Неть читнестэ МР-нь Госсобраниянь Председателесь Владимир Чибиркин макссь паспортт Российской Федерациянь граждантнэнень. Те мероприятиясь алтавсь региононь парламентэнтень 30 иетнень топодемантень. Сехте эрявикс документтнэ явшезельть Саранск ошонь школатнесэ ды лицейсэ тонавтницятненень, общественной активисттнэнень ды парсте тонавтницятненень.
Кода мерсь Владимир Васильевич, паспортось кармавты эрьва ломаненть улемс патриотокс, вечкемс ды важодемс тиринь масторонть лезэс. Сон тешкстызе те документэнть эрявиксчинзэ. Башка мель явсь сенень, кодамо шкасто ютавтови те промксось. Ледстинзе минек покштятнень путовксост Ине Изнямонь чинть малавгавтомасо, уцяскав эрямонть каземасо. Владимир Васильевич истя жо кортась СВО-нь участниктнеде. Сон кармавтсь од ломантнень парсте тонавтнеме, паро тевень тееме.
Школасо тонавтницятне эсь ёндо ёвтызь мелест, РФ-нь гражданинэнь паспортонть максомась сынст туртов кармась талновтыця ды пек ответственной тевекс.
Валентина Юдина