НЮРА БАБАНЬ ПРЕВС ПУТОМАНЗО
Эрямось – теке иневедь. Чуди ды чуди, ансяк свал сакшны тензэ пе. Нюра бабань марто минь кортынек 2019 иестэ, прок маряви, теке исяк. Истя эрси, зярдо ломанесь седейс теть пры, зярдо каршо валот лангс муи самай эрявикс вал. Ды те кортамось ламбамо тансть кады турва лангс. Нюра баба вана уш ие кода модасо, а малавиксэнзэ ды велень эрицятнень туртов, нейгак маряви, буто сон вакссост.
– Авам виев ды превей ульнесь. Истят эрьва кодамо моронь, ёвксонь, стихень, валмеревксэнь ды ламо лия мезень содыця ават масторонть лангсо арасельть. Мезде иля кевксте – каршо валозо анок. Велень эрицятне течинь чис ледстнить эйсэнзэ, кода «фольклорной книга», ламо мезе содыль ды ёвтниль кезэрень шкадо ды койтнеде-кирдатнеде. Кургонь автезь яла кунсолынек. Важодильгак од ломанень коряс. Кавксоньгемень иес эзь сода, мезе истямось сизема. Пиресэ, паксясо, вирьсэ – свал васенце, свал мартонок! Весе абунгалить, косто те сёргов-моргов бабасонть истя зняро вийть. А мон, мартонзо эриця тейтерезэ, течинь чис а содан. Истямокс чачсь, истямокс кулоськак. Куломачис ансяк важодсь, а вечкиль кувать лекстямо. Вейке тевенть теизе, капшазь кундыль омбоцентень. Минь, эйкакшонзо ды нуцьканзо, лангозонзо ванозь, кенерилинек ансяк ливезенть конясто нардтнемс. Минек авам – алкуксонь мараля, – мизолкс марто ледстни авадонзо галина тейтерезэ.
Анна Антоновна Ануфриева чачсь-кассь 1939 иень январень 24-це чистэ Орданьбуе ёнксонь Кеченьбие велесэ сокицянь-видицянь семиясо. Весе пингензэ печтизе чачома велесэ. Ламо мезе ютась прянзо ланга, ансяк меельце чис сырькаесь эзь пурдаво эрямонь стакачитненень, прянзо кандсь вере, эрьва таргонь оймсема чистэ свал якась церьковав, ве чияк эзь аште тевтеме, свал кудоютконь мелявкс потсоль.
А стяко Нюра бабань лемдизь «книгакс», алкукскак, сырькаесь теке кезэрень ёвксонь потмар (шкатулка). Кортамозо пешксе валмеревкстэ.
Минек кортамосонть явинек мель кезэрень свадьбань койтненень-кирдатненень ды валмеревкстнэнень.
– Лисинь мирденень 1958 иестэ. Мирдем, Михаил Иванович, кувать шка эзь тарга. Весть-кавксть якась кудов ильтемень ды нилеце вастовомасто тердимим мирденень. Се шкане те киньгак эзь абунгавто. Эзинь кавтолдо, ды чокшнестэнть тетянь-авань кенкшс чукадсть кудат. Свадьбанть ютавтынек кода эряви. Икельце якамсто саезь Мастяс. Гармониянь мельга киштинек-морынек тарго (недля), а, паряк, седеяк ламо. Минек шкань ломантне сеске сялдомо кундыльть истятнэсэ, конатнень свадьбаст ульнесь ансяк кавто чить, те кортыль седе, што кажовт ульнесть неть од ломантнень тетяст-аваст. А ков молемс нужачиденть? Мельс ледстяса, кода войнань шкане шабрань Валя тейтересь лиссь мирденень мельникень цёранзо экшс, кона сэредсь ДЦП-сэ. Чокшне ланга тувор экшсэ аштемстэ, пилезэнек каятотсь кенкш удалдо лайшема. Авам вадугакс ёртовсь ушов, седеезэ маризе апаронть, кие соды, мезе кандсь войнань чись. Кенкш вакссо вастызе шабрань тейтеренть, кармась кевкстнеме эйсэнзэ, мезень кувалма аварди, а тонась, салов сельведень нильнезь, ёвтнесь тензэ, кода тетязо ладизе тензэ мирдекс сэредиця цёранть, ансяк сень кувалма, што тонань тетязо пек сюпав, ули салозо-кшизэ, содави, бути тенст мирденень лиси – вачочи содамо а карми. А кода улемс седеенть марто? Сонзэ ярсамопелезэ – вечкема, конась те венчамосонть а ули. Ансяк валске ёнов сезевсь кенкш удало кортамось. Шабрань тейтересь пурнынзе весе виензэ ды сыргась кудов. Таргонь ютазь лиссь мирденень, седейсэ ризкс марто, ансяк сюпав семияс, – ледстнесь Нюра баба.
