Октябрянь 2-це чистэ Мордовиянь Прявтось Артём Здунов содавтызе Ромодановань райононть. Пушкина велесэ сон якась Воскресения Христова храмонтень 220 иетнень топодеманть кувалма сюкпрянь ёвтамонь молебенэнтень.

Советской шкасто церьковась пекстазель ды пелезэ яжазель. Сонзэ вельмевтемантень кундасть 2011 иестэ, ансяк тевесь ютась састо. Седе эрязасто тевтне ушодовкшность кавто иеде икеле. Ней храмонть улить эсензэ баяганзо, моли важодема зданиянь прявт пельксэнть одкстомтоманзо коряс.
Мордовиянь Прявтось ёвтась сюкпря весенень, кить лездыть кезэрень церькованть вельмевтемасо, ды тешкстызе, те пек эрявикс вейсэнь тев.

Зиновий митрополитэсь, пурнавозтненень пшкадемстэ, арсесь весенень Пазонь чанстямо, ды васняяк – воинтнэнень, кить ней ванстыть минек масторонь рубежтнень.
Артём Здунов вастневсь Пушкинань эрицятнень марто. Ромодановань райононь прявтонть Сергей Ведяшкин марто кортынзе велень вадрялгавтомань коряс арсематнень – неть тевтнес арсеви явомс грантонь ярмакт, эрявикс документтнэ уш максозь. Истя жо толковавсть райононть социально-экономической виевгавтомань кевкстематне, госпрограмматнень ды национальной проекттнэнь топавтомась. Сон ваннызе Ромодановасо Маяковскоень куросонть ламо квартирань кудонть, конась стявтозь эрицятненень каладозь кудотнень таркас од кудонь максомань программанть коряс. Ломантне уш курок совить од квартиратнес. Артём Здунов макссь зярыя кармавтомат строицятненень кудонть перька тарканть вадрялгавтоманзо коряс.

Артём Здунов истя жо кортась Сергей Ведяшкин марто лия социальной объекттнэнь строямонь коряс арсематнеде, истя жо макссь кармавтома ушодомс ламо функциянь спортонь комплексэнь проектированиянть.

Эштё вейке прявт кевкстемась – китнень строямось. Тедеде Ромодановань районсо витневить малав комсь вайгельбеть кить – те седе ламо икеле иетнень коряс. Мордовиянь Прявтось ваннызе витневиця кинь пельксэнть, конась вейсэнди Ромоданованть ды Саранск-Ульяновск кинть.

Ромодановань районсо улемстэ Мордовиянь Прявтось истя жо якась «Ромодановосахар» предприятиянтень. Артём Здунов кортась Правительствань Председателенть Владимир Сидоров ды «Ромодановосахаронь» руководителенть Александр Атласов марто производствань одкстомтомань программадонть.