Ютазь недлячистэ масторонь келес, истя жо минек республикасояк, тешкставсь Медицинасо важодицянь чись. Эряви меремс, ашо халатсо важодицятнень лангс путозь покш ответственность ломантнень шумбрачист ванстоманть, эрямост идеманть коряс. Минь сыненст пшкадтяно аволь ансяк шумбрачинь ванкшномсто, истя жо, зярдо куродсамизь кодамояк орма.
А мезть сепомс, сеедьстэ минь бажатано понгомс се врачонтень, конань ланга парсте кортыть, конась лездась малавиксэнек эли содавиксэнек туртов, кинь эрямост ванстовсь эсь тевень содыця медицинасо важодицянть содамочинзэ вельде. Аволь умок истямо ломань марто теевинь содавиксэкс ормалгадозтнень валост коряс: «Те врачось Пазонть пельде!» – вемельс прасть сеть, кинень сон лездась.
Истят питней валтнэ евтазельть Мордовия Республикань «Поликлиника № 4» здравоохранениянь государственной бюджетной учреждениянь врачонть-хирургонть, хирургиянь отделениянь заведующеенть Владимир Николаевич Аношкинэнь ланга. Сон – «Хирургия» ды «Урология» специальносттнень коряс высшей квалификациянь врач.
Тешкстасынек, Владимир Николаевич лецямонь те учреждениясонть прявтонь тевенть топавты комсте ламо иень перть. Течи сон минек редакциянь инже.
– Владимир Николаевич, нурькинестэ пачтядо эйкакшчиденк, кодамо семиясо чачиде-касыде, кить ульнесть превс путыцянк медицинасо важодицянь тевенть кочкамсто?
– Эйкакш пингем ютась Покш Березникень райононь Шугурова велесэ, ламо эйкакшонь триця семиясо. Тетям-авам – Николай Алексеевич ды Раиса Архиповна – пингень перть важодсть Калинин лемсэ колхозсо. Виде, сыненст а шожда ульнесь трямс-кастомс ниле эйкакшт, максомс тенст образования.
Шкань ютазь, юткстонок эрьвась муизе эсензэ эрямо кинзэ, покштне, Людмила ды Александр, эрить ды важодить Московсо, минь Вера сазором марто – Саранскойсэ. Койсэнь, сынь теизь весементь миненек уцяскав эйкакш пингенть каземга, высшей образованиянть тенек максомга. Минь жо эсенек ендо бажинек парсте тонавтнемс, мейсэяк а коламс ежост.
Ледстневи, эште школасо тонавтнемстэ яксинь тетянь марто колхозонь гаражов, косо свал ульнесь ламо техника, сон тосо прявтоль. Те шкас евтан тензэ покш сюкпря лезэв превс путоматнень кисэ. Нама, бути а сонзэ уроктне, кизэнь каникулатнестэ комбайнеронь лездыцякс а саевлимизь… А евтавияк, кодамо каштанчи сестэ ульнесь велень церыньканть седейсэ сюронь пивсэма шкасто, сонзэ утомс каямсто! Ансяк касозь, минь чарькодтяно, кодат паро урокт макссть тенек малавиксэнек, сынь минек тонавтымизь трудямо, ушодозь тевенть педе-пес топавтомо.
Тешкстаса, врачокс улемань мелесь сась тень Шугуровань средней школасо тонавтнемстэ. Вечкилинь весе предметтнэнь, башка мель явинь химия ды биология предметтнэнень, конатнень ветясть Полина Николаевна Удельнова ды Анна Николаевна Ларькина. Минь, 1987 иень школань прядыцятне, те шкас паро валсо ледстнетяно классонь ветиенек Анна Ивановна Фадеевань. Школам прядыя ансяк «ветес», ансяк медальтеме. Тень кувалма Н.П. Огарев лемсэ МГУ-нь медицинской факультетсэ тонавтнемга савсь максомс весе экзаментнэнь, кирдинь сынст ды ютынь конкурсонь коряс «Лечебное дело» специальностентень тонавтнеме.
Минек а шожда профессиянь салавачитненень эйсэнек тонавтсть тевест парсте содыця ламо преподавательть, конатнень ютксо медфаконь икелень декантнэ Людмила Константиновна Федоткина, Михаил Дмитриевич Романов ды лиятне.
Тешкстаса, вузсо тонавтнемстэ, васенце курсонть прядомадо мейле, иеде ламо шкань перть топавтынь долгом масторонть икеле – служинь армиясо. Тосто самодо мейле поладыя тонавтнемам.
– Инескеть, евтнеде, косто ушодынк важодемань кинк ды кить ульнесть васенце тонавтыцянк?
– Кодат ульнесть перестройкань иетне, койсэнь, башка толковамс а эряви. Самай сеть шкатнестэ ушодовсь трудовой пингем. Нама, велень студенттнэнень аволь истя пек стакаль ярсамопелень коряс, сестэ тенст покш лезкс макссть велесэ эриця тетятне-аватне.
Вузонть прядомадо мейле, 1994 иестэ, хирургонь специальностень коряс иень перть интернатура ютынь Саранск ошонь 4-це № клинической больницясонть.
Теде мейле туинь важодеме Покш Березникень ЦРБ-в, тосо карминь улеме врачокс-хирургокс. Те шкас эзть стувтово профессияс тонавтыцятне-хирургтне: отделениянь прявтось Николай Иванович Марычев ды Петр Александрович Сардаев.
