Якшамковонь 30-це чистэ Мордовиянь Прявтонь тевтнень топавтыцясь Артём Здунов содавтызе Ташто Шайговань райононть.
Васняяк сон якась «Новотроицкая» агрофирмав, косо кастыть сюро ды кором, кирдить ракшат. Неень шкане тесэ важодить 146 ломанть, средней зарплатась – 30 тёжат целковойть, скалонь потявтыцятненень пандыть 42 тёжат целковойть. Велев важодеме тердевить превей специалистт, теевить од семият, чачить эйдеть, строявить од кудот. Эрьва кодат программатнень коряс велень специалисттнэнь туртов строязь 58 кудот.
Новотроицкойсэ строязь социальной ламо объектт: стадион, эйдень кужо, социальной куншкакуро, ков совить ФАП-сь, библиотекась, велень клубось ды концертэнь залось. Велесь полавтовсь – тесэ теезь эрямонь вадря условият, конатне а явовить ошонсетнень эйстэ, эрицятнень ули важодема таркаст.
Артём Здунов ваннызе социальной куншкакуронть, конась строязель 2014 иестэ «Комплексное развитие сельских территорий» программанть коряс.
Седе тов Артём Здунов якась Мельцаны велесэ «Эконатура» ООО-в, косо теить антисептикть ды медицинской маскат. Предприятиясь панжозь 2020 иень эйзюрковсто. Антисептической продукциянть нолдамось ушодовсь чадыковсто, гигиенической маскатнень – аштемковсто.
Теке жо чистэнть Артём Здунов якась Ташто Шайговань райононь Культурань куншкакуров, конась панжозь ютазь иенть прядовомсто. Объектэсь строязь «Комплексное развитие сельских территорий» государственной программанть коряс. Сон лиссь неень шкань ды ламо функциянь: васенце этажсо теезь кинозал, хореографиянь класс, библиотека. Омбоцесэнть – 300 озамо таркас концертэнь зал, эйкакшонь налксема тарка, звукозаписень студия, ремеслань студия, косо кармить карень кодамо, чувтосто керсеме, тонавтнеме художественной артомантень, гончаронь тевентень.
Мордовиянь Прявтонь тевтнень топавтыцясь ваннызе кинозалонть, хореографиянь залонть, Ф. Сычковонь важодеманзо выставканть, истя жо кортась эйкакштнень марто, конат якить ремеслань мастерскойтнес.
Звукозаписень неень шкань студиясонть ули эрявикс весе оборудованиясь ды седямопельть. Артём Здуновонь энялдоманзо коряс артисттнэ налксесть музыкальной вейке композиция, ансяк эзь сато ударник, лездась васенце вице-премьерэсь Владимир Сидоров. Сон вадрясто вети аволь ансяк республикань велень хозяйствань отраслянть, истя жо содасы барабанонь установканть.
Мордовиянь Прявтонь тевтнень топавтыцясь истя жо ванкшнынзе парконть, ФОК-нть ды эень катоконть, косо дивазевсь: тосо ули карсемань туртов лембе вагончик, пси чай – конькасо кирякстнемань вечкицятнень туртов. «Истямо сервис ошонь аволь эрьва катоксонть ули. Вадря!» – шнынзе Артём Здунов.
Мордовиянь Прявтонь тевтнень топавтыцясь Ташто Шайговань районсо улемстэ якась «Старошайговагропромснаб» АО-в, косо ваннынзе яжавтомань, колбасань ды ямксонь цехтнень. Сыре Теризморгасо содавтызе «Хорошее дело» ООО-нь ракшань кастомань комплексэнть.
Сыре Теризморгасо республикань руководителесь истя жо теевсь содавиксэкс Пивкинтнэнь ламо эйкакшонь семиянь крестьянонь-фермерэнь хозяйстванть марто. Сиведезь важодицяст арасть, весементь теить эсест вийсэ. Пивкинтнэ кастыть вейксэ эйкакшт: сисем цёрат ды кавто тейтерть.
Артём Здунов теке чистэнть якась Ташто Федоровка велесэ Сергей Пантюшинэнь крестьянонь-фермерэнь хозяйствантень. Содавтызе Сыре Теризморгасо Раськень культурань куншкакуронть. Мордовиянь Прявтонь тевтнень топавтыцясь покш мель марто ваннызе музеень-этнографиянь комплексэнть, казнекс тесэ тензэ кодасть карть.