Пятница, марта 29, 2024
Важное

 

Декабрянь 12-це чистэ Мордовия Республикань Государственной Собраниянь покш залсонть ульнесь промкс, конась алтавсь РФ-нь Конституциянь чинтень. Саранскоень ды Рузаевкань оштнесэ тонавтницятнень марто ютавтовсь парламентэнь урокт ды вастовомат МР-нь Госсобраниянь  Председателенть «Единая Россия» Партиянь МРО-нь Секретаренть В.В.Чибиркин марто.

Республикань законодательной властень органонть важодеманзо марто содавиксэкс теевемась ушодовсь историянь музейстэ. Малав сядо тейтерькат ды цёрынеть теевсть содавиксэкс Мордовиянь парламентэнть историянзо, неень шкань депутаттнэнь тевдест ды кочкицятнень марто важодемадост.

Теде мейле од ломантненень поздоровт Конституциянь чинть кувалма ёвтась В.В.Чибиркин. Сон мерсь: Те сехте эрявикс законсонть ёвтавить российской обществань весе представительтнень олячинь праваст, ков совавтовить од ломантнеяк.

Владимир Васильевич сыненст пшкадемасонть тердинзе весе виест путомс содамочист кастомантень, ёрокчист келейгавтомантень, сы шкань профессиянть видестэ кочкамонтень. Тень пингстэ свал мельсэст-превсэст кирдемс минек эрявикс закононть.

В.В.Чибиркин мерсь тонавтницятненень, эдь самай од ломантнеде маласо шкасто ашти республиканть, масторонть вандынь чизэ. Сыненст эряви поладомс тетятнень-аватнень, покштятнень-бабаятнень тевест. Тень ловозь эрьвантень эряви важодемс эсензэ лангсо, невтемс тевензэ общественной вейсэндявкстнэсэ, ютавтомс мероприятият, конатнень ютксто ламотненень ушодкс путсь РФ-нь Президентэсь В.В.Путин. Тонавтницятне макснесть кевкстемат высшей законодательной органонь прявтонтень. Сынст талновтсть течинь эрямосонть вастневиця стакачитне, кепедсть кевкстемат, конатне зярс улить школатнесэ ды тонавтнемань лия заведениятнесэ. Эсь ёндо В.В.Чибиркин алтась, сыненст икелепелевгак кармить лездамо депутаттнэ.

Седе тов пурнавозтнень икеле кортась «Единой Россиянь» Молодой Гвардиянь региононь отделениянь прявтонь полавтыцясь Илья Заугольников. Сон ловнось лекция Российской Федерациянь Конституциядонть ды сонзэ историядонзо.

– Российской Федерациянь Конституциясь – те минек масторонь основной закон, – мерсь Илья Заугольников. – Сон кемекстазель 1993 иень декабрянь 12-це чистэ, Россиясо корязонзо эрятано 26 иеть. Неень шкане, кода зярдояк пек чарькодема те высшей юридической закононть эрявиксчинзэ ды топавтомс сонзэ статьятнень. Правовой грамотностень топавтоманть покш таликазо неень шкань обществасонть. Од поколениянтень эряви содамс основной закононть ды маштомс сонзэ тевс нолдамо. Те документэсь кемекстазель масторонть туртов стака шкасто, лезэнть  эйстэнзэ редятано неень шкане.

Седе тов Илья Заугольников пачтясь молодогвардеецтнэнень те ёнкссонть важодемадост, сынст од проекттнэде, конатнень сынь совавтыть эрямос школатнесэ.

Вастовомасонть тешкстазель, МР-нь Госсобраниясо од ломантнень марто вастовоматне теевсть коекс. МР-нь Госсобраниянь прявтось сеедьстэ вастневи школасо, вузсо тонавтницятнень марто, лезэсь теде эрси кавто ёнксонь.

Текенень полдадсынек, декабрянь 5-це чистэ В.В.Чибиркин «Единая Россия» ВПП-нь Генеральной Советэнь Президиумонть решениянзо коряс совась робочей группас од ломантнень ушодксост поладоманть коряс.

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».