Неть читнестэ Саранскойсэ Эрзянь-мокшонь раськень драмань театрасонть ютавтовсь «Студ7Я» Равчирень федеральной округонь студентэнь семиятнень форумось. Сонзэ панжомасо ульнесть ПФО-нь Законодательной органтнэнь ассоциациянь, ПФО-нь од ломанень парламентнэнь ассоциациянь представительтне, студентэнь семиятне – форумонь кочкамонь этапонь изницятне.
Ледстясынек, масторонь Президентэнть Указонзо коряс 2024 иесь яволявтозель Семиянь иекс.
«Покш мель марто васттано тынк минек республикасо, минь – инжень вечкиця ёнкс. Шумбрат, студентэнь семият! – пшкадсь пурнавозтненень Мордовиянь Прявтось Артём Здунов. – Те форумось – пек покш ды эрявикс мероприятия: тесэ содавиксэкс теевемат, опытэнь максома, минь карматано лисеме сеть решениятнес, конат сюлмавозь студентэнь семиятнень кирдеманть марто. Мордовиясь совавтови «Семья» од нацпроектэнтень, вадрясто важодить минек вузтнэ – ваныть сень мельга, кода эрить студентэнь семиятне. Те истя жо пек эряви. Минек туртов прявтось: минь совинек ПФО-нь сисем регионтнэнь юткс, косо важоди 6% коряс семиянь ипотекась».
ПФО-со РФ-нь Президентэнь полномочной представителень полавтыцясь Олег Машковцев тешкстызе: «Семиянть эйстэ ашти эрьва ломанень тонавтомась-превс путомась. Невтемакс – ваннынк Федеральной Собраниянтень Кучома марто минек Президентэнь весе пшкадематнень. Мейстэ сон свал сынст ушоды – те демографиянь, семиянь, авакс улемань ды эйкакш пингень кевкстематнестэ. Те свал государстванть васенце тевензэ! ПФО-со ламо тееви семиянть ды семиянь питнейчитнень кирдеманть туртов. Ламо иеть минь ютавтынек «Успешная семья Приволжья» пелькстамо, сонзэ ёнкстнэ совасть «Россия – страна возможностей» Президентэнь платформань проектэнтень – 2023 иестэ яволявтозь «Это у нас семейное» пелькстамось, конасонть примить участия семиянь весе поколениятне. Ёвтан сюкпря Мордовия Республикантень ды законодательтненень, конат пурнавсть течинь форумонтень. Топавтодо меленк-бажамонк, ёвтадо од мельть-арсемат, конат лездыть семиятненень касомс-виензамс».
Равчирень федеральной округонь Российской Федерациянь субъекттнэнь государственной властень законодательной органтнэнь ассоциациянь координаторось, Нижегородской областень Законодательной Собраниянь председателесь Евгений Люлин тешкстызе: студентэнь семиятненень лездамонь практикатне улить масторонь эрьва кодат регионтнэсэ, ансяк сынь зярс апак вейсэндя.
«Вана сынст миненек эряви пурнамс вейс, – мерсь сон. – Зярыя читнеде икеле Госдумась васенце ловномасонть примась закон студентэнь семиятнень коряс. Те ушодксонь ёвтыцятнень ютксо истя жо ульнесть ПФО-нь законодательтне. Арсян, те виде эскелькс. Течи минь поладсынек те кортамонть, эряви бажамс теемс течинь практикатнень законтнэнь проектэкс».
Мордовия Республикань Государственной Собраниянть пингстэ Од ломанень парламентнэнь председателесь Виктория Богдашкина, од ломантненень пшкадемстэ, мерсь: «Тынь – минек масторонь вандынь чись. Кадык форумось карми ушодксокс од проекттнэнь тееманть туртов, конат полавтсызь аволь ансяк студенттнэнь, истя жо весе обществань эрямонть».
Теке жо чистэнть Н. П. Огарёв лемсэ МГУ-нь Раськень культурань ДК-со казизь Равчирень федеральной округонь студентэнь сехте ёроков семиятнень, конат кармасть «Студ7Я» студентэнь семиянь форумонь участникекс.
Форумонь сюпав программасонть ульнесть тонавтнемань ды культурной эрьва кодамо мастер-класст, кортамот, вастовомат, конатнесэ инжетне явовсть эсь содамочитнесэ, кортасть ПФО-нь регионтнэсэ демографиянь тевтнеде ды студентэнь семиятненень лезксэнь явомадонть.
Форумось пекставсь покш кортамосо ды шкинемань коллективтнень морамосо-киштемасо. Федерациянь Советэнь сенаторось Пётр Тултаев тешкстызе, неень шкасто студентэнь семиятнень икеле государстванть лезксэнзэ вельде панжовить седе ламо кенкшт. 2025 иень январень 1-це чистэ нолдави «Семья» национальной од проектэсь, конанть прявт тевезэ – ламолгавтомс эйкакштнень чачоманть, кастомс ламо эйкакшонь триця семиятнень ламочинть ды вадрялгавтомс сынст эрямонть.
Од мирдтненень-нитненень сенаторось мерсь кандовомс вейке вейкенень лембестэ, штобу улевель превейчи вечкемасо ды кемемасо эрямс сёрмав чертнес. Форумонь ледстнемань казнеть сон казсь Самарань областьстэ Потоцкийтнень, Татарстансто Ханмурзинтнэнь, Кировонь областьстэ Антипенкотнень семиятненень.
Н. П. Огарёв лемсэ МГУ-нь ректорось Дмитрий Глушко кармавтсь од семиятнень кемемс эсь лангс ды эсь седейпельксэнтень, вечкемс ды кенярдомс эрямонтень.
МР-нь Государственной Собраниянь Председателень полавтыцясь Наталья Долматова лембестэ вастынзе Од ломанень парламенттнэнь ассоциациянтень совицятнень, конатне истя жо сакшность форумов.
«Семия» валсонть ули истямо смусть – сисем Я-т. Лиякс меремс, мон кирдян вал ламо эйкакшонь семиянть кисэ. Ды пек эрявикс ёнксось, штобу те тевесь кармаволь эсь Тиринь масторонть кисэ ответственностекс, – мерсь сон.
РФ-нь ФС-нь Госдуманть юрсо Равчирень федеральной округонь Од ломанень парламенттнэнь ассоциациянь координаторось Владимир Москаленко тешкстызе, Российской Федерациясо лововить 17 тёжадо ламо студентэнь семият.
Истя жо форумонть юрсо Мордовиянь од ломанень центрасо ютась Ине Отечественной войнань историянь коряс тестэнь сермадома. Весемезэ ванновсть 40 кевкстемат ды сынст ютамост лангс од ломантненень макссть 40 минутат. Те акциясь ульнесь раськеютконь. Сон ютавтовсь вейсэ Беларусень ды лия масторттнэнь эрицятнень марто.