Аволь умок Мордовия Республикань Госсобраниясо ютась МР-нь Государственной Собраниянть юрсо теезь общественной Од ломанень палатань промксось. Чинь повесткасо ульнесть вейксэ кевкстемат. Васенцесь алтавсь «Своих не бросаем» творческой важодевкстнэнь коряс изницятнень лемест ёвтамонтень ды сыненст казнетнень максомантень. Сонзэ панжизе ды ветясь МР-нь Госсобраниянь Председателесь В. В. Чибиркин.
Тешкстасынек, «Своих не бросаем» пелькстамось ютавтовсь сеть од ломантнень ды эйкакштнень туртов, кинень 7–18 иеть. Те пелькстамосонть ёрокчист невтизь Саранскойстэ ды республикань районтнэстэ малав 700 цёрынеть ды тейтерькат. Сынь анокстасть специальной военной операциянь участниктненень сёрмат, стихотвореният ды артовкст.
Торжественной пельксэнть ушодовомсто пурнавозтненень пшкадсь МР-нь Госсобраниянь Председателесь Владимир Чибиркин. Владимир Васильевич тешкстась, «Своих не бросаем» национальной лозунгось ашти эрьва патриотонть седейсэ. «Минь покш кенярксчисэтяно сень коряс, те пелькстамось теевсь эрявиксэкс школасо ды вузсо ламо тонавтницятненень. Жюринтень пек стакаль кочкамс сехте партнэнь, эдь эрьва важодевкссэнть минь рединек аволь ансяк авторонть парсте тееме покш бажамонзо, истя жо алкуксонь мелявтома Россиянь солдаттнэнь кисэ», – мерсь Владимир Васильевич.
Сонзэ валонзо коряс, пелькстамонь весе важодевкстнэ ильтявить СВО-нь участниктненень ды максовить военнослужащейтненень. Мордовиясь теи весементь, мезе сонзэ вийсэ боецтнэнень весе эрявиксэнть пачтямга.
Ветеранось, СВО-нь участникесь Сергей Пронькин ёвтась сюкпрянь валт мобилизованной участниктненень лезксэнь максоманть кисэ ды пачтясь седе, кода передовойсэ солдаттнэ ды офицертнэ седейшкава ловныть сёрматнень ды ванкшныть эйкакшонь артовкстнэнь, ванстыть эйсэст ды одс ловныть.
«Своих не бросаем» конкурссо изницятненень казнетнень максызь МР-нь Госсобраниянь Председателесь Владимир Чибиркин, сонзэ полавтыцязо Наталья Долматова ды МР-нь Госсобраниянь депутатось, Од ломанень парламентэнь прявтось Виктория Богдашкина.
Те мероприятиясонть эйкакштне ды од ломантне аволь ансяк сюкпрянь валт ёвтасть, истя жо анокстасть ды ловность седейс токиця стихотвореният.
Седе тов Од ломанень парламентэсь ванкшнось лия кевкстемат, конат совасть чинь повесткантень.
Валнтина Юдина