Пятница, февраля 23, 2024
Важное

Неень шкане республикань ды масторлангонь эрицятнень сехте пек талновты коронавирусонь педиця ормась. Ламотнень юткстонок эрьва чись ушодови зяро ломанть ормалгадсть ды тусть эрямосто… сводкатнестэ. Яла седе аламо ломанть кадовить сетнень эйстэ, кить сынсь эли малавиксэст эзть сэреде, кинь раськензэ ды содавиксэнзэ авольть лецяво республикань больницятнесэ эли сэредить кудосо…

Ламот юткстонок сынсь, врачтненень апак пшкале, лецить эсь пряст кудосо. Интернет вельде кулятнень ловнозь, сэредиця ялгатнень кевкстнезь, рамить эстест аптекатнестэ надобият ды арсить истя витемс шумбрачист. Виде, медицинасо важодицятне аволь весть пачтясть весенень, врачонь марто апак корта, а мереви лецямс, штобу а кандомс зыян шумбрачинтень.

Течи минек ловныцятненень седе, ков эряви пшкадемс ормалгадомсто, кода ванстомс шумбрачинть коронавирусонь педиця ормадонть ды лия кевкстематнень лангс толковамот максы Мордовия Республикань Здравоохранениянь министрась Олег МАРКИН.

– Олег Валентинович, ней ламот эрицятнень талновты коронавирусонь педиця «Омикрон» штаммось, кортыть, икеленсетнень коряс сон юты седе шождасто. Тынк вановтонк коряс, алкукс-аволь истя?
– Те виде, ансяк тешкстама, коронавирусонь педиця «Омикрон» штаммось юты ков седе шождасто сеть ломантнень ормалгадомсто, кить шкастонзо тейсть прививкат ды ютасть ревакцинация. Койсэнь, те токи кода покш ломантнень, истя эйкакштненьгак.

– Чарькодеви, течи врачтненень пек стака важодемс сэредицятнень марто. Паро, минек республикасо, кода масторонь келескак, састь лездамо тенст волонтёртнэ. Мордовиясо эйстэдест ламо-аволь ды кодат тевть лангозост путозь?

– Алкукскак, неень шкане пек стака медицинасо весе важодицятненень: врачтненень, медицинской сестратненень, санитаркатненень. Волонтёртнэнь ёндо лезксэсь сась тенек шкастонзо. Республикань больницятнесэ неень шкане важодить малав кавтосядт волонтёрт. Сынст ютксто веенстнэ видьстэ кудос кандыть надобият сетненень, кить витить шумбрачист амбулаторной лувсо. Ламот юткстост важодить поликлиникатнень колл-центратнесэ, кинень ней стака сехте пек. Зярыя од ломанть лездыть вакцинациянь пункттнэсэ.
Истя жо республикасонок улить автоволонтёрт. Сынь эсь транспортсост усксить участковой врачтнень сэредицятненень, лездыть сыре ломантненень. Эдь неень шкане амбулаторной лувсо важодицятненень пек стака, истямо эштё арасель зярдояк те орманть само шкасто саезь, бути мельс саемс васенце, омбоце, колмоце ды нилеце сэредемань шкатнень (волнатнень). Тень ловозь, куш кодамо лезксэсь – пек эрявикс тев аволь ансяк медицинасо важодицятненень, истя жо ормалгадозтнененьгак.

– Олег Валентинович, сень мельс саезь, ормалгадозтнеде республикасонок ламо, кода ломантненень седе курок пшкадемс врачтненень лезкс мельга?

– Мордовиянь эрицятненень, кода Россиянь лия региононь ломантнененьгак, лезксэнь тердемга эряви гайневтемс 122 телефононь номерэнть вельде. Тешкстаса, те вейкине (единой) номерэнтень гайневтезь, масторонь эрьва эрицянтень мереви максомс куш кодамо кевкстема коронавирусонть лецямонзо коряс: тердемс врач кудов эли медицинань куроконь лезкс. Те номерэнть коряс пшкадематне максовить чинек-венек.

122 службась – те сюлмо республикань весе поликлиникатнень марто. Эрьва пшкадеманть марясызь, эрьва сэредицянтень сы медицинской роботник, куш неень шкане здравоохранениянть лангс путовить пек ламо тевть.

– Алкукс-аволь QR-кодось карми максовомо сеть ломантненень, кинь сэредемстэ ульнесь отрицательной тестэсь, ансяк тень лангс апак вано, улить антителат?

– Виде, февралень 21-це чистэ саезь сеть ломантненень, кить сэредсть коронавирусонь ормасо ды тень невтьсызь верьсэ уликс антителатне, максови QR-код кото ковс.

– Олег Валентинович, течи республикасонок улить-арасть сатышка вакцинат?

– Неень шкане Мордовиясо арасть стакачить кодамояк вакцинань коряс. Течи республикасонть сатыть вакцинань весе видтнэ: Спутник V, Спутник Лайт, Спутник М, КовиВак ды ЭпиВакКорона. Видьстэ мерян, Россиянь вакцинанть лезэвчизэ кемекстазь, Спутник V вакцинанть – 96 %. Текенень поладан, улить истят ломанть, кинь иммунной системаст антителат а теи. Истятнэде весе вакцинированнойтнень эйстэ ансяк кавто процентт. Эштё весть пачтян республикань эрицятненень, ансяк вийтнень вейсэндязь, лоткавтсынек те апаро орманть.

Валентина ЮДИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».