Минь сеедьстэ ёвтнетяно строителень, педагогонь ды студентэнь лия отрядтнэде. Тынь марсиде зярдояк студентэнь медицинань отрядто? Мезе сынь теить? Косо важодить? Теде миненек пачти те отрядонтень совицясь (сынст лемдить боецэкс) Анна Ерёмина.
Аня чачсь Орданьбуень Кеченьбие велесэ. Мейле семиянек тусть эрямо Орданьбуе ошов. Средней школань 9-це классонть прядомадо мейле мольсь тонавтнеме Орданьбуень медицинань колледжев. Чарькодеви, тосо тонавтнемась аволь шождатнестэ. Анянень весе тукшнось мельс. Ниле иетне эзть марявояк, кода ютасть. Медколледженть сон прядызе якстере диплом марто. Седе тов бажась молемс тонавтнеме фармацевтэкс, ансяк се иестэнть тов эзть пурна те специальностенть коряс тонавтницят. Секскак тейтересь мольсь Н.П. Огарёв лемсэ МГУ-нь Медицинань институтонь «Лечебное дело» факультетэв.
Аня ней тонавтни омбоце курссо. Мелят интернетсэ сон несь видео, косо сынст институтонь студенттнэ ёвтнить медицинань отрядто: од ломантне ардтнить лия ошов, важодить больницясо, пурныть-таштыть превть-содамочить, теевить содавиксэкс лия паро ломантнень марто. Мекс бу а варчамс? Аннань кедьсэ ули медсестрань диплом, пелемс а мезде. Истя, сон мусь ялгат ды сыргась икелев! Сон понгсь «iMediс» минек университетэнь медицинань студотрядов.
Майстэ сынст пурнызь, ютавтсть тенст пелькстамот, теевсть боецэнь кандидатокс. Эрьва ие, бути бажат улемс отрядсонть – эряви ютамс «целина», те – ардтнемс важодеме. Ды Анна сыргась. Эштё вейке тонавтницянть Карина Каштанова марто сынь тусть Кемерова ёнксонь Новокузнецк ошов. Тетязо-авазо нолдызь сеске, покштянзо-бабанзо мелявтозевсть, кортавтсть эйсэнзэ кадовомс… Анянь учость малав колмо тёжат вайгельбеть ды колмо чить поездсэ ардома.
Тосо минек тейтертнень вастынзе «Атлант» медицинань весероссиянь отрядонь комиссарось. Те отрядсонть ульнесть Россиянь эрьва кодамо ёнкссто сазь студенттнэ, весемезэ 28 ломанть. Аннань ды ялганзо сеске саизь важодеме больницяв. Те – Г.П. Курбатов лемсэ Новокузнецк ошонь клинической васенце больницясь. Сон пек умонь ды ловови Сибирьсэ сехте покш больницятнень ютксто вейкекс. Од ломантнень вастынзе прявт врачось, ёвтась тенст паро валт.
Аннань саизь хирургиянь отделениянь перевязочноев медсестракс. Старшей медсестрась ды медбратось ёвтнесть тензэ, мезе теемс, свал лездасть валсо. Аня тапарясь керявкстнэнь, сыявкстнэнь. Редизь, тевезэ моли, ковонь ютазь тердизь процедурноев медсестракс. Истя сон кенерсь важодеме кавтонь таркава. Процедурнойсэ путнесь эрьва кодат уколт, онкстнесь температура, давления, важодиця ялгатнень марто усксесь ломантнень операцияв. Ульнесть дежурстванзояк. Теде башка, стакасто сэредицятнень андсь, макснесь симемс таблеткат ды ведь. Кой-кить тосо ульнесть сокорт, пильгевтеметь… стака лангозост ваномс. Аня чевтестэ кортнесь сэредицятнень марто, оймавтсь эйсэст.
Весть ульнесь операциясо, кона ютась ниле часонь перть.
– Вана тесэ мон чарькодинь, кодамо стака хирургонь важодемась! Ниле часонь перть аштемс стядо ды керсемс, теемс эсь теветь. Ды те эштё ловови аволь кувать – ниле част, лия операциятне седе кувать ютыть, – ёвтни Анна.
Больницянь коллективесь тонавтсь, невтнесь, кода ды мезе. Те пек паро лезкс студентканть туртов. Сэредицятнеяк эзть покорда, кортасть тензэ: «Иля пеле мездеяк!..» Мейле натой мерсть тензэ лиядомс тоско.
Больницясо важодемадонть башка, од ломантне кенерсть аламодо оймсемеяк. Малав эрьва чокшне студотрядось вастневсь, ютавтнесть эсест промкст. Сынь яксесть лейчирев, седясть гитарасо, морасть морот. Удсесть ансяк кавто-колмо част ды таго – важодеме. Од ломантнень а сизевтьсыть.
Важодемань семестрань прядомась ютась Кемерова ошсо. Тосо пурнавкшность весе студотрядтнэ, ламо ульнесть строителень отрядт. Медицинань – вейкине. Од ломантнень туртов тейсть кенярксчи ды казизь.
Анна а янкси, сыргась истямо васоло таркав. Тесэ тусь мелезэнзэ. Важодеманзо кисэ пандсть малав 30 тёжат целковойть. Эряви меремс, пандоматне эрьва кодат, те ашти седе, кодамо таркасо важодят. Ковидэнь госпитальсэ якстере зонасо важодицятненень, прививкань путницятненень пандыть парсте, тосо седе стака важодемскак.
Ней Анянь ушодовсь тонавтнемась. Сон бажи совамс волонтёртнэнь-медиктнень юткс, лездамс лиятненень. Сы иестэ тагояк ули мелезэ молемс важодеме медицинань отрядс.
Татьяна Маторкина