Кочкурбуень Семилейсэ улемстэ минь якинек инжекс Пяткинтнэнь семиянтень. Анна Александровнань ды Юрий Викторовичень ниле эйкакшост. Те эрзянь веленть марто сынь сюлмавсть 2010 иестэ, зярдо састь «Агрофирма «Норов» ООО-в важодеме. Мелезэст пек тусь ды кадовсть теске.
Предприятиясь макссь тенст од кудо, конань сынь паролгавтызь. А эряви ардтнемс республикань томбалев, зярдо тескеяк муеви вадря робота ды улить эрямонь весе условиятне. Семилейсэ ули эйдень кужо, школа, Культурань кудо, ФОК, церькова. Ули весемесь, ансяк эряк ды важодть.
Анна Александровна вастымизь мельспаросо, куроксто тердимизь совамс кудов. Кедьпесэнзэ ветясь эйдень кужосто вишка церынензэ. Кириллнэнь неть читнестэ топодсть ниле иеть. Сон дивсезь ванкшнось редакциянь инжетнень, штюпизе покш фотоаппаратонть, содавтымизь мазый псакаст ды налкшкензэ марто.
Анна чачсь Отяжеле поселкасо. 9-це классонь прядомадо мейле мольсь тонавтнеме Отяжбуень аграрной техникумов. Тетязо, Александр Николаевич Кирдяшкин, эрямонзо перть важодсь сварщикекс. Сон ульнесь сетнень ютксо, кить минек республикасо васенцекс ветнесть районтнэва «сэнь толонть». Авазо, Валентина Владимировна, роботась больницясо санитаркакс. Анянь ули Наташа сазорозо, сон эри Отяжелесэ. Ансяк вана тетяст-аваст тусть уш эрямосто. Тейтертне эрьва чи ледстнить, зяро лембе сынь тенст макссть. Анна ранаяк лиссь мирденень, 18 иесэ чачсь церынезэ. Истя лиссь, одтнэ кувать эзть эря вейсэ, кист явовсть. Шкань ютазь вастызе уцясканзо.
Юрий марто сынь теевсть содавиксэкс сазоронзо свадьбасо. Церась прядызе Н. П. Огарев лемсэ МГУ-нь Аграрной институтонть, тонавтнесь агрономокс. Юрий чевте седей, лиянь кис мелявтыця, паронь арсиця. Шкань ютазь Юрий ды Анна сюлмизь эрямост. Васня сынь эрясть Саранскойсэ. Мейле Юрань тердизь роботамо «Норов» Агрофирмань сюронь лабораториянь прявтокс.
– Семилеев сынек 15 иеде икеле. «Норовось» макссь эрямо тарка. Мон васня карминь роботамо пекарнясо кшинь паницякс, мейле бухгалтерэкс, седе тов ладимизь пекарнянь прявтокс. Кавто иень ютазь весемесь тонадовсь, велесь пек вечкевсь. Арсинек-теинек кадовомс эрямо теске. Мирдем роботась сывелень переработкань комплекссэ прявт инженерэкс, седе тов – Ташто Мурзасо видьмексэнь заводсо механикекс. Монгак декретс туемадо икеле роботынь сывелень комбинатсо колбасань формовщикекс. Ней уш Семилеесь кармась тиринь модакс, вечкевикс таркакс. Ули пиренек, эйкакштне – васенце лездыцянок, – евтни Анна Александровна.
Пяткинтнэ евтыть покш сюкпря «Норов» Агрофирмань прявтонтень А. И. Поздняковнень. Предприятиясь макссь од кудо, сонзэ паролгавтомга – 1 миллион 200 целковоень покшолмасо субсидия. Кудось кавто этажсо, ули зал, ниле спальнят, кухня. Теде башка, кенярксчитнес предприятиясь казни ярсамопелень наборт. Эйкакштнень школав молемадо икеле тагояк максыть казнеть.
Эйкакштне – кеняркс, уцяска, сюпавчи
Васенце церантень, Владиславнень, ней 25 иеть. Сон прядызе Саранскоень промышленно-экономической колледженть. Служась армиясо. Васня важодсь «Норовсо» строителекс. Мейле тусь эрямо Саранскоев. Ней роботы ликероводочной заводсо. Сон эйкакш пингестэ саезь пек вечксы футболонть. Нейгак налкси эрьва кодамо клубсо, яви мель кизэнь ды телень турниртнэнень. Паро налксеманть кис аволь весть казевсь покш казнесэ.
Тимофей чачсь 2005 иестэ. Мелят прядызе Саранскоень кооперативной институтонь СПО-нь отделениянть. Сон чарькоди ды вечки программированиянть, компьютер экшсэ важодеманть. Ней уш учи армияв повестка.
Ленань чачоманзо учость семиянек. Церынькатненень эрявсь сазорка, тетянтень-авантень – тейтерь. Сон чачсь 2014 иестэ. Ней тонавтни Семилеень средней школасо нилеце классо. Кенери парсте тонавтнемеяк, яви мель шкинемантеньгак – кишти коллективсэ. Киштемань коряс мартост важоди классной руководителест Мария Николаевна Биушкина, сон яви покш мель эйкакштненень. Мелявты, илязт аште тевтеме, бажи саемс сынст пелькстамотнес, невтемс ерокчист эрьва кодамо конкурссо. Тетятне-аватне евтыть сюкпря тонавтыцянтень.
Кирилл чачсь 2021 иестэ. Мелят кармась яксеме «Цягадайка» эйдень кужов. Кода весе церынькатне, пек вечки налксеме конструкторсо, роботсо, машинынесэ. Свал чийни лелятнень перька, терди налксеме ды невтни ламо налкшкензэ.
– Лена бажась тонавтнемс седямо гитарасо, раминек гитара. Кадык варчи. Бути а лиси, мезеяк берянесь арась. Зярдояк а мольтяно эйкакштнень каршо, а мертяно, мезекс те тонеть эряви. Мезе парось, кавто церан – Владислав ды Тимофей – уш покшт. Сынь монь васенце лездыцян кудосояк, пиресэяк. Оймсема читнестэ свал пурнавтано весе вейсэ. Мон яла пидян-панян мезеяк тантейне, каванян сынст, – евтни Анна Пяткина.
Аннань сазоронзо Натальянь истя жо ниле эйкакшонзо: колмо церынеть ды вейке тейтерне. Покш кеняркс, зярдо семиятне вастовкшныть. Сынст бабасткак ульнесть ламо эйкакшонзо.
Кудазорось Юрий Викторович 2023 иестэ тусь СВО-в. Сон сермадстсь контракт. Нама, те кулясь тандавтызе Анна Александровнань. Ансяк мирдесь мерсь, сонензэ эряви молемс тов. Сеедьстэ гайневти телефонга. Зярыяксть сакшнось отпусков, нейгак сыця, семиясь эйсэнзэ пек учи. Юрий вечксы охотанть, вирьга якамонть, калонь кундсеманть. Парсте мусь кель-вал Владиславонь марто, сынь теевсть паро ялгакс. Сон свал лезды нинтень кудоютконь тевтнесэ.
Пяткинтнэ эрить ояксчисэ, вейке-вейкень мелень ванозь, лездазь ды чарькодезь. Сынь паро невтевкс лиятнень туртов. Истят семиятнень мельга минек масторонть вандынь чизэ.
Татьяна Маторкина