Россиясо Ламо функциянь центратне (МФЦ) ушодовсть панжтневеме 2007 иестэ саезь. Сынь кармасть вейкине таркакс, косо максовить муниципальной ды государственной услугатне – эрявикс ведомстватнень пельде справкат, документт ды лия вешемат. Ней уш миненек тонадовсть МФЦ-тне.
Васень шкасто эзь кемевеяк, ковгак лия таркава чийнемс а эряви: тесэ максыть паспортт, омбо масторонь паспортт, СНИЛС-т, водителень удостовереният, ОМС-нь полист, леднемапель лангс меремат (разрешеният). Теде башка, МФЦ-нть трокс эрьва ков кучовить документт, сёрмадстови-тееви авань капиталось, стяват очередьс эйдень кужос ды седе тов.
МФЦ-сэ тевтнень ветить зярыя ёнксонь коряс:
-гражданствась ды регистрациясь;
-модань – ули-паронь коряс тевтне;
-налогтне;
-предпринимателень тевесь;
-эрицятненень социальной лезксэнь максомась;
-справкат (архивень тев);
-строительствась ды витнематне-петнематне;
-трудось ды занятостесь.
Отяжбуесэ Ламо функциянь центрась панжовсь 2010 иестэ. Сонзэ туртов стявтозель башка здания, косо ули ломантнень туртов аштемань-учомань зал, чевте озамо таркат, зярыя вальминеть, косо важодицятне вастыть ломантнень. 2020 иестэ саезь Центрась кармась Саранскоень государственной многофункциональной центрань филиалокс. Эрьва чи тей пшкалить 50 ды седе ламо ломанть.
– Эрицятнень туртов минь макстано 174 услугат. Эрьва ие сынь седеяк ламолгадыть. Сехте вешевикстнэ, нама, Росреестрань услугатне, неть: недвижимость лангс регистрациясь (кудотнень, квартиратнень, модатнень лангс); МВД-нь (сайтяно яволявтомат паспортонь максомань, полавтомань, омбо масторонь паспортонь максомань коряс); водителень удостоверениянь полавтомс яволявтомат сайнетяно. Тейтяно эрямо таркань коряс регистрация (прописка). Пшкалить тенек омбо масторонь ломантнеяк (миграционной учётонь коряс). Истя жо важодтяно Пенсионной фондонть коряс, тосо ламо услугат, сехте вешевикстнэ – пенсиянь максомань, эйкакштненень пандоматнень коряс. Макстано муниципальной услугат – полавтомс, саемга, адресэнть эли модань участкатнень коряс. Ломантне сыть, ёвтыть, мезе тенст эряви, сёрмадыть яволявтома. Минь жо кучсынек сонзэ седе тов: властень органтнэс – Росреестрав, Пенсионной фондов эли налоговойс.
Важодтяно ниленек, весе неть ломантне ведущей специалистт. Умок важоди Людмила Валерьевна Фадейкина, зярыя иеть – Антонина Александровна Ротанова, пельие мартонок Анастасия Ивановна Артюхина, прявт специалистэнек Мария Валерьевна Серова декретсэ. Весе тевест содасызь парсте, маштыть важодеме ломантнень марто, лездыть эрьва кодамо ёнксонь коряс, – ёвтни МР-нь ГАУ-нь Отяжелень муниципальной райононь коряс МФЦ-нь филиалонь прявтось Лидия Николаевна Модина.
Лидия Николаевна чачсь Отяжбуень Пумбра велесэ. Школанть прядомадо мейле тонавтнесь Ицялонь педагогической училищасо. Седе тов заочна – М. Е. Евсевьев лемсэ МГПУ-нь (икеле МГПИ) коррекционной педагогикань факультетсэ. Важодема кизэ ушодовсь райононь администрациясо велень хозяйствань управлениясо, косо ульнесь секретарекс. Теде мейле важодсь Кадастрань палатасо, ульнесь эрицятнень сёрмадстомаст коряс уполномоченноекс. Ламо функциянь центрань прявтокс кармась 2011 иестэ саезь. Модинтнэнь колмо эйкакшост. Весе цёрынеть.
