Тедеде «Поиск» республикань патриотической вейсэндявксонтень топодить 40 иеть. Малав весе те шканть перть сон сюлмавозь сонзэ пурныцянть Николай Андреевич Кручинкинэнь лемензэ марто.
Покш Березник буень Гузынцы велень школасо тонавтыцясь пурнакшнось «Якстере следопыт» штаб, конась важодсь «Сияжар» историко-краеведческой кружоконть юрсо. Эйкакштне тонавтнесть тиринь ёнксонь историянть, пурнасть музеентень экспонатт ды материалт, сёрмалесть ветерантнэнь ледстнемаст, вешнесть сетнень, кинь марто ютызь войнанть. «Поиск» отрядось васенце экспедицияв сыргась 1988 иестэ. Од ломантне эсь сельмесэ неизь тюремань таркатнень: окоптнень, латкотнень, воронкатнень, гильзатнень. Ютась аволь ламо шка ды патриотической движениясь сравтовсь республикань келес.
Течи «Поискенть» вети од тейтересь Виктория Дорофеева. Сон школасо тонавтнемстэ саезь кармась ардтнеме экспедициява, студентэкс улемстэяк поладызе те тевенть. Тедеде майстэ сонзэ ладизь «Поискень» прявтокс. Кода кастыть алкуксонь патриоттнэнь, кить тосо важодить – весемеде тенек ёвтнесь редакциянь инжесь.
Виктория чачсь Московсо. Вишкинестэ семиязо сась эрямо аванзо тиринь ёнксов – Сыре Шайговав. Тесэ сон мольсь школав. 5-це классто саезь классной руководителест ульнесь Людмила Андреевна Гунькина, сон ветясь рузонь кель ды литература, теде башка – А. М. Кижеватов лемсэ «Эхо войны» поисковой отряд. Ялгатнень эйстэ кие кочкизе спортонть, кие – музыканть, Вика кармась якамо поисковой отрядов. Гунькина тонавтыцясь кармась васенце превс путыцякс, тейтересь лембестэ ледстни эйсэнзэ ды ёвты сюкпря.
– Мон те шкас ледстнян васенце экспедициям. Тонавтнинь 7-це классо. Авам эзь нолда, ризнэсь ды мелявтсь кисэнь, ансяк арази кирдеван? Ардтнинек Ленинградонь областень «Синявинские высоты» таркантень. Тосо ютась «Волховский фронт» экспедициянок. Ды те шкас эрьва ие ардтнян. Кудосо свал ашти оршамопель марто пурназь сумкам. Чуросто пачколян кудов, седе сеедьстэ ковгак якатано важодемань коряс эли экспедицияв, – ёвтни Виктория.
Школань прядомадо мейле сон мольсь тонавтнеме Темниковань медколледжев, кочкизе фельдшерэнь специальностенть. Ней тонавтни М. Е. Евсевьев лемсэ МГПУ-нь психологиянь ды дефектологиянь факультетсэ 2-це курссо.
– Нама, эзинь арсеяк, кочкасамизь «Поиск» патриотической вейсэндявксонь прявтокс. Эзинь содаяк, кодамо те стака тевесь. Кадык те аволь коммерческой организация, ялатеке улить стакачить. Сеедьстэ гайневтнинь Н. А. Кручинкиннэнь превс путома мельга. Сон ульнесь алкуксонь ломанекс. Лездась свал эрьва кинень. Мелявтсь весементь кисэ. Тонавтсь эйсэнь: мейстэ ушодомс, кода важодемс, мезе теемс. Минь пшкалинек тензэ «батя». Сон тусь эрямосто 2023 иень августонь 14-це чистэ. Сеске кадовинек теке урозокс. Ней а кинень пшкадемс лезкс мельга. Теке жо чистэнть минек боецтнэ ульнесть Калужской областьсэ «Западный фронт» экспедициясо, мусть чавовозь солдаттнэнь марто кавто воронкат. Цёратне мерсть, те Николай Андреевич лездась. А содан, кемемс-арась, ансяк моненьгак лездась. Тевтнеде ламольть, ломанть а сатыть, аварьгадынь, кода улемс, а содан. Варштынь фотографиянзо лангс, ёвтнинь весе мелявксон. Секе жо вестэнть неия онстон, сон оймавтымим, аламодо сёвнымим нусмакадоманть кисэ, ёвтась, мезе теемс. Омбоце жо чистэнть гайневтсть тень поисковиктне, ды тевесь сыргась.
Теян весементь, мезе вийсэнь, сонзэ тевезэ илязо ёма, седеяк виевгадозо. А лововияк, зяро эйкакшт ютасть кедьганзо, зяронь сон тонавтсь, путсь превс ды виде килангс. Аволь весть понгонинь мартонзо экспедицияв. Кода сон чарькодиль ды содыль, косто вешнемс солдаттнэнь, кона таркасо аштить мода потсо? Весе тонавтнинек пельдензэ. Сюкпря Пазонтень, содылия, тонавтнинь пельдензэ. Лемдинь эйсэнзэ тетякс. Зярдояк тень а стувтовить экспедициятне. Чинь перть важодтяно, чокшне мадтяно палаткас. Мадемадо икеле Николай Андреевич ушоды ёвтнеме ёвкс. Ды сехте мельстуиця таркастонть матедеви! Омбоце чистэнть таго теке тевесь.
