Неень шкане Мордовиясо эрязасто ютавтови важодемась Россиянь Президентэнть ёндо яволявтозь национальной проекттнэнь коряс. Кода содатано, сындест кемгавтово. Минек республикасо эрямос совавтовить 56 федеральной проектт, конат совить национальнойтнес.
Республикасонть «Здравоохранение» нацпроектэнть лувсо тевс совавтови «Развитие детского здравоохранения, включая создание современной инфраструктуры оказания медицинской помощи детям» региононь проектэсь.
Содазь, национальной проекттнэнь прявт тевесь – ютавтомс алкуксонь паро полавтомат минек масторонь весе ломантнень ды эрьва семиянть эрямосо.
Мордовиясо «Здравоохранение» национальной проектэнть вельде «Эйкакшонь республиканской клинической больниця» МР-нь здравоохранениянь государственной бюджетной учреждениясонть аволь умок стявтовсь хирургиянь од корпус. Течи лецямонь те учреждениясь республикань здравоохранениянь икеле молиця медицинской организациятнестэ вейкесь, косо эйкакштненень максови неень шкантень ладиця специализированной ды покш технологиянь медицинань лезкс. Нать, а стяко 2019 иестэ саезь те больницясонть «Здравоохранение» национальной проектэнть лувсо эрямос совавтовить зярыя программат.
Течи минек редакциянь инженек – Эйкакшонь республиканской клинической больницянь прявт врачось, Саранск ошонь округонь Депутатонь советэнь депутатось Олег Михайлович Солдатов.
ХИРУРГИЯНЬ ОД КОРПУССОНТЬ ВАНКШНОВИТЬ ДЫ ЛЕЦЯВИТЬ ЛАМО ОРМАТ
Хирургиянь од корпусонь стявтомась ды панжомась пек седе шождалгавтызе те учреждениянь важодицятнень роботаст, истя жо сыненст пшкадиця вишка пациенттнэнень лезксэнь максоманть. Эдь тосо ней пурнызь вейс хирургиянь весе отделениятнень операциянь теемань блоктнень. Тов совить: ансяк чачозтнень ды вишка сталмо мартотнень патологиянь отделениясь, эйкакшонь онкологиясь, анестезиологиясь ды реанимациясь, конатнень ютксо кирдевить ансяк чачозтне ды вишка сталмо мартотне. Од корпусонть панжомадо мейле пек седе паролгадсть тосо аштемань-улемань таркатне: витить ёжо валдо ды покш вейке-кавто ломаньс палататне. Седе сеедьстэ кармасть тевс нолдавомо неень шкантень ладиця технологиятне, од проекттнэ.
Невтемакс, эрямос совавтови од ёнкстнэстэ вейкесь – течи пек эрявикс неень приёмно-диагностической отделениясь, косо ули весемесь шумбрачинть ванкшномасто саезь орманть лангс ливтемас, ды бути эряви – тееви операция.
Отделениясонть улить колмо бокст, ков саевить эйкакштне, бути ормалгадыть педиця ормасо. Невтемакс, мелят тосо аштесть кеветее эйкакшт, ютксост вете хирургиянь профилень коряс.
ШКАСТОНЗО ОРМАНТЬ ЛАНГС ЛИВТЕМАСЬ ЛЕЗДЫ КУРОКОНЬ
ПИЧКАМОНТЕНЬ
Эндоскопической службанть улить шумбрачинь ванкшномань ниле кабинетэнзэ, косо тееви колоноскопиясь, бронхоскопиясь ды истя седе тов. Неть кабинеттнэсэ улить неень шкантень ладиця видеоэндоскопт, конатнень вельде аволь ансяк ормась видестэ редяви, истя жо видеоизображениясь ванстови ды ютавтови информационной медицинской системас. Кабинетсэнть наркозонь аппаратонь улемась лезды вишка эйкакштненень сэредькстэме теемс куш кодамо процедуранть.
ЛУЧЕВОЙ ДИАГНОСТИКАНЬ ОТДЕЛЕНИЯСО –
ОД ОБОРУДОВАНИЯ
Ней те больницясонть улить стационарной рентгенэнь кавто аппаратт, вейкесь эйстэст аравтозь травматологической пунктсонть, мезесь пек лезды томбавкс марто эйкакштнень ванкшномс.
Теде башка, сеть ормалгадозтнень туртов, кить сынсь а якавить, паро снимкань теемга сынст улить мобильной цифровой рентгенэнь кото аппаратост. Ули РЕНЕКС рентгеновской аппаратост, конась кирдеви травматологиянь операционнойсэ ды лезды теемс ванкшномат операциянь теемстэ (интраоперационно).
АНСЯК ЧАЧОЗТНЕНЬ ТУРТОВ…
«Здравоохранение» национальной проектэнть вельде те больницясонть ули шумбрачинь ванкшномань ламо эрьва кодамо оборудования. Покш мельспаросо вастозель «REVOLUTION EVO» 128 компьютерной томографось. Сон пек седе шождалгавтызе эрьва кодат стака томбавкстнэнь, седеень-санонь, онкологиянь, нейрохирургиянь ды ламо лия орматнень лангс ливтеманть.
Мордовиясо васенцекс те больницянть туртов пачтязель Siemens Magne ton Amira 1.5 магнитно-резонансной томографось, конань вельде ютавтовить шумбрачинь ванкшномат ансяк чачозь эйдетненень. Высокопольной магнитной томографонть улить весе эрявикс программанзо.
Шумбрачинь ванкшномань вере ледстязь оборудованиянть вельде аволь ансяк седе ламо эйкакштнень ормаст лангс ливтевить, истя жо ков седе видестэ редяви ормась, путови виде диагноз.
Малав вейке иень перть тосо теезельть наркоз марто 3,5 тёжат ванкшномат КТ ды МРТ аппараттнэсэ, ютксост кемготово овсе вишка эйкакшт. Хирургической корпусонть стявтомадо икеле весе неть ванкшноматне ютавтовсть лия регионтнэсэ.
Виде, хирургиянь службась кодаяк а эрси анестезиологиянь ды реанимациянь отделениявтомо. Сындест тосо улить кавто.
Ансяк чачозтненень ды шкадо икеле чачозтненень явозь реанимациянь кавто залт ды педиця ормасо сэредицятненень башка тарка. Отделениясонть ули неень шкантень ладиця медицинань оборудования ансяк чачозь ды шкадо икеле чачозь эйкакштнень ванкшноманть туртов. Сынст туртов улить инкубаторт кода реанимациянь залсонть, истя жо мельгаст ваномань таркасонть.
КЕМЕ СЮЛМОТ ФЕДЕРАЛЬНОЙ ЦЕНТРАТНЕНЬ МАРТО
Эйкакшонь республиканской клинической больницясь ламо иень перть кемекстазь Россиянь Минздравонь федеральной телемедицинань системас. 2022 иестэ вейсэ федеральной центратнень марто ютавтовсть 409 телемедицинань консультацият эрьва кодамо ормань коряс.
Хирургиянь од корпуссонть аравтозь телемедицинань од система, конань вельде свал ютавтовить консультацият икеле молиця федеральной центратнень марто онлайн, видьстэ реанимациянь залтнэстэ. Реанимациянь ды диагностикань аппаратурась ладязь кода медицинань информационной системас, истя жо телемедицинань системантень, вейсэ сынь теить цифровой вейкине лув.
Валентина Юдина