Маень 29-це чистэ Владимир Чибиркинэнь прявтсо ютась Мордовия Республикань Государственной Собраниянь сисемеце тердемань кодгеменце сессиясь. Сонзэ важодемасо ульнесть региононь Правительствань, Мордовия Республикань Прявтонь ды Мордовия Республикань Правительствань Администрациянь члентнэ, министерстватнень ды ведомстватнень, муниципальной районтнэнь прявттнэ.
Кевкстематнень покш пельксэсь сюлмавозель бюджетэнь политикань енксонть марто. Кемекстазь Мордовия Республикань бюджетэнть ды ТФОМС-нь бюджетэнть 2025 иестэ топавтомадо МР-нь законтнэ.
Весемезэ сессиясонть депутаттнэ ваннызь промксонь повесткань 16 кевкстематнень.
«Об организации и обеспечении отдыха и оздоровления детей в Республике Мордовия» МР-нь закононтень совавтозь положениясь, эйкакштнень оймсемаст ды шумбрачист витемаст ладямонь кевкстематнень коряс Межведомственной комиссиянть прявтсо высшей должностной лицясь – Мордовия Республикань Прявтось.
«О выборах Главы Республики Мордовия», «О выборах депутатов Государственного Собрания Республики Мордовия» ды «О выборах депутатов представительных органов муниципальных образований в Республике Мордовия» законтнэс полавтоматне совавтозь «Об основных гарантиях избирательных прав и права на участие в референдуме граждан Российской Федерации» федеральной Законсонть меельце полавтоматнень мельсэ кирдезь. Те лезды вадрялгавтомс норматнень, конат токшить республикасонть кочкамотнень анокстамонть ды ютавтоманть, лезды вадрялгавтомс кочкамонь процессэнть.
Совавтозь полавтомат Мордовиянь башка законтнэс административной ответственностень правовой регулированиянть одкстомтомга.
«О квотировании рабочих мест для отдельных категорий граждан, особо нуждающихся в социальной защите» МР-нь Законось ладязь федеральной законодательствасо од норматнень коряс. Ней инвалидтнэнь важодеме саемань квотась кемекстави аволь ансяк филиалтнэнень ды представительстватненень, истя жо важодемань таркатнень максыцянь структурань лия подразделениятненень. Квотань покшолманть важодемань таркатнень максыцятне кармить ловомо эрьва кварталсто, икеле кварталстонть важодицятнень среднесписочной ламочист лангс нежедезь.
Теде башка, тешкстазь инвалидтнэнь важодемань таркатнень муемадо вейсладямонь условиятне ды кемекстазь важодемань ды занятостень сферасо сынст праваст коламонть кисэ административной ответственностень коряс нормась.
Кирдезь Инсаронь, Краснослободскоень ды Темниковань районтнэнь Депутаттнэнь советтнэнь законодательной ушодкстнэ.
Законтнэ кемекстазь неть муниципальной районтнэнь границятнень тешкстамонть ды Роскадастрань даннойтнень коряс сынст ладямонть туртов.
Сессиясонть Мордовиянь Госсобраниянь местной самоуправлениянь кевкстематнень коряс комитетэнть ушодксонзо коряс совавтозь полавтомат неень шкань законтнэс, конатнесэ кемекстазь Саранск ошонь ды Орданьбуень, Отяжелень, Краснослободскоень ды Чаунзань районтнэнь башка муниципальной образованиятнень границятне. Неть законтнэнь текстсэнть «муниципальной район» валтнэ полавтозь «муниципальной округс».
Мордовиянь Госсобраниясь евтась мель совавтомс полавтомат «О пробации в Российской Федерации» федеральной Закононтень.
Законодательной ушодксось кучови Россиянь Госдумас. Истя, невтемакс, чумондозь ломантненень эли кудонь арестсэ аштицятненень, мереви пшкадемс лезкс мельга пробациянь куншкакуротнес. Тешкстави, што чумондозь ломантненень, конатнень коряс тевс нолдави исполнительной пробациясь, сеедьстэ эряви нурька шкас эрямо тарка, ансяк сынст путомс пробациянь куншкакуротнес а мереви правовой регулированиянь механизманть арасьчинзэ кувалма. Эрямо таркавтомо ресоциализациянь тевесь стакалгады ды касы зыянов тевтнень рецидивень рискесь.
Законопроектэсь аравтозь пробациянь лезэвчинть кастомантень, преступностенть ды уголовно-исполнительной инспекциятнень лангс нагрузканть киртямонтень.
Истя жо сессиясонть депутаттнэ кирдизь Саранск ошонь Октябрьской райононь 3 № судебной участкань мировой судьякс Татьяна Данилинань аравтомадо кевкстеманть.
Юлия Еремина