Ютазь цетьверькстэ Мордовиянь Государственной Собраниясо ёвтазельть «Законось ды властесь» журналистэнь конкурсонь цётамотне. Изницятне – республикань ды райононь СМИ-тне, конатне сёрмадыть минек республикань парламентэнть важодемадо, депутаттнэде ды сынст тевтнеде, казезельть дипломсо ды премиясо.

Казнетнень явшизь Госсобраниянь Председателесь Владимир Чибиркин ды аппаратонь прявтось Елена Савинова. Тешкстасынек, «Эрзянь правда» газетась сайсь омбоце тарка «Молодёжный парламентаризм» номинациясонть.

– Ёвтан тенк покш сюкпря ёроков важодеманть, депутатской корпусонть тевтнеде ёвтнеманть кис, республикасонть паро полавтоматнень редямотнень ды ловныцятненень-ваныцятненень пачтямонть кис, – тешкстась Владимир Чибиркин.

Сон истя  жо ёвтась лембе валт седе, кода СМИ-тне ёвтнить специальной военной операциядонть, кода сынь лездыть боецтнэнень, сынст семиятненень, кепедить виест ды оймест.

Владимир Чибиркин журналисттнэнь ютксто тешкстызе «Темниковские известия» райононь газетань прявт редакторонть Анжелика Лебедевань, конань цёразо ней СВО-нь зонасонть, ёвтась тензэ ламо лембе валт ды казсь Сюкпрянь сёрма истямо кеме цёранть кастоманть, изнямонтень виень максоманть кис.

– Мон содан, тынь мадтядо ды стятадо сонзэ кисэ озноматнень марто. Сюкпря тыненк ды весе аватненень, конатне кастсть истят эйкакшт, конатне ванстыть минек масторонь суверенитетэнть, – мерсь МР-нь Госсобраниянь Председателесь. Истя жо сон тешкстась: РФ-нь Президентэнь сыця кочкамотне кармить те иень сехте прявт тевекс, эрьва кочкицянтень эряви  пачтямс те мероприятиянть эрявиксчидензэ, бажадо молемс кочкамонь участкатнес ды кирдемс эсь кандидатонть. Ламось те тевсэнть ашти СМИ-тнень эйстэяк.