Четверг, марта 28, 2024
Важное

Мордовиянь Прявтонть тевтнень топавтыцясь Артём Здунов чадыковонь 23-це чистэ ютавтсь коронавирусонь инфекциянть профилактикань ды седе тов а нолдамонь коряс региононь оперативной штабонь промкс. Кортавсть эпидемиологиянь тевтне, COVID-19 каршо ливксэнь путомась, региононь шумбрачинь ванстомань системанть тевдеемась, санитарно-эпидемиологической вешематнень мельга ванномась.

Мордовиянь Прявтонть тевтнень топавтыцясь тешкстызе: те недлястонть редяви коронавируссо сэредеманть аламодо валгстомась. Секс мекс сон аволь пек покш, тень кувалма а эряви киртямс санитарно-эпидемиологической тевтнень топавтомаст мельга ванноманть.

«Минь а нейтянок тевтнень вадря енов куроксто полавтоманть, - тешкстызе Артём Здунов. – Аволь умок ульнесь РФ-нь Президентэнть Владимир Владимирович Путинэнь Кучомась, конасонть кармавтозь: таштамковонтень коллективной иммунитетэсь улезэ топавтозь», - ледстизе Мордовиянь Прявтонть тевтнень топавтыцясь.

Кода пачтясь вице-премьерэсь Галина Лотванова, ковидэнь госпиталень лувсо важодить лецямонь 7 учрежденият, теезь инфекционной 615 таркат. Чадыковонь 23-це чинтень стационартнэсэ ашти 431 ломань.

Ансяк, кода тешкстазель, тевтне куш кона шкасто полавтовить. Пек талновтыть панжиковонь сыця кенярксчитне, зярдо республикав кармить само ломанть лия регионтнэстэ. Тень кувалма штабсонть кортасть, мезе эряви теемс, штобу улемс анококс эпидемиянь тевтнень стакалгадомантень. Кемекстазь, ливксэнь путомась неть 10 читнестэ а лоткавтови. Лецямонь учреждениянь ливксэнь путомань пунктнэ ды мобильной комплекстнэ оймсема читнестэ поладсызь важодемаст, оймсеме кармить ансяк кавто чить – панжиковонь 2-це ды 9-це читнестэ. Те эряви сень туртов: седе курок топавтомс коронавиурсонть каршо коллективной иммунитетэнть.

Сень лангс апак вано, ливксэнь путомась республикасонть юты эрязасто, отказамонь тевтне жо талновтыть. Васняяк те токши Московсо ды лия регионтнэсэ вахтасо важодиця ломантнень. Районтнэнь прявтнэнень кармавтозь явомс башка мель неть ломантнень лангс ды ютавтомс мартост толковамонь тевдеема.

«Минек туртов те, алкукс, тандавкс – сон минек чаракавсамизь, аволь весе регионтнэсэ эпидемиологиянь тевтне вадрят. Зярс минь кирдтянок позициятнень!» - мерсь Артём Здунов.

Республикав уш пачтязь вакцинань 109 тёжат комплектт. Маласо кемень читнень перть сыть эштё 14 тёжат. Ули весемесь, штобу сы недлястонть чизэнзэ путомс ливкс 4 тёжат ломантненень. Пачтямотне лездыть путомс ливксэнть аволь ансяк башка категориятненень, истя жо весе эрицятненень. Покш лезкс кандыть мобильной комплекстнэ, конат чадыковонь 15-це чистэнть кармасть важодеме микшнемань куншкакуротнесэ, ламо ломанень пурнавома таркатнесэ. Теде башка, медиктнень выездной бригадатне топавтыть тевест организациятнень важодемань коллективтнесэ. Кармавтозель поладомс те тевенть.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».