Бути кортамс свадьбань валмеревкстнэде ды содамочитнеде, тесэ Нюра баба сеске кармась ёвтнеме, кодат тамашат вастневсть сонзэ эрямонь кинть лангсо.
– Пазось ансяк соды неть тевтнень лангс каршо валт, ансяк ковгак эйстэст а молят, сынь эрьванть эрямосо эрить. Се иестэнть, зярдо мон лисинь мирденень, велесэнть ульнесь эштё вейке свадьба. Ушосонть кепететсь покш давол, сельметь-чамат а неят. Ды вана шабра ульцясо, зярдо весе инжетне кармасть совамо свадьбань кудонтень, одирьванть прясто вармась салызе каштазонть. Куватьс ломантне чийсть мельганзо, киненьгак эзь сасаво. Даволось васня лов ланга усксь эйсэнзэ, а мейле кепедизе верев-верев ды овсе ёмавтызе ломантнень сельме икельде. Кеченьбиесэ ули истямо валмеревкс: бути пры каштазот прястот – ули мирденень лисема килангот черькстазь. Тейтеренть истя лисськак: мирдезэ васенце вейсэнь эрямо читнестэ ушодсь ченькстэ симеме ды кавто иень ютазь кулоськак, кадызе ялгам ськамонзо, ансяк кавто эйкакш марто, – сельведь марто ледстнесь бабась.
Ульнесь Анна Антоновнань мельсэ оянзо истямояк свадьба. Чилисема марто саезь ды чопотемс свадьбань чись ульнесь пиземев. Се шкань аватне кортасть, Пазось казизе пиземесэ свадьбань чинть секс, штобу улезэ вейсэнь эрямось сюпав, чанстев, авась чачтоволь мирденть туртов ламо эйкакшт. Истя ульнеськак – семиясонть чачсть кевейкее эйкакш, весе шумбрат ды уцяскавт.
– Стяко неень шкань од ломантне пизементь ды ловонть лангс згилить ды кежиявтнить. Кодамо бу эрзянь велень ломань иля кевксте, эрьвась мери теть, налксемс свадьба истямо аволь маней чистэ – Пазонь чансть, – мизолкс марто кортась сырькаесь.
Кортынек сырькаенть марто свадьбань оршамопельтнедеяк. Бабась ледстнесь, кодат оршамонзо ульнесть свадьбань чистэнзэ.
– Вай, мон пачк ацирьгалян од ломантнень кис. Мезе теи мартост шкась? Ков ёмасть минек шкань койтне-кирдатне? Чарькодян, эрьва тейтерькась бажи улемс сехтей мазыекс те покш чистэнть, ансяк а мазый алкуксонь эрзянь оршамопелесь, нуцькинем? Панарось, пулаесь, каштазось ды ламо лия мезесь? Весемесь цитни Пазонь чинь эрьва кодамо цветсэ… Седейризкс каян чамань ваднемадонтькак. Ды те мезе улезэ?! Од тейтеренть мазычинзэ весе ёмавтсызь, раужкавтсызь, косметика алов кекшсызь весе сень, мейсэ алкуксонь мазычись! А чертнень лангсо кода нарьгить. Мезе ули седе вадря кодазь пулодо, а пачканзо нолдазь якстере чилисемань цветсэ лентадо?! Истя, ковгак а молят сыця шкадонть, а содан, мезе учи эйсэнь меельце эрямонь чистэнь, паряк, кезэрень шкатне одов велявтыть, паряк, овсе лоткить тейнемеде свадьбат, – ацирьгадозь кортась бабась.
