Неть читнестэ Республикань Кудосонть ютась МР-нь Госсобраниянь сисемеце тердемань ведьгемень нилеце сессиясь. Сонзэ панжизе ды ветясь Председателесь Владимир Чибиркин. Важодемасонзо ульнесь Мордовиянь Прявтось Артем Здунов. Чинь повесткантень совавтозельть 15 кевкстемат, ламотнесэ кортавсь налогтнень пандомадо ды сынст коряс льготатнеде. Мордовия Республикань башка законтнэ теевсть федеральной законодательстванть коряс.
Депутаттнэ васенцекс ванкшнызь «О межбюджетных отношениях в Республике Мордовия» МР-нь Закононть. Сонзэ коряс толковамот тейсь МР-нь финансонь министрась Сергей Тюркин, кортамось ульнесь республиканской бюджетэнь субсидиятнеде.
Республикань высшей законодательной органонь представительтне совавтсть полавтомат модань коряс законопроекттнэс. Ней питневтеме модань участка максови аволь ансяк специальной военной операциянь сеть участниктненень, кинь ули «Россиянь Герой» лемесь ды казезь Российской Федерациянь орденсэ, истя жо военнослужащейтненень, кинень СВО-нть пингстэ максозь государственной медальть, ды сынст семиятненень.
Полавтомат совавтозь «Об отдельных вопросах организации перевозок пассажиров и багажа легковыми такси в Республике Мордовия» Закононтень. Сонзэ коряс такситнень кузоваст кармить улеме аволь ансяк ашот ды ожот, совавтовить раужо ды цитниця сермав тюстнэ.
Истя жо федеральной законодательстванть коряс теезь истят законопроекттнэ, кода «О внесении изменений в Закон Республики Мордовия «О противодействии коррупции в Республике Мордовия», «О внесении изменений в отдельные законы Республики Мордовия о наделении органов местного самоуправления государственными полномочиями» ды лият. Сынст коряс пачтямот тейсь МР-нь Госсобраниянь Председателень полавтыцясь, Законодательствань ды законностень коряс комитетэнь прявтось Валерий Алехин.
Сессиясонть ванкшновсть эште ламо лия кевкстемат, конат токить Мордовиянь оштнесэ ды велетнесэ ломантнень эрямост.