– Виктория, кода ютыть неень шкане экспедициятне?
– Экспедициятне эрсить тундосто саезь сёксес. Свал улить ломанть, кить бажить тов молемс, те пек кецявты. 2024 иень тундонень уш пурнынек ломанть. Экспедицияв ардтнинек Ростовской, Смоленской, Калужской, Ленинградской областев, Крымень Аджимушкаень каменоломняв, Сахалинэв. Вейке экспедицияс комсь ды седе ламо ломанть сыргить. Те – 14-16 иесэ школань тонавтницят, студентт, седе покш ломанть, кить важодить, сынь отпуск шкане сыргить солдатонь вешнеме. Чарькодеви, сеске весень а сайтяно. Васня теевтяно содавиксэкс, вансынек ломаненть прянь ветямонзо. Эйкакшонтень пек стака меремс «тон а молят тедеде». Улить весероссиянь покш экспедицият, ков якатано. Теде башка, сёрмадтано грантт ды сынст ярмактнень лангс ардтано. Тедеде боеценек ульнесть Калужской областень Сухиничской ды Барятинской районтнэсэ, Аджимушкайсэ, Сахалинсэ. Мусть комсь боецт. Весе важодить вейсэ: цёрат, тейтерть, чувить коймесэ мода, якить ялго малав 15 вайгельбеть. Муеви боецэсь – сёрмадтано корязонзо документт, мейле одс калматано. Минек тевсэ, васняяк, эряви муемс чавовозь солдатонть. Вадрясто кепедемс. Содамс, кодамо лемезэ. Пачтямс архивс, косо кармить вешнеме, кодамо дивизия ульнесь неть таркатнесэ, лемень коряс ваныть, кие те ды костонь.
Весе неть иетнень перть минек улить эсенек коенек. Саемга, чокшне ланга ютавттано «Тештине». Пурнавтано толбандя ваксс, вейке боец саи кедезэнзэ тештине ды ушоды ёвтнеме, кода ютась чись, кода моли важодемась экспедициясо. Тештинесь – чавовозь солдатонь образось, конань минь вешнетяно. Те умонь коесь. Сон ушодовсь сестэ, зярдо минек боецтнэ экспедициясо мусть кавто солдат марто кузов. Вейкенть пряс путомасонзо (пилотка эли фуражка ульнесь) ванстовсь тештине. Тештиненть саизь кедьс ды кармасть ёвтнеме. Истя те паро коесь ванстовсь те шкас.
– Кить важодить «Поисксэ»?
– «Поиск» патриотической вейсэндявксос совить 87 отрядт. Сынь панжозь республикань школатнень ды колледжтнень юрсо, весемезэ 1440 боецт. Сынст марто важодить райононь отрядтнэнь ветицятне. Сынь монь васенце лездыцян, покш опытэст, пельдест тонавтнян. Те – «Поискень» сырнень фонд. Сынь аволь ансяк ютавтыть мужествань урокт, лездыть весенень, кие понгсь кодамояк зыянс эли печти стака чить. «Поисксэ» ламо эйкакшт аволь пешксе (трудной) семиясто. Сынь кортыть, бути аволь «Поиск» движениясь, кие соды ков пачкодевлинек ды мезе мартонок улевель. Ды мон пран мартост ве мельс.
Экспедициятнесэ ломантне полавтовить, малавгадыть, муить ялгат, сынь лиякс кармить ветямо пряст, арсеме. Патриотокс кияк а чачи, патриотокс ломанесь тееви мейле. Ламо ашти седе, кить перьканзо эрить, кодат тонавтыцянзо. Аволь валсо, тевсэ эряви невтемс, кият тон. Весементь эряви ушодомс эсь прянть эйстэ. Те движениясонть арасть ярмакт ды зарплатат. Весе эсь мельсэ!
– Кода карматадо тешкстамо 40 иень юбилеенть? Кодат меленк-арсеманк седе тов?
– «Поискень» чачома чинть тешкстасынек ноябрянь 23-це чистэ. Пурнасынек вейс од поисковиктнень, покштнень ды седе сыретнень. Кадык одтнэ содыть, зяро ломанть явить мель те тевентень, зяро теезь ды зяро икеленек аштить од тевть. Кадык несызь, кикс кармасть сетне, кить ютызь «Поискень» школанть. Нама, поладтано ютавтомо мужествань урокт, экспедицият. Кармить поисковикень форумт, слёт, «Марш памяти». Эряви важодемс архивсэяк. Секскак февральстэ ардтано Оборонань министерствань Центральной архивс – Ине Отечественной войнасо чавовозтнень лемест содамга ды а стувтомга. Сюкпря ёвтавлинь МР-нь Од ломанень коряс госкомитетэнтень, Од ломанень центрантень лездамост кисэ. Вейсэ важодтяно Изнямонь волонтёртнэнь, Юнармиянть марто. Минек икеле ашти вейсэнь тев – патриотонь кастомась!
Татьяна Маторкина