледстязель, сестэ Президентэнь грантонть покшолмазо ульнесь 2007,1 тёжа целковойть. Истя жо иень перть ютавтозельть эрьва кодат пелькстамот, мастер-класст. Сестэ сыре ломантне ёрокчист невтсть аволь ансяк республикань прявт ошсо, истя жо якасть Мордовиянь районтнэва. Невтемакс, аволь весть ульнесть Кочкуровасо.
Неень шкане «Клад» ассоциациянтень совицятнеде колмосядт ломанть, мелят сынст вейсэндявксось ламолгадсь колоньгеменде ламо ломаньс.
Вана те иенть ушодовомсто Саранскойсэ ютавтовсь Шумбрачинь чись. Пертьпельксэнть лангс апак вано, ветеранонь вейсэндявксось васенцекс сась прявт ошонь Ленинской райононь парков, косо аволь ансяк невтизь спортонь коряс ёрокчист, истя жо витизь ёжомарямост ды казсть кеняркс весе тов сыцятненень. Сынь седейшкава симсть пси чайде, морасть-киштсть ды налксесть вейсэ нуцькаст марто.
Виде, эрьва ломанесь пенсияв лисемадо мейле шканзо ютавты кода мелезэ: кить викшнить-кодыть, кить нуцькаст ваныть… Улить истяткак, конат эрьва ков кенерить. Нать, а стяко ломантне кортыть, кие седе ламо тевть теи, сень шказо эрьва мезень топавтомс саты. Вана «Клад» ассоциацияс совицятнеяк шкаст ютавтыть лезэвстэ ды шумбрачинь ванстозь. Сыре ломанень вейсэндявксонь прявтось Елена Лезина весень терди эрямонь шумбра лувонть ветямо, ёрокчист эрьва кодамо пелькстамосо невтеме.
«Клуб активного долголетия» ассоциациянтень совицятне невтить ёрокчист РФ-нь Президентэнь грантонь фондонь пелькстамотнесэ, сынь варчизь виест «Межрегиональный фестиваль оздоровительных практик «Искусство активного долголетия» проектэнть коряс, маласо шкасто яволявтовить изницятне, конатнень юткс совасть минек ёнксонь сыре ломантнеяк.
Валентина Юдина