Апрелень 7-це чистэ мастор лангсо тешкставсь Шумбрачинь чись. Россиянь келес ютавтовить ламо мероприятият, конат алтавить шумбрачинть ванкшномантень, сонзэ кемекстамонтень, шумбра лувонть эрямос совавтомантень! Те иестэнть неть паро тевтнень вейсэндизь «Вейсэ шумбрачинтень» акциянть ютавтомасо.
Мельспарозонок, Мордовиянь оштнесэ ды велетнесэ улить семиянь династият, косо врачтнень, фельдшертнэнь тевест поладыть сынст эйкакшост, нуцькаст, правнуцькаст. Истятнэнь ютксо – Чаунзань райононь Апраксина велень эрицятне Нина Сергеевна ды Иван Дмитриевич Захаринтнэ.
Врачонь династиянть марто содавиксэкс теевемс лездась монь туртов тейтерест – Саранск ошонь округонь «Поликлиника № 2» МР-нь ГБУЗ-нь Шумбрачинь центрань врачось Татьяна Сержантова (тейтерькс Захарина). Тешкстасынек, Апраксинань средней школанть сиянь медаль марто прядомадо мейле Татьяна Ивановна сайсь мель тонавтнемс Н.П. Огарев лемсэ МГУ-нь медицинской факультетсэ.
Неень шкане стака евтамс, мезесь кармавтызе кочкамс те а шожда профессиянть. Нать, Вере Пазось ветизе те кияванть, штобу максомс лезкс ормалгадозь ломантненень. Куш, тонавтнемс тензэ савсь вейксэньгеменце стака иетнестэ, зярдо тетянзо-аванзо туртов ламо ковонь перть эзть пандо зарплата, сон зярдояк эзь пеняця. Весементь цидярдызе велень тейтересь, кона эйкакш пингестэ тонадсь стакачиде а пелеме. Весе шканзо явсь сы шкань тевензэ седе домкасто содамонтень. Ней уш медицинасо сон комсте ламо иеть. Авазо, Нина Сергеевна, важодсь велень фельдшерэкс эште советской шкатнестэ саезь, сонзэ ялаксозо, Вячеслав Сергеевич, важоди врачокс Нижний Новгород ошонь больницясо. Сон – медицинань лезксэнь куроксто максомань станциянь травматологиянь отделениянь прявт.
Татьяна Ивановнань тейтерезэ, Ольга Евгеньевна, кочкизе стоматологонь профессиянть. Эсь шкастонзо сырнень медаль марто школанзо прядомадо мейле тонавтнесь Тверень медицинской государственной университетсэ. Ней важоди специальностень коряс: сон – хирург-имплантолог.
Истя жо медицинантень эрямонзо алтызе лелянзо, Михаил Сергеевичень, тейтерезэ – Наталья. Сон важоди С.В. Катков лемсэ Республиканской клинической 3№ больницясонть врачокс-диетологокс.
Течи ули меленек евтнемс Татьяна Ивановнань авадонзо – Нина Сергеевна Захаринадо (тейтерькс Валдаева), кинень савсь важодемс фельдшерэкс советской шкасто, ды сонзэ малавикстэнзэ.
Те эрзянь аванть чачома тарказо – Орданьбуень райононь Куцян веленть эйстэ зярыя вайгельбеде ве ено аштиця Заря поселкась, ней те таркасонть эзь кадово вейкеяк эриця. Сон нардавсь Мордовия Республикань картанть лангсто…Те поселкась теезель 1930-це иетнестэ, тов састь эрямо Куцян велестэ зярыя семият, конатнень ютксо ульнесь Валдаевтнень раськеськак.