Эсензэ мирдензэ марто Нюрка баба эрясь кодгемень кото иеть. Вейсэ эрямосонть трясть-кастсть ниле тейтерть. Эрьванть свадьбанзо налксизь эрзянь коень-кирдань ванстозь.
– Мирдень экшсэ эрямосонть эрьва мезе ульнесь. Вадря ды стака читькак, ансяк, нама, прявтокс вейсэнь эрямосонть свал арыль вечкемась, сон изнилинзе весе кавтолдоматнень ды апаротнень. Эсенек тейтерьканок свал тонавтылинек мирдень экшсэ маштомс эрямс ладс ды вейке-вейкень марто кортазь, а эряви малавикс ломаненть лангс кежиявтнемс, эряви озамс карадо-каршо ды кортамс, – тонавтсь бабась.
Кортамонь перть Нюра баба аволь весть мелявтсь эрзянь ломантнень ды келенть эрямост коряс. Сырькаенть ризнэвтсь се, што неень од ломантне туить ошов ды стувтыть тиринь моданть, келенть… Истя тейнемс овсе а лади! Лисни, бути весе истя кармить тейнеме, пелезеват содамс, мезе ули седе тов…
Ёвтнесь Нюра баба истямояк Кеченьбие велень ёвтнемадо. Кезэрень шкасто веленть маласо сюпав сокицятне-видицятне кирдильть яровой пакся, конанть туртов путокшность лем – Урьвакстомань пакся. Бути сыця иестэнть те паксясонть сюрось чачиль вадря ды покш – кецнильть – велесэнть кармить ламо свадьбат, нама, эрсиль мекевлангт.
– Эрямосонть эрьва мезе лисни. Эрьванть эйстэденек эсензэ кизэ, конанть лангсо учить певтеме кеняркст ды стакачить. Эряви ансяк маштомс сынст каршо ютамо, – тонавтсь бабась.
Сырькаенть мельсэ ульнесть ламо свадьбат, ансяк сехте пек превсэ кирдевсь вейкесь. Ковкерьксэнть лангсо ульнесь 1945 иень маень вейксэце чись. Ансяк кенерсть од ломантне пазава алов озамо, кода инжетнень пилес каятотсь гайтев баягань чавома. Васенце арсемась – ятось пачкодсь Кеченьбие ёнов. Косот сянготне, косот палкатне?! Эрьвась арсесь цидярдомс раужо кискатнень каршо. Однэк-сыренек ношкстасть ушов. Ваксозост лишме лангсо сась военной формасо од цёра ды казсь Пазонь алкуксонь казне – ёвтась, войнась течи прядовсь. Арседе тынсь, кодамо ульнесь те свадьбань чись! Весе стувтызь, мезень кувалма вейс пурнавсть, ушодсть праздновамо Изнямо чинть.
Мон яла свал кортан, кодат сюпавт семиятне, конатнесэ нейгак эрить шумбрат истят сырнень сырькайтне! Сынст эйсэ эряви седе ламо кунсоломс, ванстомс ды жалямс.
Нюра бабанть валонзо течияк токить седей. Миненек, неень шкань ломантненень, эряви ванстомс сень, мезенть казизе Пазось ды покштянок-бабанок. Паряк, тень лангс нежедезь, седе кувать ванстовить минек эрзянь ломантне, койтне-кирдатне ды тиринь келесь!
Алёна АРТЕМЬЕВА