«Земля добра» проектэнть лувсо Саранскойсэ ютавтовсь семинар, конась алтавсь специальной военной операциянь ветерантнэнень республикань велень хозяйствань предприятиятнесэ важодема таркань явомань кевкстематненень. Мероприятиясонть ульнесть РФ-нь Государственной Думань депутатось Юлия Оглоблина, МР-ва «Защитники Отечества» фондонь филиалонь прявтось Алексей Герасименко, МР-нь Правительствань Председателень полавтыцясь Раиса Цыбизова ды специальной военной операциянь ветерантнэ.

Юлия Оглоблина евтась сюкпря фондонь важодицятненень ды профильной ведомстватнень представительтненень СВО-нь ветерантнэнь туртов важодема таркань муемань коряс кевкстемантень мелень явоманть кис. Алексей Герасименко мерсь, тень коряс лезксэнь явомась – пек эрявикс тев, конась лезды ветерантнэнень велявтомс мирной эрямонтень. «Фондонть панжомань васенце читнестэ саезь важодема таркань муемасо лезкс максозь 39 ломаннень, конатнень эйстэ 34 уш роботыть, – мерсь Герасименко. – «Школа фермера» программанть лувсо тонавтнема ютасть СВО-нь 2 ветерант, эште 7 ломанть каясть яволявтома те иестэ. Кавтотне кармасть самозанятоекс, вейкесь – индивидуальной предпринимателекс ды каясь яволявтома «Агростартап» грантонть лангс, конань покшолмазо 4 млн целковойде седе ламо».  

Раиса Цыбизова евтнесь велень хозяйствасо важодемань вадря енкстнэде ды седе, отраслянтень эрявить квалифицированной кадрат. Истя жо тешкстызе, Мордовиясь васенце ПФО-со АПК-нь енкссо зарплататнень коряс. Аграрийтнень средней зарплатась малав 66 тежат целковойть, механизатортнэ получить 200 тежасто саезь, агрономтне – 150 тежадо ламо.

«Защитники Отечества» Госфондонь филиалось поладсы спецоперациянь ветерантнэнень важодема таркань муемасо лезксэнь максоманть. Те кевкстеманть коряс мереви пшкадемс социальной координаторонтень.

Фотось «Защитники Отечества» фондонь филиалонть.