«Мордовская республиканская станция по борьбе с болезнями животных» ГБУ-нь Отяжбуень ветеринарной станциясь важоди умонь шкасто саезь. Шканть марто вейсэ полавтови эрямось, нолдавить ракшатнень туртов од вакцинат ды лецямопельть, андомаст коряс тевс нолдавить од вешемат.
Тесэнь важодицятне пштистэ ваныть районсо эпизоотической тевтнень мельга, ракшатненень шкастонзо теить эрьва кодамо ормадо вакцинат; парсте ваныть сень мельга, кодамо продукция нолдави (экспертиза тееви сывелентень, ловсонтень). Ракшань орматнень каршо бороцямонь коряс станциянь прявт врачокс важоди Юрий Николаевич Егорцев, кона пачтясь тенек ветеринарной службань тевтнеде ды тесэнь важодицятнеде, конатне, эрси, оймсема чистэяк, ветькак пильге лангсот.
– Минек ветеринарной станциянтень совить Козловкань, Вечерлеень, Сабанцелень ды Ботужелень ветлечебницатне. Важодицятнеде весемезэ 76. Неть: участкань прявт ветврачт, ведущей ветврачт-эпизоотологт, ветфельдшерт, санитарт ды седе тов. Эрьва ие ломантне ютыть квалификациянь кастомань курсат. Ули ветлабораториянок. Теде башка, «Атяшевский» сывелень комбинатонть юрсо ули государственной ветеринарной контролень отдел. Ветеринариянь коряс тевенек топавттано эпизоотической аравтлувонь коряс. Иень перть эрьва чи ветяви важодема. Саемга, ули орматнень а нолдамга вакцинациянь коряс схема. Ансяк скалось вазыи – вазонтень тееви вакцина, колмо ковонь ютазь – таго. Максовить витаминт. Берянь ормадо ванстовить весе ракшатне ды нармунтне.
Райононь велень хозяйстватнесэ трявить-кастовить 8410 скалт ды букат. Сынст ютксто 3440 скалт, 42 155 тувот, 515 реветь, 558 тёжат нармунть.
Бути кортамс кудосо кирдевиця ракшатнеде, тесэ цифрась лия. Иеде иес сон полавтови. КРС-нь – 892 прят, сынст ютксо 173 скалт, тувотнеде 1440, сеят ды реветь – 2458, – пачтясь Ю. Н. Егорцев.
Ветврачтне истя жо яксить кудова, берянь ормадо путнить вакцинат весе ракшатненень. Покш мель явить азаргадоманть каршо бороцямонтень (бешенство). Меельце иетнестэ виртнестэ сакшныть ламо ривезть. Иезэнзэ кавксть, тунда ды сёксня, ветстанциясь пурны бригада, ков совить охотникть. Вейсэ сынь виртнесэ ладсить вакцина сеть таркатнева, кува чийнить ривезть. Те Аловеленть, Ламбаськенть, Вечерлеенть вакссо. Кискатненень ды псакатненень истя жо теевить вакцинат. Омбоце ие районсонть ракшатнень азаргадомат арасельть.
– Тедеде минек лабораториясь ютась госаккредитация. Бажатано седе тов седеяк келейгавтомс лабораториянть. Раматано од приборт, биохимической анализатор, рефрактометрат. Сынст вельде верень вейке петнявксонть коряс саеви ламо информация. Вадря экспертиза карматано тееме ловсонтень. Паро ловсось ашти седе, мезде андыть скалонть, – корты прявт ветеринарной врачось.
Неень шкане ракшань орматнень каршо бороцямонь коряс станциянь важодицятне ванкшныть районсо скалонь-вазонь кирдема таркатнень. Кона кардотне витнезь-петнезь, тосо ютавтыть дезинфекция. Август ковсто ютавтыть дезинфекция Киржемансо, Аловелесэ, Сабанцелесэ. Теленень вазонь кардотне улезт ванькст.
Ю. Н. Егорцев сюкпрянь валт ёвты коллективензэ туртов, конат ламо иень перть важодить вейсэ. Весе сынь – эсь тевень содыця алкуксонь специалистт. Николай Александрович Барсуков ветеринариясо весемезэ 44 иеть. Ветстанциясонть роботы 23 иень перть. Васня 1978 иестэ прядызе Краснослободскоень зооветеринарной техникумонть, а вана 1985 иестэ – Казанень ветеринарной институтонть. Важодеме ушодсь Аловелесэ ветфельдшерэкс. Седе тов роботась эрьва кодамо хозяйствасо прявт ветврачокс. Ней – ведущей врач-эпизоотолог ды терапевт.