Ледстяса, васень шкастонть а шожда ульнесь, эдь хирургонтень пшкадить сеедьстэ апак учонь орматнень, томбавкстнэнь пингстэ, зярдо эряви куроксто муемс виде лецямо. Лезкс мельга сыцятнень ютксо истя жо ульнесть вишка эйкакшткак.
– Владимир Николаевич, кода цидярдынк пандемиянь шканть?
– Нать, весенень тенек эрявсь цидярдомс истямо а шожда шканть, конась варчнесь эйсэнек нардевчинть лангс. Мордовияв те орманть самонь васенце жо ковстонть Зоя Сергеевна ним марто (сон важоди минек хирургиянь отделениясо старшей медицинской сестракс) ормалгадынек эсенек пациенттнэнь эйстэ. Сюкпря Пазонтень, пичкинек ды поладынек тевенек. Тешкстаса, Зоя Сергеевна малав ниленьгемень иеть важоди медицинасо.
Виде, а содавикс те ормась сась тенек апак учне, васень шкастонть минь эзинек сода, кода каршонзо бороцямс, ванстомс прянть, идемс сэредицятнень. Ансяк шкань ютазь састь тенек содамочитне, конатнень вельде ванстовсть тежат ломанень эрямот.
– Владимир Николаевич, Тынь комсте ламо иень перть топавттадо отделениянь прявтонь тевенть, нурькинестэ евтнеде коллективденк.
– Тешкстаса, ютазь иестэ минек лецямонь учреждениянтень топодсть 50 иеть, те шканть перть аволь весть полавтневсь сонзэ лемесь, ансяк эзь полавтово важодицятнень ендо ормалгадозтненень мелень явомась, сынст шумбрачист витемантень бажамось, кажов орматнень лангс ливтемась. Теньсэ покш путовксост минек врачтнень ды медицинской сестратнень.
Неень шкане хирургиянь отделениясонок важодить малав ниленьгемень ломанть.
Кеменде ламо иень перть коллективенть прявтсо тевензэ парсте содыця руководителесь, прявт врачось Владимир Федорович Машков. Сонзэ пингстэ лецямонь те учреждениясонть кемекставсь материально-технической базась, ламо паро полавтомат теевсть «Модернизация первичного звена здравоохранения Российской Федерации» Мордовия Республикань региональной проектэнть вельде.
Коллективенек эри ды важоди покш ояксчисэ. Башка киньгак тешкстамо а карман, юткстонок эрьвась, ков сатыть виензэ, бажи седейшкава топавтомс сонзэ лангс путозь тевтнень. Улить ветеранонок, кить максыть содамочист одтнэнень, лездыть седе курок тонадомс минек а шожда тевентень.
– Неть читнестэ тешкставсь Медицинасо важодицянь чись, кинень бу Тынь евтавлиде сюкпрянь валт?
– Минек профессиясонть эрьва ломаненть лецямозо ашти аволь вейке специалистэнть эйстэ, цела команданть, косо эрьвась топавты эсь тевензэ. Евтан сюкпря минек весе коллективентень.
Эште покш сюкпря бу евтавлинь тетянь-авань туртов, сынь лездасть тень а кадомс вечкевикс профессиям. Важодемань васень эскелькстнэнь теемстэ семиясонок лиссь покш кажо: чачтомсто кулось ним Нина Васильевна… Эйкакшонок идевсь, монень жо эрявсь важодемс. Сестэ малавикс ломантне – Раиса Архиповна ды Николай Алексеевич – саизь эсест лангс церынем Артемонь кастоманть. Сон сынст кедьсэ ульнесь школав туемс. Седе мейле вейсэ омбоце ним Зоя Сергеевна марто саинек сонзэ ошов ды теинек весементь, штобу сон касоволь алкуксонь ломанекс.
– Владимир Николаевич, мезе вечктядо тееме юткошкасто?
– Ледстневи, эйкакш пингестэ авань ендо покштям, Архип Федорович, кинень савсь ютамс Ине Отечественной войнань толонть пачк, тосто сонзэ ильтизь кудов пильгес ранявомадо мейле, пек вечкиль вирев панго мельга яксеме. Нама, сонензэ стака ульнесь ютамс васоло таркав, сыргиль клюшка марто ды свал мартонзо сайнилимим монь. Покштям тонавтсь эйсэнь аволь ансяк пангонь кочкамо, истя жо цидярдомачинтень. Эдь паргонть пештямга ламо вайгельбеть савсь мартонзо ютамс. Вирев панго мельга якамо вечкемась те шкас мельсэнь, эрьва сексня, бути пры юткошка, бажан вастовомс пертьпельксэнь мазычитнень марто.
Владимир Николаевич Аношкинэнь покш путовксозо неень шкантень ладиця диагностической ды лецямонь од технологиятнень тевс нолдамосо, важодемань организационной лувонть эрямос совавтомасо, шкастонзо стака орматнень лангс ливтемасо. Нать, а стяко сонзэ ламо казнетнень ютксо Российской Федерациянь ды Мордовия Республикань Здравоохранениянь министерстватнень Почетной грамотатне, сонзэ прявт ало сынст лецямонь первичной профсоюзонь организациясь 2022 иестэ лиссь изницякс минек республикань истят жо организациятнень ютксо.
Валентина Юдина