Людмила Валерьевна Фадейкина чачсь Отяжбуень Паранеи велинесэ. Тосо ней ансяк вейксэ эрицят. Зярдо ульнесть кемень иензэ, семиянек састь эрямо Отяжелев. Тетязо ды авазо кармасть важодеме мясокомбинатсо, макссть тенст квартира. Людмила кармась якамо посёлкань 1 № школав. Сонзэ прядомадо мейле тонавтнесь Н.П. Огарёв лемсэ МГУ-нь биологиянь факультетсэ. Зярсыя важодсь мастерэкс маслозаводсо. 2016 иестэ саезь сась роботамо Ламо функциянь центрав. Валонзо коряс, сон муизе эрямосо вечкевикс тевензэ.
– Монень пек вечкеви важодемс ломантнень марто. Эрси, чизэнзэ пшкалить ламо ломанть, котьмат эрьва кодамо документтнэнь марто, чись прядови, сиземаяк а марят. Прявтонок Лидия Николаевна паро ломанесь, чарькодиця, кодат стака кевкстемат илязт лисне – сон соды, кода ды мезе теемс. Покш оштнесэ МФЦ-в сеедьстэ пшкалить Интернет вельде. Минек районось вишкине, ламотне – велень эрицят, сынст арась Интернетэст, секскак сыть миненек тевест коряс. Лиясто алкуксонь допрос лисни мартост кортамсто, аволь эрьвантень видестэ толковави, мезень коряс сась, кодамо справка эряви, ков кучомс документэнть. Лездатано, кияк истяко а туи. Ды кецнетяно ломантнень кис, зярдо тевест лиси. Сеедьстэ пшкалить кудочинь регистрациянь теемга, госуслугатнень коряс, сёрмадтано договорт, макстано пенсиянь покшолмадо, судимостень коряс справкат, – кортась Людмила Фадейкина.
Антонина Александровна Ротанова сась тей важодеме 2016 иестэ, од тейтернекс, ансяк прядокшнызе Саранскоень электромеханической колледженть. Валонзо коряс, сынст важодемасо тошнакалемс шка арась. Ломантнень марто савкшны улемс психологокс. Эрьва чи ломанть, эрьва чи кодаткак лия вешемат. Теде башка, эряви улемс ламонь содыцякс, чарькодемс весе услугатнень коряс.
Ламо функциянь центрасо улемстэ кортынек тов сыця ломантнень мартояк. Нина Николаевна Абрамова теи документт дачанзо лангс. Сон пачтясь: «Сеедьстэ пшкалетяно МФЦ-в. Ковгак лия учреждениява чийнемс а эряви. Тей сат – весе ве таркасо тейсызь мезе эряви. Тейтертне тевест содасызь парсте, кортыть ломантнень марто вадрясто, ёвтыть, кода ды мезе».
«Мон свал пшкалян Людмила Фадейкинанень. Куш кодамо кевкстема марто сак – лездыть. Вана нейгак, эряви тень дачам теевтемс. Тесэ лембе, ули ков озамс, очередть покшт арасть», – кортась Нина Ивановна Тюрина.
Эштё вейке авинесь пек капшась, ансяк ялатеке кортынек мартонзо. Елена Поник сась Московсто. Отяжбуень Покш Манадыши велестэ сон рамась кудо. Яволявтоманть неизе Интернетстэ, мелезэнзэ весемесь тусь, сась ды рамизе. Мирдензэ марто сынст колмо эйкакшост, ули эсест бизнесэст. Покш Манадыши велесэ кудонть марто 15 соткат мода. Сынь арсить ташто кудонть таркас стявтомс од. Тей кармить сакшномо кизна оймсеме.
Минь саинек Еленань телефононь номерэнзэ ды арсетяно самс тензэ кизна инжекс.
Татьтяна Маторкина
Фототне Эдуард Ретунскиень