Рузонь Православной Церькованть ды РФ-нь Просвещениянь министерстванть лезксэст вельде масторонь весе федеральной округтнесэ ютавтови «За нравственный подвиг учителя» эрьва иень пелькстамось.

Те – тонавтомасо ды эйкакштнень, од ломантнень марто важодемань коряс Весероссиянь конкурс. Тедеде сон ютавтови комсецеде.

Истя, Мордовиянь Государственной Собраниясо неть читнестэ важодсь те конкурсонь регионъютконь пельксэнь экспертэнь комиссиясь. Саранскоев сакшность инжеть ПФО-нь зярыя регионсто. Сыненст эрявсь ванкшномс 52 важодевкст ды кочкамс сехте виевтнень, вадрятнень, лия енов а молицятнень. Изницятнень юткс понгить ансяк 5 ломанть.

– Эйкакштнесэ, нама, эряви кастомс чачома енксонтень, тиринь масторонтень вечкема, содавлизь сюпав историянок, коенек-кирданок, культуранок. Церькованть ды масторонок икеле вейсэнь тевть – явомс покш мель эйкакштненень, максомс тенст кеме содамочить, – кортась МР-нь Госсобраниянь Председателесь Владимир Чибиркин.

– Кирилл Патриархось баславизе ютавтомс те пелькстамонть Саранскойсэ. Тонавтыцякс ульнесь сонсь Спасителесь. Эрьвась, кие вечкема марто касты эйкакшт, тонавты парос – канды валдо минек од ломантненень. Сюкпря весе тонавтыцятненень, кить явсть мель пелькстамонтень. Конкурсось прядови Московсо ды сонзэ изницятне тердевить Государственной Думав эли Федерациянь Советэв, – пачтясь Саранскоень ды Мордовиянь митрополитэсь Зиновий.

Конкурсось ловови церковно-государственной покш пелькстамокс, сонзэ ютавтомс лездыть ПФО-со Россиянь Президентэнь полномочной представительтне. Тонавтыцятне невтить эрьва кодат проектэст: духовно-нравственной программат, мельстуиця урокт, тиринь ошка содавикс таркатнева экскурсият, налксемат ды седе тов. Изницятне кочкавить ниле номинациятнева.

Татьяна Маторкина