Неть читнестэ Республикань Кудосо ютавтовсь МР-нь Госсобраниянь сисемеце тердемань 45-це сессиясь. Сонзэ важодемасо ульнесь Мордовиянь Прявтось Артём Здунов. Чинь повесткасонть ульнесть 8 кевкстемат.
Сессиянть панжизе ды ветясь МР-нь Госсобраниянь Председателесь Владимир Чибиркин. Ушодовомстонзо сон пшкадсь пурнавозтненень истямо вал марто:
– Ушодовсь парламентэнь од иесь. Весе депутаттнэнь туртов сонзэ прявт тевезэ – ютазь иестэ Мордовия Республикань Прявтонть Артём Здуновонь МР-нь Госсобраниянтень Кучоманзо топавтомась, конась теевезь коень коряс кармась минек важодеманок программань документэкс. Кучомасонть тешкстазь: тевтнень топавтомадост ашти минек ёнкссо эрицятнень паро эрямост, целанек республиканть виевгадомазо.
Седе тов В. В. Чибиркин явсь мель сеть кевкстематненень, конатнень коряс икелепелевгак поладови лезксэнь максомась специальной военной операциянь участниктненень ды сынст семиятненень.
Минек республикасо 2022 иень мартсто саезь СВО-нь участниктнень ды сынст малавиксэст коряс депутаттнэ кемекстасть 15 законт. Кода мерсь Владимир Васильевич, неень шкане РФ-нь Госдумасо анокстазь ды анокт ванкшномс малав 20 законопроектт. Вельдест максови лезкс военнослужащейтненень ды сынст семиятненень. Башка мель карми явовомо сынст эйкакштненень. МР-нь Госсобраниясо истя жо анокстазь эштё вейке законопроект, конась ванкшнови те иень васенце кварталстонть.
2025 иень аравтлувдонть пачтямсто МР-нь Госсобраниянь Председателесь эрявикс тевекс ёвтызе демографиянь коряс стакачитнень витеманть, сеть эйкакштненень, конат эрить приёмной семиятнесэ, льготань пандомась, уроз эйкакштненень эрямо таркань максомась, студентэнь семиятненень лездамось. Весе теде кортави МР-нь Прявтонть Кучомасонть.
Владимир Чибиркинэнь валонзо коряс, республикасонок а седе вишкине мель эряви явомс национальной проекттнэнь эрямос совавтомантень. Депутаттнэнень седе пштистэ ваномс китнень витнемаст ды одс теемаст мельга, социальной сферань объекттнэнь строямост мельга ды истя седе тов.
Истя жо ледстязельть РФ-нь Президентэнть ушодксонзо коряс сеть национальной проекттнэ, конат эрямос совавтовить 2025 иень январень 1-це чистэнть саезь. Неть истят нацпроекттнэ, кода: «Семья», «Продолжительная и активная жизнь», «Молодежь и дети», «Кадры», «Экономика данных».
Депутаттнэ совавтсть полавтомат «О бесплатной юридической помощи в Республике Мордовия», «О внесении изменений в законы Республики Мордовия о выборах и референдумах в части изменения наименований органов исполнительной власти Республики Мордовия» неть ды лия законтнэс.
Сессиясонть кунсолозель МР-нь Госсобраниянь депутатонть, Н. П. Огарёв лемсэ МГУ-нь ректоронть Дмитрий Глушконь «Приоритет-2030» академической лидерствань стратегической виевгавтомань программанть тевс нолдамонзо лувсо университетэнть касомадо-виевгавтомадо ды Мордовия Республикань социально-экономической виевгавтомантень МГУ-нть путовкстонзо докладозо.
Мордовия Республикасо Ломантнень праваст коряс уполномоченноесь Валерий Лёвин пачтясь 2024 иестэ важодемадонзо. Сон тешкстась, мелят эрицятнень пельде сыненст састь 1783 пшкадемат, эйстэст лезкс максозь 343 ломаннень.
МР-нь Прявтось Артём Здунов ёвтась поздоровт республикань Госсобраниянтень 30 иетнень топодеманть коряс. Сон тешкстась, те шканть перть теевсь республикань правовой базась. Мордовиянь Конституциянть ёвтызе кеме фундаментэкс. Истя жо сон ёвтась сюкпрянь валт депутаттнэнень СВО-нь участниктненень ды сынст семиятнень туртов лезксэнь максоманть кисэ.
Валентина Юдина