Татьяна Ивановна Лазарева 2019 иестэ саезь – прявт ветеринарной врач-эпизоотолог. Ветстанцияв роботамо сась 2015 иестэ. Сабанцелень школань прядомадо мейле тонавтнесь Краснослободскоень зооветеринарной техникумсо. Заочна прядызе Н. П. Огарёв лемсэ МГУ-нь Аграрной институтонть.
– Минек вановтонок ало весе эпизоотической тевтне. Те – а нолдамс берянь орматнень ломантненень ды ракшатненень. Васенце таркасо ашти вакцинациясь. Валске ланга ардтнетяно хозяйствава, мейле весементь тешкстама конёв лангс, ветяма отчёт. Ракшатненень ладсетяно чипть. Те чипесь максы тенек эрявикс информация – кинь те скалось, кодамо вакцинация ютась, кодамо чистэ ды седе тов. Эрьва ракшанть эсензэ чипезэ. Скалтнэнь ды букатнень понгавтовить пилезэст. Кискатнень-псакатнень – киськест потсо. Шприц вельде кутьмерезэст нолдави вишка капсула. Мейле сканер вельде чипесь максы тенек эрявикс информациянть. Мекштненень чип ладяви нешкес, – ёвтни Татьяна Ивановна.
Николай Владимирович Борисов комсте ламо иеть ветеринариясо. Сон чачсь Таразбуесэ. Истя жо прядызе Краснослободскоень зооветеринарной техникумонть. Важодемань кизэ ушодовсь Таразбуень колхозсо. Васенце тонавтыцязо ды превс путыцязо ульнесь М. М. Атласов, конань кедьсэ ютась практика ды кона лездась чарькодемс ветеринариянть. Ветстанциясо Николай Владимирович ведущей ветврач, сон – осеменатор ды тейни скалтнэнень УЗИ, ванкшны, ули-арась скалонть потсо ваз. Седе сеедьстэ сонзэ тердтнить кудазортнэ. УЗИ-нь вишка аппаратось 35 чиде мейле невти, скалось вазов эли аволь. Истя жо сон невти скалонь орматкак.
Те коллективсэнть сехте од специалистэсь – Дарья Байкова. Мелят прядызе Орданьбуень аграрной техникумонть. Заочна кармась тонавтнеме Н. П. Огарёв лемсэ МГУ-нь Аграрной институтсо, тедеде прядызе васенце курсонть.
– Эрян Орданьбуесэ, эрьва чи ардтнян тей важодеме. Вишка шкасто саезь пек вечкан ракшат. Кудосонок свал ульнесть псакат ды киска. Молинь тонавтнеме ветеринарокс ды тунь а янксян. Важодемась тукшны мелезэнь, улить паро тонавтыцян: Н. А. Барсуков ды Т. И. Лазарева. Зярс мон ветеринарной фельдшер. Ардтнетяно вакцинациянь тееме, тейтяно кастрацият ды стерилизацият. Орданьбуесэяк ламо пшкалить тень лезкс мельга, кинь ормалгады кисказо эли псаказо, бажан лездамс, ёвтнян, кода лецямс кудонь вишка ракшинетнень, – пачтясь Дарья.
Башка валт эрявить ёвтамс водительденть Александр Петрович Атласовдо. Сон тесэ сисем иеть роботы САЗ-3307 машинасо. Машиназо свал ванькс, эрьва кодамо шкане анок куш ков ардомс. Цёрась, эрси, роботы оймсема чистэяк. Машинасонть ладязь ДУК – дезинфекционной установка. Тозо кельгить 2 тоннат ведь. Александр Петрович ардтни хозяйстватнева, косо ютавты профилактической дезинфекция. Мереви совамс скалонь эли вазонь кардонть потс. Машинасонть ули кувака шланг, малав 80 метрат. Дезинфекция ютавтови ансяк витнезь-петнезь ферматнесэ. Истя жо скалтнэ валновить репеллентсэ сеськеде, карводо, промодо. Бути пиштевтить пильгень ормадо, сэредить кенжест – валновить пильгесткак. Те ведесь а канды тенст кодамояк зыян. А. П. Атласов пейди, валонзо коряс, сон уш прок ветеринар, чарькоди ламо мезес, соды, зяро раствор човорямс, кодамо процентэнь.
Татьяна Маторкина