Якшамковонь 23-це чистэ Артём Здунов якась Кочкурбуев. Важодемань программань васенце таркакс кармась Мордовское Давыдово велесэнть Александр Парваткинэнь крестьянонь-фермерэнь хозяйстванть содавтомась. Тесэ кастыть сюро, сывель ды потявтыть ловсо. Ней хозяйствасонть важодить 32 ломанть.
Артём Алексеевич кевкстнесь явовиця лезкстэнть ды икелепелев арсематнеде. Ней тесэ кирдевить 1100 сюракшов ракшат, седе тов сынь ламолгавтовить 2 тёжас.
«Бути ней чизэнзэ потявттано 10 тоннат ловсо, мейле карматано – 20 тоннат. Ней ловсонть лангс питнесь вадря, арсетяно, седе товгак истя карми, – мерсь фермерэсь. – Хозяйствасонть важодить тесэнь эрицятне, ламот эйстэст икеле ардтнесть Московов».
«Пек вадря, ломантне велявтыть, – мерсь Артём Алексеевич. – Важодеде, виевгадодо, бути кармить стакачить – пшкадеде, лездатано!»
Мордовиянь Прявтонь тевтнень топавтыцясь истя жо кевкстнесь, зярдо велесэнть ушодови кинть витнемась – сон улезэ теезь тедеде велень китнень строямонь программанть коряс. «Зярс теле, а вана тундонть ушодовомсто сеске кундама витнемантень. Ломантнень туртов те пек эрявикс», – тешкстызе Артём Здунов.
Теде мейле сон ваннызе, кода райцентрасонть витнезь паркось – те теезь мелят «Жилье и городская среда» нацпроектэнть лувсо. Объектэнть лангс явозельть 8,5 млн. целковойть. Райононь прявтось Светлана Герасимова толковизе, Кочкурбуень куншкакуронть вадрялгавтомань-одкстомтомань коряс арсематне покшт, ансяк эсест ярмакост а сатыть. Артём Здунов кармавтсь васенце вице-премьерэнтень Владимир Сидоровнень ванномс Минсельхозонть вельде те ёнксонтень финансонь лезксэнь явомадо кевкстеманть.
Артём Алексеевич истя жо якась Раськень культурань, промыслань ды ремёслань куншкакуронтень, конась стявтозь 2018 иестэ «Устойчивое развитие сельских территорий» федеральной программанть коряс. Тесэ шкинемань ёрокчист кастыть кода покштне, истя жо вишкинетне, ули натой «Теремок» някань раськень театра. Эйкакштне сынсь анокстыть спектаклят ды невтнить сынст Кочкурбуень райононь школатнесэ ды эйдень кужотнесэ.
Артём Алексеевич кортась эйкакштнень марто ды вансь спектаклянь пелькс.
«Тынк тесэ алкуксонь спектакля, тынь алкуксонь артистт! Сюкпря!» – мерсь сон эйкакштненень.
Артём Алексеевич кортась покш артисттнэнь мартояк. Истя жо якась выставкантень, косо невтезельть Кочкурбуень ёнксонь кедьчелькев эрицятнень теевксэст, ды 1941-1945 иетнень боевой ды трудонь подвигень музейс.
Кочкурбуень районсо важодемань коряс улемстэ Здунов якась «Норов» агрохолдингень предприятиятнес: «Норовский» МПК-с, «Норовское молоко» ООО-с, истя жо видьмень заводс. Компаниятнень группань прявтось Александр Поздняков ёвтнесь ютазь иестэ холдингень важодемань невтевкстнэде: кассь сывелень, ловсонь, колбасань теевкстнэнь производствась.
Иестэ иес холдингесь касты куркань сывелень нолдамонть. Производственной кавто од площадкатнень панжомась лезды покшолгавтомс продукциянь производстванть 3,6 тёжат тоннас.
«Косо микшнетядо?» – кевкстсь Артём Алексеевич.
«Тень марто стакачить арасть, микшнетяно аволь ансяк Мордовиясо, истя жо лия регионтнэсэ», – мерсь Александр Поздняков.
«Производствань од площадкатне – те велесэ важодемань од таркат. Истят производстватненень карматано лездамо!» – тешкстызе Мордовиянь Прявтонь тевтнень топавтыцясь.
Семилейсэ Артём Здунов ваннызе социальной куншкакуронть, конась строязь 2015 иестэ «Устойчивое развитие сельских территорий» федеральной целевой программанть коряс. Вейке латонть ало тесэ важодить социальной зярыя объектт: ФАП, почта, велень клуб, косо ули тарка эйкакштнень ды покштнень туртов. Велень эрицятне покш мель марто якить художественной самодеятельностень кужинетнес. Семилеень каштанчикс ашти «Вастома» фольклоронь ансамблясь, истя жо «Кальдерькай», «Лейне» эйкакшонь фольклоронь ансамблятне, «Весёлый перепляс», «Вдохновенье» киштемань коллективтне.
Республикань Прявтонь тевтнень топавтыцясь истя жо теевсь содавиксэкс веленть историянзо марто, сонензэ ёвтнесть седе тов виевгавтомань арсематнеде. Покш лезкс яви тесэнь агрохолдингесь. Истя, тедеде «Норовось» 14 млн. целковойде ламо явсь «Вечная память защитникам Отечества» мемориальной комплексэнь путомантень, истя жо Николай Чудотворецэнь храмонть ды иневанькс лисьмапрянть витнемантень.
Артём Здунов Кочкурбуень районсо важодемань коряс улемстэ якась Вирь ало Тавлав, косо макссь питне те таркасонть туризмань виевгавтомантень. Артём Алексеевич истя жо ульнесь чувтосто керсемань коряс эйкакшонь художественной школасонть, кортась тонавтыцятнень ды эйкакштнень марто. Ледстясынек, Вирь ало Тавлань художественной школась совась «Торамань тердема» туристэнь маршрутонтень, Тавлань чувтонь налкшкесь кармась те велень сувенирэнь брендэкс.
Артём Алексеевич истя жо якась пандосто сокссо кирякстнемань трассантень, субутасто тесэ ульнесть ламо оймсицят.
Сон кортась тесэнь предпринимательтнень марто, конат ушодсть важодеме Вирь ало Тавласо оймсема тарканть вадрялгавтоманзо коряс – тесэ улить административной пирявкст, ёвтнесть сынь Артём Здуновнень. Сон кармавтсь Минэкономикань ды Минспортонь прявттнэнень саемс те кевкстеманть вановт алов. Кода тешкстызе Артём Здунов, те таркась туризманть туртов пек вечкевикс, эряви домкасто важодемс инфраструктурань виевгавтоманть ды туристтнэнь тей тердеманть коряс.