Коллективизациянь иетнестэ тосо пурназель колхоз, сонзэ прявтокс кочказель Нина Сергеевнань покштязо Михаил Максимович. Сонзэ ледстнематнень коряс, конатнень сэтьместэ кунсолость нуцькатне, те ульнесь виев хозяйства. Кие соды, паряк, те шкас бу ванстоволь колхозось, бути сонзэ одс аволизь вейсэндя Куцян веленть марто. Те кезэрень веленть историянзо парсте содылизе Нина Сергеевнань тетязо Сергей Михайлович, сонзэ тевенть поладокшнызе церазо – Михаил Сергеевич. Сон ниленьгемень вете иеть важодсь школасо, тонавтсь история ды география Куцян велень эйкакштнень туртов. Теде башка, сон свал тонавтнесь тиринь енксонть историянзо, краеведениянь коряс анокстась ды сермадсь ламо статьят Орданьбуень «Маяк» газетас. Ризксэнтень, кавто иеде икеле сон кулось…
Овсе лия эрямо ки кочкась эстензэ сазорозо Нина Сергеевна. Школанть парсте прядомадо мейле максынзе документэнзэ эсест Орданьбуень медицинской училищав (ней – колледж), тонавтнесь «фельдшер-акушер» специальностень коряс. Эсь шкастонзо лиссь мирденень Отяжелень райононь од церанть Иван Захаринэнь экшс, ды сынь кармасть эрямо те енксонь Низовка велесэ. Сеть иетнестэ семиятне ульнесть пек покшт, малав эрьва кудосо ламо эйкакшонь трицят. Ульнесть истяткак, косо кастсть кеменде ламо эйкакшт. Весенень савсь теемс профилактикань прививкат, уколт, кортамс мартост диспансеризациянь ютамодо ды истя седе тов. Теде башка, эрявсь ваномс гипертониясо, диабетсэ, седеень-санонь орматнесэ сэредицятнень мельга, шкастонзо путомс сынст учетс. Башка мель сон явсь пешксесэ аватненень, сындест жо свал ульнесть ламо.
Сеть шкатнестэ китне пек берянельть, аволь эрьва таркава ютавилить. Тундонь-сексень рудазов шкатнестэ лиясто лишмесэ, лиясто тракторсо ильтильть ормалгадозтнень. Те эдь ней районтнэстэ стакасто сэредицятнень Саранскоев пачтить санавиациясо, сестэ жо кажонть лисемстэ транспортировкань коряс а шождаль.
Нина Сергеевна пингензэ перть а стувтсы, кода Низовка веленть маласо Лига поселкасто пешксесэ аванть чадыведень шкасто пачтясь леенть трокс эень покш поколенть лангсо. Лиясо а мейсэ ульнесь, а ютават…Сонзэ жо эрявсь пачтямс, штобу идемс! Нама, сестэ Нина Сергеевна эзь арсе эсь эрямодонзо, ансяк бу ванстомс тейтерьаванть ды эште апак чачо эйдензэ. Те эдь ней «Здравоохранение» национальной проектэнть лувсо одкстомтовить велетнесэ ФАП-тне, рамави эрявикс оборудования. Важодеме тов сыцятненень максовить аволь аламо ярмакт «Земский врач» программанть коряс. Советской шкастонть, зярдо савсь важодемс Нина Сергеевнанень, фельдшерэнь тевденть башка, эште ульнесь покш хозяйстваст. Сынь кирдсть ламо ракшат ды ульнесь покш садпирест. Кодат тевть ансяк арасельть, весе цидярдынзе эрзянь авась ды зярдояк эзь пеняця.
Паро, покш нежекс тензэ ульнесь Иван Дмитриевич мирдезэ, конань марто нейгак эрить ояксчисэ. Трясть-кастсть кавто паро эйкакшт, лездасть тенст тонавтнемс вузсо перестройкань стака иетнестэ. Ды те шкас аштить покш мельспаросо Татьяна Сержантова тейтерест, Ольга нуцькаст ды весе малавиксэст кувалма, кить эрямост алтызь мастор лангсо пек эрявикс тевентень – медицинантень!
Валентина Юдина
Фототне саезь Татьяна
Сержантовань архивстэ.