Мордовиянь Прявтось Артём Здунов якшамковонь 21-це чистэ видеосвязенть вельде ютавтсь коронавирусонь инфекциянть профилактикань ды контролень коряс региононь оперативной штабонь промкс. Кортамось мольсь эпидемиологиянь тевтнеде, COVID-19 каршо ливксэнь путомадо, вирусонь од штаммонь самонтень региононь шумбрачинь ванстомань системанть анокчидензэ.
Артём Здунов мерсь - исяк чокшне Роспотребнадзоронь службанть пельде сась пачтямо: республикасонть тешкстазь коронавирусонь «омикрон» од штаммось. Ютазь недлянть перть регионсонть ламолгадсть COVID-19 сэредицятне: чинь-вень перть редявить 100 ламо сэредицят. Стационартнэсэ истя жо аштить малав 600 ломанть.
Мордовиянь Прявтось кунсолынзе ответственнойтнень пачтямост инфекциянь од коволонтень шумбрачинь ванстомань системанть анокчидензэ, республикасонть эрявикс вийтнень ды средстватнень теемадост. Башка кармавтсь ванномс весементь, мезесь токши поликлиникань учреждениятнень ды колл-центратнень важодемань лувонть, маласо шкастонть сынст лангс нагрузкась пек касы.
Республикань Правительствантень кармавтозь ладямс свалшкань сюлмо ды ламолгавтомс колл-центратнень оператортнэнь. Тень туртов Артём Здунов мерсь тердемс волонтеронь движениянтень совицятнень. "Минь эште весть тердтянок вейсэндявомс «Мы вместе» весероссиянь акциянтень, ней пек эрявикс эрьванть лезксэзэ", - мерсь Мордовиянь Прявтось.
Региононь Правительствань Председателень полавтыцясь Галина Лотванова мерсь, коронавирусонь «омикрон» штаммось редязь республикань 15 эрицятнень. Сонзэ валонзо коряс, амбулаторно-поликлинической рисьменть лангс нагрузкась кассь уш якшамковонь 10-це чистэнть саезь. Правительствась аноксты зярыя енкстнэнь коряс тевтнень молемантень. Башка ванновт алов саеви здравоохранениянь стационарной учреждениятнес весе эрявиксэнть пачтямось. Амбулаторной службатне ютавтовить 12 часонь важодемань лувонтень - 8.00-20.00. 122 номер марто колл-центратне кармить важодеме чинь-вень перть ды тов пачтявить эште 400 сотрудникть: врачт, мединститутонь 5-6-це курсонь ды медколледжень 3-4-це курсонь студентт. Те номерэнть коряс мереви тердемс врач кудов, получамс консультация, ды бути карми эрявомо: сэредицятне кармить сюлмавомо специалисттнэнь ды медицинань лезксэнь куроксто явомань службанть марто. Истя жо ладяви поликлиникатнесэ ламо каналонь телефононь важодемась. Амбулаторна лецявицятнень аудиконтроленть туртов тердезь медицинань институтонь 5-6-це курсонь 150 студентт. МР-нь Минцифрантень кармавтозь ладямс сюлмонь весе каналтнэнь свалшкань важодеманть ды улемс анококс сынст ламолгавтомантень.
Мордовия Республикава Роспотребнадзоронь службань руководителесь Татьяна Харитонова пачтясь,те недлястонть регионсонть ормалгадомась кассь 37%, се недлястонть те невтевксэсь ульнесь 4% седе аламо. "Те корты од штаммонть пек куроксто ламолгадомадонзо", - мерсь сон. Теде башка, ютазь недлястонть республикасонть эйкакштнень ютксо гриппсэ ды ОРВИ-сэ сэредемань кассь малав 80%. COVID-19 сэредицятнень ютксо эйкакштнеде - 15-40%, покштненень - 18-49 иеть.
"ОРВИ-сэ весе сэредицятненень эряви явомс покш мель - куроксто ушодомс лецямонть!" - мерсь региононь Здравоохранениянь министрась Олег Маркин. Ледстизе, кудонь аптечкасонть улест вирусонь каршо препаратт.
"Врачтне сыть эрьвантень, кинь ули покш температуразо, а эряви якамс поликлиникав - больничной листэсь панжови автоматически электронной лувсо. Прявтось - шкастонзо ушодомс лецямо. Республикасонть улить питней препараттнэ - арепливир, фавипиравир. Зярдо ломаненть ушодови ОРВИ-нь клиникась, сеске эряви ушодомс противовирусной терапиянть. А нолдамс "сырнень минутатнень", зярдо сынь пек лезэвть орманть каршо".
Артём Здунов кармавтсь пштистэ ванномс Саранскойсэ ды республикань районтнэсэ аптекань пунктнень амбулаторной лецямонь туртов эрявикс препараттнэсэ пачтямонть.
Региононь властенть башка ванновт ало кадовить вакцинациянь ды ревакцинациянь кевкстематне. Мордовиясо васенце компонентэсь путозь 70,4% эрицятненень, моли ревакцинациясь. Неть читнестэ регионов пачтязь 12-17 тесэ эйкакштнень туртов вакцинань васенце партиясь.
Артём Здунов тешкстызе, од тердематне, конат сюлмавозь республикав «омикрон» штаммонть самонзо марто, вешить весе службатнень пельде мобилизация, штобу топавтомс весе систематнень свалшкань важодеманть. "Республикань эрицятненень лезксэнть эряви явомс куроксто ды целанек" - истямо тев путсь региононь правительстванть икелев Мордовиянь Прявтось.